4 Baruch 5,1

ወአቤሜሌክኒ፡ አምጽአ፡ በለሰ፡ ጊዜ፡ ቀትር፡ እምኀበ፡ ለአኮ፡ ኤርምያስ፡ ወረከበ፡ ዕፀ፡ ጸፍቅተ፡ ወነበረ፡ ወአጽለለ፡ ከመ፡ ያዕርፍ፡ ንስቲተ፡ ወአስመከ፡ ርእሶ፡ ዲበ፡ ሙዳየ፡ በለስ፡ ወኖመ፡ ስሳ፡ ውስድስተ፡ ዓመተ፡ ወኢነቅሀ፡ እምንዋሙ። ወእምድኅረዝ፡ መዋዕል፡ ተንሥአ፡ ወነቅሀ፡ እምንዋሙ፡ ውይቤ፡ ዓዲ፡ ሶበ፡ ኖምኩ፡ ንስቲተ፡ እስመ፡ ዓዲ፡ ይከብደኒ፡ ርእስየ፡ ወኢጥዲኩ፡ ንዋመ። ውከሠተ፡ ዝኰ፡ ሙዳየ፡ በለስ፡ ወረክበ፡ ዝኰ፡ በለሰ፡ ሐዲሳነ፡ ወያንጸፈጽፍ፡ ሐሊቦን። ወፈቀደ፡ ይኑም፡ ዳግመ፡ እስመ፡ ይከብዶ፡ ርእሱ፡ ውኢጥዕየ፡ ድቃስ፤ ውይቤ፡ እፈረህ፡ ከመ፡ ኢይኑም፡ ወኢይጐንዲ፡ ከመ፡ ኢይሒሰኒ፡ አቡየ፡ ኤርምያስ፡ እስመ፡ ጽሂቆ፡ ፈንወኒ፡ በነግህ፤ ወይእዜኒ፡ እትንሣእ፡ ወአሐውር፡ እስመ፡ ሞቀሰ፡ ዋዕይ፡ ወአልቦ፡ ሶበ፡ የኀድግ፡ በኵለሄ። ወተንሥአ፡ ወንሥአ፡ ሙዳየ፡ በለሱ፡ ወቦአ፡ ውስተ፡ ሀገረ፡ ኢየሩሳሌም፡ ውኢያእመረ፡ ሀገረ፡ ወኢቤቶ፡ ወይቤ፡ ቡሩክ፡ አንተ፡ እግዚኦ፡ እስመ፡ ዐቢይ፡ ድንጋፄ፡ ወረደ፡ ላዕሌሁ። ወይቤ፡ አኮኑ፡ ዛቲ፡ ይእቲ፡ ሀገረ፡ ኢየሩሳሌም፤ ዮጊ፡ እጌጊ፡ እስመ፡ እንተ፡ ፍኖተ፡ ደብር፡ መጻእኩ፤ ወእመ፡ አኮ፡ እስመ፡ ይከብደኒ፡ ርእስየ፡ ወኢጥዒኩ፡ ንዋመ፡ ውይዘነግዐኒ፡ ልብየ፤ ወእፎ፡ እዜኑ፡ ዘንተ፡ ነገረ፡ በኀበ፡ ኤርምያስ፡ ዘከመ፡ ተባዐደተኒ፡ ሀገር። ወኀሠሠ፡ ኵሎ፡ ትእምርተ፡ ዘሀሎ፡ ውስተ፡ ሀገር፡ ከመ፡ ያእምር፡ ለእመኑ፡ ኢየሩሳሌም፡ ይእቲ። ወገብአ፡ ካዕበ፡ ውስተ፡ ሀገር፡ ውኀሠሠ፡ ለእመቦ፡ ዘያአምሮ፡ ወኀጥአ። ወይቤ፡ ቡሩክ፡ አንተ፡ እግዚኦ፡ እስመ፡ ዐቢይ፡ ድንጋፄ፡ ወድቀ፡ ላዕሌየ፤ ወወፅአ፡ ካዕበ፡ እምሀገር፡ ርሑቀ፡ ወነበረ፡ እንዘ፡ የሐዝን፡ ወእንዘ፡ ኀበ፡ የሐውር፡ ኢያአምር። ወአንበረ፡ ዝክወ፡ ሙዳየ፡ በለስ፡ ውይቤ፡ እነብር፡ ዝየ፡ እስከ፡ ያአትት፡ እግዚአብሔር፡ ዘንተ፡ ህየተ፡ እምላዕሌየ። ወእምድኅረዝ፡ ንቢሮ፡ ርእየ፡ ብእሴ፡ ልሂቀ፡ የአቱ፡ እምሐቅል፡ ወይቤሎ፡ አቤሜሌክ፡ ለከ፡ እብለከ፡ አንተ፡ ልሂቅ፡ አይቴ፡ ይእቲ፡ ዛቲ፡ ሀገር፡ ወይቤሎ፡ አረጋይ፡ ኢየሩሳሌም፡ ይእቲ። ወይቤሎ፡ አቤሜሌክ፡ አይቴ፡ ሀሎ፡ ኤርምያስ፡ ካህን፡ ወባሮክ፡ ሌዋዊ፡ ወኵሉ፡ ሕዝበዝ፡ ሀገር፡ እስመ፡ አልቦ፡ ዘረክብኩ። ወይቤሎ፡ አረጋይ፡ አኮኑ፡ እምዛቲ፡ ሀገር፡ አንተ፤ ወይእዜኒመ፡ ትዜከሮ፡ ለኤርምያስ፡ ከመ፡ ትስአል፡ በእንቲአሁ፡ ዘንተ፡ ኵሎ፡ መዋዕለ፡ ነቢረከ፤ ኤርምያስሰኬ፡ ውስተ፡ ባቢሎን፡ ሀሎ፡ ምስለ፡ ሕዝብ፡ እስመ፡ ተፄወወ፡ ወተውህበ፡ ውስተ፡ እዴሁ፡ ለናቡከደነጾር፡ ንጉሠ፡ ፋርስ፡ ወሖረ፡ ህየ፡ ከመ፡ ይትነበይ፡ ሎሙ። ውአሜሃ፡ ሰምዐ፡ አቤሜሌክ፡ እምኀበ፡ ውእቱ፡ አረጋይ፡ ወይቤሎ፡ አቤሜሌክ፡ ሶበ፡ አኮ፡ ብእሲ፡ ልሂቅ፡ አንተ፡ እምጸዐልኩከ፡ ወእምሠሐቁ፡ ላዕሌከ፡ አላ፡ ኢይከውን፡ ከመ፡ ያስተሐቅሩ፡ ሰብአ፡ ውብእሴ፡ ልሂቀ፤ ወሶበ፡ አኮ፡ ዘክመዘ፡ እምእቤ፡ ዘንጋዕከ። ወበእንተሰ፡ ዘትቤ፡ ሕዝብ፡ ተፄወዉ፡ ውስተ፡ ባቢሎን፡ አስራበ፡ ሰማይ፡ ጥቀ፡ ለእመ፡ ወረደ፡ ዲቤሆሙ፡ ኢኮነ፡ ጊዜሁ፡ ከመ፡ ይሖሩ፡ ውስተ፡ ባቢሎን፤ ወአንተሰ፡ ትቤ፡ ተፄውዉ፡ ውስተ፡ ባቢሎን። ወአንሰ፡ በከመ፡ ፈነወኒ፡ አቡየ፡ ኤርምያስ፡ ሖርኩ፡ ውስተ፡ ዐጸደ፡ ወይን፡ ዘሀግሪጳስ፡ በእንተ፡ ኅዳጥ፡ በለስ፡ ከመ፡ ነሀብ፡ ለድውያን፡ እለ፡ ውስተ፡ ሕዝብ። ሖርኩ፡ ውበጻሕኩ፡ ሀየ፡ ወነሣእኩ፡ ዘአዘዘኒ፡ ወተመየጥኩ፡ ውእንዘ፡ አሐውር፡ ረከብኩ፡ ዕፀ፡ ወነበርኩ፡ ታሀቴሃ፡ ከመ፡ ኣጽልል፡ እስመ፡ ጊዜ፡ ቀትር፡ ውእቱ፡ ወእምህየ፡ አስመኩ፡ ውስተ፡ ሙዳየ፡ በለስ፡ ወኖምኩ፡ ወነቂህየ፡ መሰለኒ፡ ዘጐንደይኩ፡ ወከሠትኩ፡ ዘንተ፡ ሙዳየ፡ በለስ፡ ወረከብኩ፡ እንዘ፡ ያንጸፈጽፍ፡ ሐለብ፡ በከመ፡ ነሣእክዎሙ፡ ኀሪይየ፡ ወነዋ፡ ትብል፡ አንተሰ፡ ተፄወዉ፡ ሕዝብ፡ ውስተ፡ ባቢሎን፤ ወነዋ፡ ርኢ፡ ከመ፡ ኢጸምሀየየ፡ በለሱኒ። ወክሠተ፡ ሎቱ፡ ሙዳየ፡ በለስ፡ ወአርአዮ፤ ወነጸረ፡ አረጋይ፡ ከመ፡ ሐዲስ፡ ውእቱ፡ በለስ፡ ወያንጸፈጽፍ፡ ሐሊቡ። ወሶቤሃ፡ አንከረ፡ ውእቱ፡ አረጋይ፡ ወይቤሎ፡ ለአቤሜሌክ፡ ጻድቅ፡ አንተ፡ ወልድየ፡ እስመ፡ ኢፈቀደ፡ እም፡ ላክ፡ ያርኢከ፡ ሙስናሃ፡ ለሀገር፡ ወአምጽአ፡ አምላክ፡ ኑዛዜ፡ ላዕሌከ፡ ወአህየየከ፡ ናሁ፡ ዮም፡ ስሳ፡ ወስድስቱ፡ ዓመት፡ ኮነ፡ እምአመ፡ ተፄህወዉ፡ ሕዝብ፡ ውስተ፡ ባቢሎን። ውእመ፡ ትፈቱ፡ ታእምር፡ ወትጠይቅ፡ ወልድየ፡ ነጽር፡ ወርኢ፡ ውስተ፡ ገራውህ፡ ከመ፡ ሠርጸ፡ አዝርእቲሃ፡ ወለበለስኒ፡ ከመ፡ ኢኮነ፡ ጊዜሁ፤ ወአእመረ፡ ከመ፡ ኢኮነ፡ ዘመኑ፡ ለዝ፡ ኵሉ፡ ሶቤሃ፡ አቤሜሌክ፡ ይቤ፡ በዐቢይ፡ ቃል፡ እባርከከ፡ እግዚኦ፡ አምላኪየ፤ አምላከ፡ ሰማይ፡ ውምድር፤ ዕረፍቶሙ፡ ለነፍስ፡ ጻድቃን፡ በኵሉ፡ በሓውርት። ወይቤሎ፡ ለአረጋይ፡ አይ፡ ውእቱ፡ ዝንቱ፡ ወርኅ፡ ወይቤሎ፡ ዐሡሩ፡ ወሰኑዩ፡ ለወርኀ፡ ኔሳን፡ ዘውእቱ፡ ሚያዝያ። ወእምድኅረ፡ ዝንቱ፡ ወሀቦ፡ አቤሜሌክ፡ ለዝንቱ፡ አረጋይ፡ እምዲበ፡ ዝንቱ፡ አብላስ፡ ወይቤሎ፡ አምላክ፡ ይምራሕከ፡ እንተ፡ ላዕሉ፡ ሀገረ፡ ኢየሩሳሌም።

Äthiopische Bibel (Ge'ez)