Messale 2

Äthiopische Bibel (Ge'ez)

¹ ወልድየ፡ ለእመ፡ ተወከፍከ፡ ቃለ፡ ትእዛዝ፡ ዘዚአየ፡ ወኀባ፡ እከ፡ በልብከ።

² ትሰምዕ፡ ዕዝንከ፡ ጥበበ፡ ወትሁብ፡ ልብከ፡ ለአእምሮ፡ ወታቀርብ፡ ለተግሣፅ፡ ልበከ።

³ ወለእመኒ፡ ለጥበብ፡ ጸዋዕከ፡ ወለአእምሮ፡ ወሀብከ፡ ቃለከ፡ ወለለብዎ፡ ኃሠሥከ፡ በዓቢይ፡ ግብር።

⁴ ወለእመኒ፡ ኃሠሥካ፡ ከመ፡ ብሩር፡ ወከመ፡ መድፍን፡ ፈተንካ።

⁵ አሜሃ፡ ተአምር፡ ፈሪሀ፡ እግዚአብሄር፡ ወጠይቆ፡ እግዚአብሔር፡ ትረክብ።

⁶ እስመ፡ እግዚአብሔር፡ ይሁብ፡ ጥበበ፡ ወእምቅድመ፡ ገጹ፡ ለብዎ፡ ወአእምሮ።

⁷ ወይዘግብ፡ ሎሙ፡ ለእለ፡ ይገብሩ፡ መድኃኒተ፡ ወቃውም፡ ለፍኖቶሙ፡ ከመ፡ ፍኖተ፡ ጽድቅ፡ ወፍኖተ፡ እለ፡ ይፈርህዎ፡ የዓቅብ።

⁸ አሜሃ፡ ተአምር፡ ፍትሐ፡ ወጽድቀ፡ ወታረትዕ፡ መንኰራኵረ፡ ሠናያተ።

⁹ እስመ፡ እመ፡ መጽአት፡ ጥበብ፡ ውስተ፡ ሕሊና፡ ዚአከ፡ ወአእምሮ፡ ለነፍሰ፡ ዚአከ፡ ሠናይተ፡ ኮነት።

¹⁰ በምክር፡ ሠናይ፡ ተዓቅበከ፡ ወበሕሊና፡ ጽድቅ፡ ትከድነከ።

¹¹ ከመ፡ ታድኅንከ፡ እምፎኖት፡ እኪት፡ ወእምብእሲ፡ ዘኢይነብብ፡ ወኢምንተኒ፡ ህልወ፡ ቃለ።

¹² ወይ፡ ሎሙ፡ ለእለ፡ የኀድጉ፡ ፍናወ፡ ርቱዓተ፡ ከመ፡ ይሑሩ፡ በፍናወ፡ ጽልመት።

¹³ ወእለ፡ ይትፌሥሑ፡ ብእኩይ፡ ወእለ፡ ይትኃሠዩ፡ በሚጠተ፡ እኪት።

¹⁴ እለ፡ ፍናዊሆሙ፡ መብእስ፡ ወደጋን፡ መንኰራኵሮሙ፡ ከመ፡ ያርኅቁከ፡ እምፍኖት፡ ርትዕ፡ ወነኪር፡ እምፍኖተ፡ አእምሮተ፡ ጽድቅ።

¹⁵ ወልድየ፡ ኢትርከብከ፡ ምክር፡ እኪት፡ እንተ፡ ታኃድግ፡ ተምህርተ፡ በውርዙትከ።

¹⁶ ወልድየ፡ ዕቀብ፡ ቃልየ፡ ከመ፡ ይባልሕከ፡ እምብእሲት፡ እኪት፡ ወነኪርት፡ እንተ፡ ቃላ፡ ትምይንት፡ ዘኃደገት፡ ምታ፡ ዘንእሳ፡ ወሥርዓተ፡ እግዚአብሔር፡ እንተ፡ ረስዓት።

¹⁷ ወአንበረት፡ ኀበ፡ ሞት፡ ወኀበ፡ ሶኦል፡ ወምስለ፡ ኃያላን፡ እምድር፡ አርትዓት፡ መንኰራኵራ።

¹⁸ ኵሎሙ፡ እለ፡ የሐውሩ፡ ባቲ፡ ኢይትመየጡ፡ ወኢይረክቡ፡ ፍናወ፡ ርቱዓተ፡ ወኢይትረከቡ፡ በዓመተ፡ ሕይወት።

¹⁹ ሶበሰ፡ የሐውሩ፡ ፍናወ፡ ርቱዓተ፡ እምረከቡ፡ ፍናወ፡ ጽድቅ፡ ልሙፃተ፡ ኄራነ፡ ይከውኑ፡ እለ፡ ይነብሩ፡ ዲበ፡ ምድር፡ ወየዋሃን፡ ይተርፉ፡ ውስቴታ።

²⁰ እስመ፡ ራትዓን፡ የኃድርዋ፡ ለምድር፡ ወጻድቃን፡ ይተርፉ፡ ውስቴታ።

²¹ ፍናወ፡ ረሲዓን፡ እምድር፡ ይሤረዋ፡ ወዓማፅያንሰ፡ ይሰደዱ፡ እምውስቴታ።