1 Meqabyan 11

Äthiopische Bibel (Ge'ez)

¹ አርሞን፡ ወአረፋቲሃ፡ ወድቃ፡ ወእለ፡ ያመልኩ፡ ጣዖተ፡ ውስት፡ ዛብሎን፡ ወኤዶምያስ፡ ይቲሐታ፡ አሜሃ፡ እስመ፡ ፈደዮን፡ እግዚአብሔር፡ በከመ፡ እከዮን፡ ወበከመ፡ ግብረ፡ እደዊሆን፡ ይበክያ፡ ጢሮስ፡ ወሲዶና፡ እስመ፡ ቀርበ፡ ዘይትቤቀሎን፡ በእንተ፡ አከዮን፡ ወጣዖቶን፡ ዘገብረ፡ በንዕሶን፡ ወኢኀደጋ፡ እስከ፡ አመ፡ ርስአን።

² ወበእንተዝ፡ ይትቤቀሎን፡ እግዚአብሔር፡ በእንተ፡ ዘገብራ፡ ምርኣተ፡ ወርኩሰ፡ ወዝሙተ፡ ወጣዖተ፡ ወአዋልደ፡ ይሁዳኒ፡ የኃሥራ፡ እስመ፡ ኢቆማ፡ በትእዛዘ፡ እግዚአብሔር፡ ፈጣሪሆን።

³ ከማሃኪ፡ አመ፡ ትንሣኤ፡ ሙታን፡ ይትከሠት፡ ኃሠራ፡ ለኢየሩሳልውም፡ እስመ፡ ኢሖረት፡ በሕጉ፡ ወበኵነኔኑ፡ ለእግዚአብሔር፡ ወሖረት፡ በፍግዓ፡ ወበቀቲለ፡ ጻድቃን።

⁴ ይእተ፡ አሚረ፡ ይትኃሠሣ፡ እግዚአብሔር፡ በማሕቶተ፡ ጥበቡ፡ ወይትቤቀላ፡ በኵሉ፡ ዘገብረት፡ እከያ፡ በመዋዕለ፡ ንዕሳ፡ ወኢኃደገት፡ በመዋዕለ፡ ወርዙታ፡ እስከ፡ ርስአታ።

⁵ ወቦዓተ፡ ውስተ፡ መቃብር፡ ወኮነት፡ ሐመደ፡ ከመ፡ ቀደምት፡ አበዊሃ፡ እለ፡ ሖሩ፡ በግዕዞሙ፡ ወአበዩ፡ ትእዛዘ፡ እግዚአብሔር፡ ከመ፡ ትንሣኤ፡ ይትቤቀሎሙ።

⁶ እስመ፡ ይቤ፡ ሙሴ፡ በእንቲአሆሙ፡ እስመ፡ ከመ፡ ዓፀደ፡ ወይነ፡ ሰዶም፡ ዓፀደ፡ ወይኖም።

⁷ ወሐረጎሙኒ፡ እምነ፡ ገሞራ፡ ወአስካሎሙኒ፡ አስካለ፡ ሐሞት፡ ወቀምሖሙኒ፡ መሪር።

⁸ ኅምዛ፡ አርዌ፡ ምድር፡ ወይኖሙ፡ ኅምዛ፡ አፍዖት፡ ዘይቀትል።