Messale 12

Äthiopische Bibel (Ge'ez)

¹ ዘያፈቅር፡ ተግሣፀ፡ ያፈቅር፡ አእምሮ፡ ወዘይጸልእሰ፡ ተግሣፀ፡ ዓብድ፡ ውእቱ።

² ይኄይስ፡ ዘረከበ፡ ሞገሰ፡ በኀበ፡ እግዚአብሔር፡ ወብእሲስ፡ ዓማፂ፡ ይትኄየይ።

³ ዘኢያረትዕ፡ ሰብእ፡ እምዓመፃ፡ ይትኀጐል፡ ወሥርወ፡ ጻድቃንሰ፡ ኢይትመሐው።

⁴ ብእሲት፡ አዛዝ፡ አክሊል፡ ለምታ፡ ወከመ፡ ዕፄ፡ ለዕፅ፡ ከማሁ፡ ብእሲት፡ እኪተ፡ ምግባር፡ ታኀጒል፡ ልበ፡ ብእሲ።

⁵ ሕሊናሆሙ፡ ለጻድቃን፡ ፍትሕ፡ ወይሔድፉ፡ ረሲዓን፡ ሕብለ።

⁶ ነገረ፡ ረሲዓን፡ ጒሕሉት፡ ወአፈ፡ ረሲዓንሰ፡ ታድኅኖሙ።

⁷ ኀበ፡ ተመይጠ፡ ረሲዕ፡ ይማስን፡ አብያተ፡ ጻድቃንሰ፡ ይሄልዉ።

⁸ አፈ፡ ጠቢብ፡ ይትዌደስ፡ በኀበ፡ ኵሉ፡ ሰብእ፡ ወእዩየ፡ ልብሰ፡ ይትሜነን።

⁹ ይኄይስ፡ ብእሲ፡ ዘበኃሣሩ፡ ይትቀነይ፡ እምነ፡ ዘያነብር፡ ክብረ፡ ሎቱ፡ ወይትፈአም፡ ኅብስተ።

¹⁰ ይምሕር፡ ጻድቅ፡ ነፍሰ፡ እንስሳሁ፡ ወምሕረቶሙሰ፡ ለረሲዓን፡ ኢ፡ ምጽዋት።

¹¹ ዘይትጌበራ፡ ለምድር፡ ያበዝኅ፡ ኅብስተ፡ ወዘሰ፡ ይዴግን፡ ጽርዓተ፡ ያስተጋብእ፡ ንዴተ፡ እስመ፡ ውእቱ፡ ነዳየ፡ አእምሮ።

¹² ዝ፡ ውእቱ፡ ምዑዝ፡ ለመትልወ፡ ወይን፡ ወበኀይለ፡ ዚአሁ፡ የኃድግ፡ ኃሣረ።

¹³ ፍትወተ፡ ረሲዓን፡ እኪት፡ ወሥርዎሙሰ፡ ለኄራን፡ ውስተ፡ ጽንዕ።

¹⁴ በኃጢአተ፡ ከናፍሪሁ፡ ይወድቅ፡ ኃጥእ፡ ውስተ፡ መሥገርት፡ ወያመሥጥ፡ እምኔሁ፡ ጻድቅ።

¹⁵ ዘይኔጽር፡ ሰፉሐ፡ ይትሜሀር፡ ወዘሰ፡ ይዳደቅ፡ በአናቅጽ፡ ያመነድብ፡ ነፍሳተ።

¹⁶ እምፍሬ፡ አፉሁ፡ ነፍሰ፡ ብእሲ፡ ይመልእ፡ በረከተ፡ ወዕሤተ፡ ከናፍሪሁ፡ ይትወሀብ፡ ሎቱ።

¹⁷ ፍኖተ፡ ዓብዳን፡ ርቱዕ፡ በቅድሜሆሙ፡ ወይሰምዕ፡ ምክረ፡ ዕዝነ፡ ጠቢብ።

¹⁸ ዓብድ፡ እንተ፡ ጸብሐት፡ ይነግር፡ መዓቶ፡ ማእምርሰ፡ የኀብእ፡ ኃሣሮ።

¹⁹ እንተ፡ ታስተርኢ፡ ሃይማኖተ፡ ይነግር፡ ብእሲ፡ ጻድቅ፡ ወሰማዕተ፡ እኩያንሰ፡ ሕብል።

²⁰ እለሰ፡ ይከውኑ፡ ስምዐ፡ በሐሰት፡ ይቀትሉ፡ በመጥባሕት፡ እስመ፡ ንቡር፡ ውስተ፡ አፉሆሙ፡ መጥባሕት፡ ወልሳነ፡ ጠቢባንሰ፡ ይፌውስ፡ ዘቈስለ።

²¹ ከናፍረ፡ ጻድቃን፡ ያረትዓ፡ ስምዐ፡ ወሰማዕት፡ ጒጒዕ፡ በልሳን፡ እኩይ።

²² ሕብል፡ ውስተ፡ ልቡ፡ ለዘይሔሊ፡ እኩየ፡ ወእለሰ፡ ይፈቅዱ፡ ሰላመ፡ ይትፌሥሑ።

²³ ኢያሠምሮ፡ ለጻድቃን፡ ምንትኒ፡ እኩይ፡ ወረሲዓንሰ፡ ያበዝኁ፡ እከየ።

²⁴ ምኑናት፡ በኀበ፡ እግዚአብሔር፡ ከናፍረ፡ ሐሰት፡ ወዘይገብርሰ፡ ሃይማኖተ፡ ሥሙር፡ በኀቤሁ።

²⁵ ብእሲ፡ ማእምር፡ መንበረ፡ ጥበብ፡ ወልበ፡ ዓብዳንሰ፡ ይዳደቅ፡ መርገመ።

²⁶ እደ፡ ኅሩያን፡ ይእኅዝ፡ ፍጡነ፡ ወሕቡላንሰ፡ ይከውኑ፡ ለፂዋዌ።

²⁷ መደንግፅ፡ ቃል፡ የሀውከ፡ ልበ፡ ብእሲ፡ ጻድቅ፡ ወዜና፡ ሠናይሰ፡ ያስተፌሥሕ፡ ልበ፡ ብእሲ፡ ጠቢብ።

²⁸ ማእምረ፡ ርእሱ፡ ጻድቅ፡ ውእቱ፡ ለርእሱ፡ ወግዕዞሙሰ፡ ለረሲዓን፡ አኮ፡ አዳም።

²⁹ ለአላ፡ ይኤብሱ፡ ይዴግኖሙ፡ እኩይ፡ ወፍኖቶሙሰ፡ ለረሲዓን፡ ታስሕቶሙ።

³⁰ ይዳደቅ፡ ሕብል፡ ለአስግሮ፡ ጥሪት፡ ወክቡር፡ ብእሲ፡ ንጹሕ።

³¹ ውስተ፡ ፍናወ፡ ጽድቅ፡ ሕይወት፡ ወእለሰ፡ ይዜከሩ፡ እኩየ፡ ውስተ፡ ሞት፡ ይሄልዉ።