Messale 24

Äthiopische Bibel (Ge'ez)

¹ ወልድየ፡ ኢትትቀሐው፡ ምስለ፡ ሰብእ፡ እኩያን፡ ወኢትፍቱ፡ ሀልዎ፡ ምስሌሆሙ።

² እስመ፡ ሐሰተ፡ ይትሜሀር፡ ልቦሙ፡ ወሕመሜ፡ ይትናገር፡ አፉሆሙ።

³ ምስለ፡ ጥበብ፡ ይትሐነጽ፡ ቤት፡ ወምስለ፡ አእምሮ፡ ይትነሣእ።

⁴ ወምስለ፡ ጠይቆ፡ ይመልእ፡ መዛግብተ፡ ኵሉ፡ ክብር፡ ወብዕል፡ ሠናይ።

⁵ ይኄይስ፡ ጠቢብ፡ እምጽኑዕ፡ ወብእሲ፡ ዘቦ፡ አእምሮ፡ እምወፍር፡ ዓቢይ።

⁶ በሕዳፌ፡ ይከውን፡ ጸብእ፡ ወረድኤትሰ፡ ዘምስለ፡ ልብ፡ መካሪት።

⁷ ጥበብ፡ ወአእምሮ፡ ሠናይ፡ ውስተ፡ አንቀጸ፡ ጠበብት፡ ይትረከብ፡ ወጠበብት፡ ኢይትገኀሡ፡ እምቃለ፡ እግዚአብሔር፡ አላ፡ ይሄልዉ፡ በማኅበር።

⁸ ለዐብዳን፡ ይዳደቆሙ፡ ሞት።

⁹ ይመውት፡ ዓብድ፡ በኃጣውእ።

¹⁰ ርኵሱ፡ ለብእሲ፡ ቀታሊ፡ ያጠልቆ፡ በዕለት፡ እኪት።

¹¹ ወበዕለተ፡ ምንዳቤ፡ እስመ፡ የኃልቅ፡ አድኅን፡ እለ፡ ይሰሐቡ፡ ውስተ፡ ሞት፡ ወተሣይጦ፡ ዘይትቀተል፡ ኢትምሃክ።

¹² ወእመሰ፡ ትቤ፡ ኢየአምሮ፡ ለዝ፡ አእምር፡ ከመ፡ እግዚአብሔር፡ የአምር፡ ልበ፡ ኵሉ፡ ወዘገብረ፡ እስታንፋሰ፡ ለኵሉ፡ ውእቱ፡ የአምር፡ ኵሎ፡ ወይፈድዮ፡ ለኵሉ፡ በከመ፡ ምግባሩ።

¹³ ብላዕ፡ መዓረ፡ ወልድየ፡ እስመ፡ ሠናይ፡ ዐቃውዕ፡ ከመ፡ ያምዓርዕሮ፡ ለጒርዔከ።

¹⁴ ከማሁ፡ ተመሀር፡ ጥበበ፡ ወአእምሮ፡ ለእመ፡ ረከብከ፡ ወይነ፡ ሠናየ፡ ይከውን፡ ሞትከ፡ ወተስፋከ፡ ኢየኀድገከ።

¹⁵ ወኢታብእ፡ ረሲዓነ፡ ውስተ፡ መካነ፡ ጻድቃን፡ ወኢትስማሐት፡ በጽጋበ፡ ከርሥከ።

¹⁶ ስብዐ፡ ይወድቅ፡ ጻድቅ፡ ወስብዐ፡ ይትነሣእ፡ ወረሲዓንሰ፡ ይደውዩ፡ በእኩይ።

¹⁷ ለእመ፡ ወድቀ፡ ጸላኢከ፡ ኢትትፈሣሕ፡ ቦቱ፡ ወበተዓቅፎቱ፡ ኢትትዓበይ።

¹⁸ እስመ፡ ይሬኢ፡ እግዚአብሔር፡ ወኢይኤድሞ፡ ወይመይጥ፡ መዓቶ፡ እምኔሁ።

¹⁹ ኢትትፈሣሕ፡ በገበርተ፡ እክይ፡ ወኢትቅናእ፡ ላዕለ፡ እኩያን።

²⁰ እስመ፡ ኢይከውን፡ ዘመን፡ ለእኩያን፡ ወብርሃነ፡ ረሲዓን፡ ይጠፍእ።

²¹ ወልድየ፡ ፍርሆ፡ ለእግዚአብሔር፡ ወለንጉሥኒ፡ ወኢበአሐዱ፡ እምኔሆሙ፡ ኢትትዓበይ።

²² እስመ፡ እሙንቱ፡ ግብተ፡ ይትቤቀልዎሙ፡ ለረሲዓን፡ ወኵነኔ፡ ክልኤሆሙ፡ መኑ፡ የአምር።

²³ ቃለ፡ ዘየዓቅብ፡ ወልድ፡ ርኁቅ፡ ውእቱ፡ እምተኀጒሎ፡ ወዘሰ፡ ይትዌከፎ፡ ሎቱኒ፡ ይትዌከፎ።

²⁴ ምንትኒ፡ ሐሰት፡ እምልሳን፡ ንጉሥ፡ ኢይትበሀል፡ ወአልቦ፡ ኀሰት፡ እምልሳኑ፡ ዘይወፅእ።

²⁵ ወጥባሕተ፡ ቃለ፡ ንጉሥ፡ ወአኮ፡ እንተ፡ አባል፡ ለዘተውህበት፡ ትቀጥቅጦ።

²⁶ ወእመሰ፡ ተስሕለት፡ ሰይፈ፡ መዓቱ፡ ምስለ፡ ሥረዊሁ፡ ሰብአ፡ ታኀልቅ፡ ወአፅምተ፡ ሰብእ፡ ታኀቂ፡ ወታውዒ፡ ከመ፡ ነበልባል፡ እስመ፡ አመ፡ ኢይትበላዕ፡ እምእጒለ፡ አንስርት።

²⁷ ወልድየ፡ ዘዚአየ፡ ነገረ፡ ፍራህ፡ ወተወከፎ፡ ወነስሕ፡ ዘንተ፡ እቤ፡ ለእለ፡ አምኑ፡ በእግዚአብሔር፡ ወፈጸምኩ።

²⁸ እስመ፡ አነ፡ ዐብድ፡ እምኵሉ፡ ወጥበበ፡ ሰብእኒ፡ ኢሀሎ፡ ኀቤየ።

²⁹ ወእግዚአብሔር፡ ወሀበኒ፡ ጥበበ፡ ወአእምሮ፡ ቅዱሳን፡ አእመርኩ።