Messale 21

Äthiopische Bibel (Ge'ez)

¹ ከመ፡ ውሒዘ፡ ማይ፡ ከማሁ፡ ልበ፡ ንጉሥ፡ ውስተ፡ እደ፡ እግዚአብሔር፡ ኀበ፡ ፈቀደ፡ ይመይጣ፡ ወህየ፡ ትመሲ።

² ኵሉ፡ ብእሲ፡ ያስተርኢ፡ ለርእሱ፡ ጻድቀ፡ ወያረትዕ፡ እግዚአብሔር፡ አልባበ።

³ ገቢረ፡ ጽድቅ፡ ህልው፡ ወሥሙር፡ በኀበ፡ እግዚአብሔር፡ ፈድፋደ፡ እምዘቢሐ፡ መሥዋዕት።

⁴ ዓቢይ፡ ሕሊና፡ ኢጐጒዖ፡ ልብ፡ ለጽእለት፡ ወብርሃኖሙ፡ ለረሲዓን፡ ኃጢአት።

⁵ ዘይትቀነይ፡ መዝገበ፡ ልሳነ፡ ሐሰት፡ ከንቶ፡ ይዴግን፡ ወያበጽሖ፡ ውስተ፡ መሥገርተ፡ ሞት።

⁶ ሥራዌ፡ ረሲዓን፡ ይትነገድ፡ እምርኁቅ፡ እስመ፡ ኢይፈቅዱ፡ ይግበሩ፡ ጽድቀ።

⁷ ለዕልዋን፡ ዕልወ፡ ፍኖተ፡ ይፌኑ፡ ሎሙ፡ እግዚአብሔር፡ እስመ፡ ርቱዕ፡ ወንጹሕ፡ ምግባሩ።

⁸ ይኄይስ፡ ነቢር፡ ውስተ፡ ማዕዘንት፡ ዘኢኮነ፡ ጥፉረ፡ እምነ፡ ቢር፡ ምስለ፡ ብእሲት፡ መግዝእት፡ ውስተ፡ ቤት፡ ምሩግ።

⁹ ነፍሰ፡ ረሲዓን፡ ኢትትመሐር፡ ወኢ፡ በኀበ፡ አሐዱሂ፡ ሰብእ።

¹⁰ እንዘ፡ የኃሥር፡ ጸዋግ፡ ማእምረ፡ ይከውን፡ የዋህ፡ ወዘይጤቅስ፡ ጥበበ፡ ይትዌከፍ፡ አእምሮ።

¹¹ ኢየአምር፡ ጥበበ፡ ልበ፡ ረሲዓን፡ ወየአክዮሙ፡ ለረሲዓን፡ እከይ።

¹² ዘይፌፅም፡ ዕዘኒሁ፡ ከመ፡ ኢይስማዕ፡ ነዳያነ፡ ውእቱኒ፡ ይጼውእ፡ ወአልቦ፡ ዘይሰምዖ።

¹³ ሀብት፡ ዘበጽሚት፡ ይገፍዕ፡ መዓተ፡ ወዘሰ፡ ይምህክ፡ ሀብተ፡ ያነሥእ፡ ጽኑዐ፡ መዓተ።

¹⁴ ፍሥሐ፡ ጻድቃን፡ ገቢረ፡ ፍትሕ፡ ወጻድቅ፡ ባሕቱ፡ ርኩስ፡ በኀበ፡ እኩያነ፡ ምግባር።

¹⁵ ብእሲ፡ ዘይስሕት፡ እምፍኖተ፡ ጽድቅ፡ ውስተ፡ ማሕበረ፡ ረሲዓን፡ የዓርፍ።

¹⁶ ብእሲ፡ ጽኑዕ፡ ያፈቅር፡ ፍሥሐ፡ ወዘያፈቅር፡ ወይነ፡ ወቅብዐ፡ ኢይብዕል።

¹⁷ ምኑን፡ ኃጥእ፡ በኀበ፡ ጻድቅ፡ ወቤዛሁ፡ ለጻድቅ፡ ይትወሀብ፡ ረሲዕ።

¹⁸ ይኄይስ፡ ነቢር፡ ውስተ፡ ገዳም፡ እምነቢር፡ ምስለ፡ ብእሲት፡ መግዝእት፡ ወነባቢት፡ ወመዓትምት።

¹⁹ መዝገብ፡ መፍትው፡ ውስተ፡ አፈ፡ ጠቢባን፡ ዐብዳንሰ፡ ሰብእ፡ የኃጥእዎ።

²⁰ ዘይዴግን፡ ፍኖተ፡ ጽድቅ፡ ወሕይወት፡ ይረክብ፡ ክብረ፡ ወሕይወተ።

²¹ ለሀገር፡ ጽንዕት፡ ቦአ፡ ጠቢብ፡ ወነሠተ፡ ጽንዐ፡ በዘይትዌከሉ፡ ረሲዓን።

²² ዘየዐቅብ፡ አፉሁ፡ ወልሳኖ፡ ይትመኀፀና፡ ለነፍሱ፡ እምንዳቤ።

²³ ጒጒዕ፡ ወመግዝእ፡ ወነባቢ፡ ብድብድ፡ ስሙ፡ ወዘይዜክርሰ፡ እከየ፡ ኃጥእ፡ ውእቱ።

²⁴ ፍትወት፡ ይቀትላሁ፡ ለሀካይ፡ እስመ፡ ኢይፈቅድ፡ እደዊሁ፡ ይግበራ፡ ምንተኒ።

²⁵ ረሲዕ፡ ይፈቅድ፡ ወይፈቱ፡ ኵላ፡ ዕለተ፡ ፍትወተ፡ እኪተ፡ ጻድቅሰ፡ ይምሕር፡ ወይመጸውት፡ ኵሎ፡ አእሚሮ።

²⁶ መሥዋዕተ፡ ረሲዓን፡ ምኑን፡ በኀበ፡ እግዚአብሔር፡ እስመ፡ በእከይ፡ ያቀርብዎ።

²⁷ ሰማዕተ፡ ሐሰት፡ ይትኃጐል፡ ወብእሲሰ፡ ሰማዒ፡ ዕቁበ፡ ይትናገር።

²⁸ ረሲዕ፡ ብእሲ፡ ዘእንበለ፡ ኃፍረት፡ ይትቃወም፡ ለገጽ፡ ወራትዕሰ፡ ይጤይቅ፡ ፍኖቶ።

²⁹ አልቦ፡ ጥበብ፡ ወአልቦ፡ እዘዝ፡ በኀበ፡ ዐብድ፡ ወአልቦ፡ ምክር፡ በኀበ፡ ረሲዕ።

³⁰ ፈረሰ፡ ያስተዳልዉ፡ ለዕለተ፡ ጸብእ፡ ረድኤትሰ፡ እምኀበ፡ እግዚአብሔር፡ ይከውን።