Messale 17

Äthiopische Bibel (Ge'ez)

¹ ይኄይስ፡ ፍት፡ ጥዑም፡ ምስለ፡ ሰላም፡ እምቤት፡ ዘምሉእ፡ ብዙኀ፡ ሠናያተ፡ ወእምዘ፡ ዓመፃ፡ ጥብሕ፡ ምስለ፡ ጋእዝ።

² ገብር፡ ጠቢብ፡ ይሜብል፡ አጋእዝተ፡ ዐብዳነ፡ ወምስለ፡ እኃው፡ ይትካፈል፡ ርስተ።

³ በከመ፡ ይትፈተን፡ ወርቅ፡ ወብሩር፡ በከውር፡ ከማሁ፡ ኅሩያነ፡ ልብ፡ በኀበ፡ እግዚአብሔር።

⁴ እኩየ፡ ያሠምዕ፡ ልሳኖሙ፡ ለእለ፡ ዘእንበለ፡ ሕግ፡ ጻድቅሰ፡ ኢይኔፅር፡ ከናፍረ፡ ሐሰት።

⁵ ለምእመን፡ ኵሉ፡ ዘበዓለም፡ ንዋዩ፡ ወለዘኢምእመንሰ፡ ኢፀሪቅ፡ ሎቱ።

⁶ ዘይስሕቆ፡ ለነዳይ፡ ይዌህኮ፡ ለፈጣሪሁ፡ ወዘይትፌሣሕ፡ ላዕለ፡ ዘይትኀጐል፡ ኢይድኅን፡ ወዘይምሕርሰ፡ ይትሜሐር።

⁷ አክሊሎሙ፡ ለአእሩግ፡ ውሉደ፡ ውሉድ፡ ወምክሖሙ፡ ለውሉድ፡ አበዊሆሙ።

⁸ ኢይትዋደዶ፡ ለዐብድ፡ ከናፍረ፡ ወሃይምንት፡ ወኢጻድቅ፡ ከናፍረ፡ ሐሰት።

⁹ ዓስበ፡ ሞገስ፡ ትምህርት፡ ለእለ፡ አጥረይዋ፡ ኀበ፡ ተመይጠ፡ ታሤኒ፡ ፍኖቶ።

¹⁰ ዘየኀብእ፡ አበሳሁ፡ ይፈቅድ፡ ዕርቀ፡ ወዘይጸልእሰ፡ ኀቢአ፡ ይሌሊ፡ አዕርክተ፡ ወሰብአ፡ ቤት።

¹¹ የኃዝን፡ ትምክሕት፡ ልበ፡ ጠቢብ፡ ወዐብድሰ፡ ተቀሢፎ፡ ኢይትዓወቆ፡ ቅሥፈቱ።

¹² ቅስተ፡ ያነሥእ፡ ኵሉ፡ እኩይ፡ ወእግዚአብሔር፡ ይፌኑ፡ መልአኮ፡ ዘእንበለ፡ ምሕረት፡ ቦቱ።

¹³ ይወድቅ፡ ብእሲ፡ ማእምር፡ ውስተ፡ ትካዝ፡ ወዐብዳንሰ፡ ይሔልዩ፡ እኩየ።

¹⁴ ዘየዓሢ፡ እኩየ፡ ህየንተ፡ ሠናይ፡ ኢያንቀለቅል፡ እኩይ፡ እምነ፡ ቤቱ።

¹⁵ ዐፂወ፡ ማይ፡ ቀዳሜ፡ ጽልእ፡ ወመኰንና፡ ለንዴት፡ ጋእዝ፡ ወባእስ፡ ሥልጣነ፡ ነገር፡ ይሁብ፡ ቀዳሜ፡ ጽድቅ።

¹⁶ ዘከመ፡ ጻድቅ፡ ይኰንኖ፡ ለኃጥእ፡ ወዘከመ፡ ኃጥእ፡ ለጻድቅ፡ ርኩስ፡ ምኑን፡ በኀበ፡ እግዚአብሔር።

¹⁷ ለምንት፡ ጥሪት፡ ለዐብድ፡ አጥርዮታ፡ ለጥበብ፡ ዘእንበለ፡ ልብ፡ ኢይትከሀል።

¹⁸ ዘያነውኅ፡ ቤቶ፡ የኃሥሥ፡ ቅጥቃጤ፡ ለርእሱ፡ ወዘያስተዓፅብ፡ ለተምህሮ፡ ይወድቅ፡ ውስተ፡ አኪት።

¹⁹ በኵሉ፡ ጊዜ፡ አጥሪ፡ ዓርከ፡ ወአኃወ፡ በምንዳቤ፡ በቋፅያነ፡ ይከውኑ፡ እስመ፡ በእንተዝ፡ ይትወለዱ።

²⁰ ብእሲ፡ ዓብድ፡ ይጠፍሕ፡ እዴሁ፡ ወይትኀሠይ፡ በርእሱ፡ ከመ፡ ዘይትሀበይ፡ ህቢተ፡ ለዐርኩ።

²¹ መፍቀሬ፡ ጋእዝ፡ ይትፌሣሕ፡ በባእስ፡ ወጽኑዐ፡ ልብሰ፡ ኢይዳደቅ፡ ሠናየ።

²² ብእሲ፡ መያጤ፡ ልሳን፡ ይወድቅ፡ ውስተ፡ እኪት፡ ወልበ፡ ዐብድሰ፡ ኃዘን፡ ለዘአጥረያ።

²³ ኢይትፌሣሕ፡ አብ፡ በወልድ፡ ዘእንበለ፡ ትምህርት፡ ወልድ፡ ጠቢብ፡ ያስተፌሥሕ፡ እሞ።

²⁴ ልብ፡ ፍሥሕት፡ ሠናየ፡ ትገብር፡ ብእሲ፡ ኃዛኒ፡ ያየብስ፡ አዕፅምቲሁ።

²⁵ ዘይነሥእ፡ ሕልያነ፡ ውስተ፡ ኅፅኑ፡ በዓመፃ፡ ኢያረትዕ፡ ፍትሐ፡ ወረሲዕሰ፡ ይትገኀሥ፡ እምፍናወ፡ ጻድቃን።

²⁶ ገጹ፡ ማእምር፡ ለብእሲ፡ ጠቢብ፡ ወአዕይንቲሁ፡ ለዓብድ፡ ውስተ፡ ከተማ፡ ምድር፡ አዕይንቲሁሰ፡ ለጠቢብ፡ ዲበ፡ ርእሱ።

²⁷ መዓት፡ ለአብ፡ ዐብድ፡ ውሉድ፡ ወኃዘን፡ ለእንተ፡ ወለደቶ።

²⁸ አኅሥሮቱ፡ ለጻድቅ፡ ብእሲ፡ አኮ፡ ሠናይ፡ ወአኮ፡ ሠናይ፡ ለመኳንንተ፡ ጽድቅ፡ ሐቢል።

²⁹ ዘይምህክ፡ አውፅኦ፡ ቃለ፡ ንቁጸ፡ ማእምር፡ ውእቱ፡ ወመስተዓግሥ፡ ብእሲ፡ ጠቢብ።

³⁰ ዓብድ፡ ለእመ፡ ተሰአለ፡ ጥበበ፡ ይከውኖ፡ በአርምሞሰ፡ ወበተሐክሞ፡ ይመስል፡ ጠቢበ።