Jubiläen 20

Äthiopische Bibel (Ge'ez)

¹ ወበአርብዓ፡ ወክልኤቱ፡ ኢዮቤልዉ፡ በዓመት፡ ቀዳሚ፡ ዘሱባዔ፡ ሳብዕ፡ ጸውዐ፡ አብርሃም፡ ይስማዔልሃ፡ ወዐሠርተ፡ ወክልኤተ፡ ደቂቆ፡ ወይስሐቅሃ፡ ወክልኤሆሙ፡ ደቂቆ፡ ወስድስተ፡ ደቂቀ፡ ኬጡራ፡ ወውሉዶሙ።

² ወአዘዞሙ፡ ከመ፡ ይዕቀቡ፡ ፍኖተ፡ እግዚአብሔር፡ ከመ፡ ይግበሩ፡ ጽድቀ፡ ወያፍቅር፡ አሐዱ፡ አሐዱ፡ ቢጾ፡ ወከመ፡ ይኩኑ፡ ከማሁ፡ በውስተ፡ ኵሉ፡ ፀብእ፡ ከመ፡ ይሖሩ፡ ዲበ፡ አሐዱ፡ ላዕሌሆሙ፡ ወለገቢረ፡ ፍትሕ፡ ወጽድቅ፡ በዲበ፡ ምድር።

³ ከመ፡ ይክስቡ፡ ውሉዶሙ፡ በኪዳን፡ እንተ፡ ተካየደ፡ ምስሌሆሙ፡ ወከመ፡ ኢይትዐደዉ፡ የማነ፡ ወፀጋመ፡ እምኵሎን፡ ፍናዌ፡ ዘአዘዘነ፡ እግዚአብሔር፡ ወከመ፡ ንትዐቀብ፡ እምኵሉ፡ ዝሙት፡ ወርኵስ፡ ወከመ፡ ንኅድግ፡ እማእከሌነ፡ ኵሎ፡ ርኵሰ፡ ወዝሙተ።

⁴ ወእመ፡ ዘመወት፡ ለክሙ፡ ኵላ፡ ብእሲት፡ ወእመኒ፡ ወለት፡ አውዕይዋ፡ በእሳት፡ ወኢይዘምዋ፡ ድኅረ፡ አዕይንቲሆን፡ ወልቦንሂ፡ ከመ፡ ይንሥኡ፡ ሎሙ፡ ብእሲተ፡ እምነ፡ አዋልደ፡ ከናአን፡ እስመ፡ ይሤሮ፡ ዘርአ፡ ከናአን፡ እምድር።

⁵ ወነገሮሙ፡ ኵነኔሆሙ፡ ለረዐይት፡ ወኵነኔ፡ ሰዶም፡ ከመ፡ ተኰነኑ፡ በእንተ፡ እከዮሙ፡ በእንተ፡ ዝሙት፡ ወርኵስ፡ ወሙስና፡ በበይናቲሆሙ፡ በዝሙት፡ ሞቱ።

⁶ ወአንትሙኒ፡ ተዐቀቡ፡ እምኵሉ፡ ዝሙት፡ ወርኵስ፡ ወእምኵሉ፡ ግማኔ፡ ኀጢአት፡ ከመ፡ ኢተሀቡ፡ ስመነ፡ ለመርገም፡ ወኵሎ፡ ሕይወተክሙ፡ ለትምክሕት፡ ወኵሎ፡ ውሉደክሙ፡ ለሙስና፡ በሰይፍ፡ ወትከውኑ፡ ርጉማነ፡ ከመ፡ ሰዶም፡ ወኵሉ፡ ተረፍክሙ፡ ከመ፡ ውሉደ፡ ገሞራ።

⁷ አነ፡ አሰምዕ፡ ለክሙ፡ ውሉድየ፡ አፍቅርዎ፡ ለአምላከ፡ ሰማይ፡ ወተፀመዱ፡ ኵሎ፡ ትእዛዞ፡ ወኢትሖሩ፡ ድኅረ፡ ጣዖቶሙ፡ ወድኅረ፡ ርኵሶሙ።

⁸ ወአማልክተ፡ ስብኮ፡ ኢትግበሩ፡ ለክሙ፡ ወግልፈዋተ፡ እስመ፡ ከንቱ፡ ውእቱ።

⁹ አላ፡ አምልኩ፡ አምላከ፡ ልዑለ፡ ወስግዱ፡ ሎቱ፡ ወትረ፡ ወተሰፈዉ፡ ገጸ፡ ዚአሁ፡ በኵሉ፡ ጊዜ፡ ወግብሩ፡ ጽድቀ፡ ወርትዐ፡ በቅድሜሁ፡ ከመ፡ ይፍተው፡ ላዕሌክሙ፡ ወየሀብክሙ፡ ምሕረቶ፡ ወያውርድ፡ ለክሙ፡ ዝናመ፡ ነግህ፡ ወሰርክ።

¹⁰ ወትከውን፡ ለበረከት፡ በዲበ፡ ምድር፡ ወይፈትዉክሙ፡ ኵሎሙ፡ አሕዛበ፡ ምድር።

¹¹ ወወሀቦ፡ ለይስማዔል፡ ወለውሉዱ፡ ወለውሉደ፡ ኬጡራ፡ ሀብተ፡ ወፈነዎሙ፡ እምይስሐቅ፡ ወልዱ፡ ወኵሎ፡ ወሀቦ፡ ለይስሐቅ፡ ወልዱ።

¹² ወሖረ፡ ይስማዔል፡ ወውሉዱ፡ ወውሉደ፡ ኬጡራ፡ ወውሉዶሙ፡ ኅቡረ፡ ወኀደሩ፡ እምፋርሞን፡ እስከ፡ ምብዋአ፡ ባቢሎን፡ ውስተ፡ ኵሉ፡ ምድር፡ እንተ፡ ገጸ፡ ጽባሕ፡ አንጻረ፡ ገዳም።

¹³ ወተደመሩ፡ እሉ፡ ምስለ፡ እሉ፡ ወተጸውዐ፡ ስሞሙ፡ ዐረብ፡ ወእስማዔላዊያን።