Tagsas 3

Äthiopische Bibel (Ge'ez)

¹ ወኢትትዓበይ፡ ዘለጌሠም፡ እስመ፡ ኢተአምር፡ ዘትወልድ፡ ሣኒታ።

² ይወድስከ፡ አፈ፡ ባዕድ፡ ወአኮ፡ አፈ፡ ዚአከ።

³ ክቡድ፡ እብን፡ ወጽንጉፍ፡ ዖረ፡ ኆፃ፡ ወመዓቱ፡ ለብእሲ፡ ዓብድ፡ ይከብድ፡ እምክልኤሆሙ።

⁴ አልቦ፡ ምሕረት፡ ለብእሲ፡ ቊጡዕ፡ ወለበሊሐ፡ መዓት፡ ወአልቦ፡ ዘይትዔረዮ፡ ለቅንአት።

⁵ ወይኄይስ፡ ዘለፋ፡ ክሡት፡ እምኅቡእ፡ ፍቅር፡ ይኄይስ፡ ፍቅዓት፡ ዘዓርክ፡ እምሠናይ፡ ስዕመተ፡ ጸላኢ።

⁶ ነፍስ፡ ጽግብት፡ ጸቃውዐ፡ መዓር፡ ትሜንን፡ ወለነፍስሰ፡ ርኅብት፡ መሪርኒ፡ ጥዑመ፡ ያስተርእያ።

⁷ ከመ፡ ዖፍ፡ እንተ፡ ትሠርር፡ እማኅደራ፡ ከማሁ፡ ብእሲ፡ ይትቀነይ፡ ሶበ፡ ይነግድ፡ እምብሔሩ።

⁸ ዕፍረት፡ ወዕጣን፡ ወወይን፡ ያስተሔውዙ፡ ልበ፡ ከማሁ፡ ዘይሰምዕ፡ ምክረ፡ ዓርኩ፡ ወትትከዐው፡ በድቀተ፡ ነፍሱ።

⁹ ዓርክከ፡ ወዓርከ፡ አቡከ፡ ኢትኅድግ፡ ወቤተ፡ እኁከኒ፡ ኢትባእ፡ በምንዳቤ፡ ዘእንበለ፡ ትንግሮ፡ ቅድመ፡ ይኄይስ፡ ዓርከ፡ ቅሩብ፡ እምእኊ፡ ዘርኁቀ፡ የኀድር።

¹⁰ ጠቢበ፡ ኩን፡ ወልድየ፡ ከመ፡ ይትፈሥሐኒ፡ ልብየ፡ ወአርኅቅ፡ እምኔከ፡ ቃለ፡ ዝንጓጔ።

¹¹ ማእምር፡ መጽኣሁ፡ እኩያት፡ ወተኀብአ፡ ወዓብዳንሰ፡ ተቃዊሞሙ፡ ኃጒለ፡ ተፈድዩ።

¹² አሰሰል፡ ልብሰከ፡ እስመ፡ ኃለፈ፡ ጸላኢ፡ ዘባዕደ፡ ያማስን።

¹³ ዘይባርክ፡ ዓርኮ፡ በጽባሕ፡ ዘዓቢይ፡ ቃል፡ እምዘ፡ ይረግም፡ አልቦ፡ ዘየኃድግ።

¹⁴ ጻሕጻሕ፡ ያወጽኦ፡ ለብእሲ፡ እምነ፡ ቤቱ፡ በመዋዕለ፡ ክረምት፡ ከማሁ፡ ብእሲት፡ ጸአሊት፡ እምነ፡ ቤት፡ ርሡይ፡ ታወጽኦ፡ ለምታ።

¹⁵ ደቡባዊ፡ ነፋስ፡ ጽኑዕ፡ ወበስሙሰ፡ ዘየማን፡ ይሰመይ።

¹⁶ ሐፂን፡ ለሐፂን፡ ያበልሖ፡ ወብእሲ፡ ያበልሕ፡ ገጸ፡ ካልኡ።

¹⁷ ዘተከለ፡ በለሰ፡ ይበልዕ፡ ፍሬሃ፡ ወዘየዐቅብ፡ እግዚኡ፡ ይከብር።

¹⁸ ከመ፡ ኢይትማሰል፡ ገጽ፡ ገጸ፡ ከማሁ፡ ልበ፡ ብእሲኒ፡ ኢይትማሰል።

¹⁹ ሲኦል፡ ወማኅጐሊ፡ ኢይጸግቡ፡ ከማሁ፡ አዕንተ፡ ሰብእኒ፡ ኢይጸግባ።

²⁰ ርኩስ፡ በኀበ፡ እግዚአብሔር፡ ምዑክ፡ ዐይን፡ ወእለ፡ ዘእንበለ፡ ትምህርት፡ ኢይእኅዙ፡ ልሳኖሙ።

²¹ መከራሆሙ፡ ለወርቅ፡ ወለብሩር፡ ርስነት፡ ወብእሲ፡ ይትሜከር፡ በኀበ፡ እለ፡ ይዌድስዎ።

²² ልበ፡ ኃጥእ፡ የኃሥሥ፡ እከየ፡ ወልብ፡ ርትዕት፡ ተኃሥሥ፡ አእምሮ።

²³ እመ፡ ቀሠፍኮ፡ ለዓብድ፡ በማእከለ፡ ማኅበር፡ በጽእለት፡ ኢይትአተት፡ ዕበዱ።

²⁴ አእምሮ፡ አእምር፡ መንፈሰ፡ መራዕይከ፡ ወሚጥ፡ ልበከ፡ ለመርዔትከ፡ ወለሙፋረ፡ ዚአከ።

²⁵ እስመ፡ አኮ፡ ለብእሲ፡ ኰንኖ፡ ወኃይል፡ ወኢይትወሀብ፡ እምትውልድ፡ ለትውልድ።

²⁶ ዕፅድ፡ ሣዕረ፡ ወአስተሐምም፡ ዘውስተ፡ ገዳም፡ ሐመልማለ፡ ወአስተጋብእ፡ ሣዕረ፡ ደብር፡ ወተአርር፡ ፍሬ።

²⁷ ከመ፡ ታጥሪ፡ አባግዐ፡ ለልብስ፡ አክብር፡ ፂኦተ፡ ከመ፡ ይብዛኅ፡ መርዔትከ።

²⁸ ወልድየ፡ ዘእምኀቤየ፡ ብከ፡ ቃል፡ ጽንዕት፡ ሕልብ፡ ሐሊበጠሊ፡ ለሕይወትከ፡ ወለሕይወተ፡ ነባሪከ።