2 Meqabyan 16

Biblia etíope (ge'ez)

¹ እሰኩ፡ ሐሊ፡ ለሊከ፡ ዘሀሎ፡ ውስተ፡ ሥጋከ፡ በጽፍረ፡ እደዊከ፡ ወእገሪከ፡ ወፀጕረ፡ ርእሰከ፡ እስመ፡ ለለጊዜሁ፡ ትቅርፆሙ፡ ወየዓክሉ፡ ወፂአ፡ ወበዝ፡ አእምር፡ ወለእመ፡ ሀለወከ፡ ልቡና፡ ወአእምሮ፡ ለአሜን።

² ወእም፡ አይቴ፡ ይወፅእ፡ ትብል፡ እሉ፡ ጽፍረ፡ እደዊከ፡ ወእገሪከ፡ ወፀጕረ፡ ርእስከ፡ አኮኑ፡ እግዚአብሔር፡ ኀበ፡ ሠርዖሙ፡ ከመ፡ ይፃዑ፡ ከመ፡ ታእምር፡ አንተ፡ ትንሣኤ፡ ምውታን፡ ዘይከውን፡ ዘሥጋከ፡ በአኮ፡ በውስተ፡ ሥጋ፡ ባዕደ፡ ከመ፡ ታእምር፡ ለሊከ፡ ከመ፡ ትትነሥእ፡ እምውታን።

³ ወትትፈደይ፡ አንተ፡ በከመ፡ ምግባሪከ፡ ዘገብርከ፡ አበሳ፡ ወኃጢአተ፡ አመ፡ ትንሣኤ፡ ሙታን፡ በእንተ፡ ዘአስሐትከ፡ ሕዝበ፡ እንዘ፡ ትብል፡ አልቦ፡ ትንሣኤ፡ ሙታን።

⁴ ወይእዜኒ፡ ትሬእያ፡ አመ፡ ትብጽሐከ፡ ዕለተ፡ ፍዳከ፡ እስመ፡ አንተ፡ ዘዘራዕከ፡ ኢየዓቢ፡ ከመ፡ ይበቍል፡ እመሂ፡ እክል፡ ወእመሂ፡ ሥራናይ።

⁵ ወዓዲ፡ አንተ፡ ዘተከልከ፡ ዕፅ፡ ኢየዓቡ፡ በቍለ፡ እመሂ፡ ዕፀ፡ ወይን፡ ወእመሂ፡ ዕፀ፡ በለስ፡ ኢይትዌለጥ፡ ቍጸሊሁ፡ ወፍሬሁኒ።

⁶ ወእመኒ፡ ተከልከ፡ ወይነ፡ ኢይትዌለጥ፡ ከመ፡ ይኩን፡ በለስ፡ እመኒ፡ ተከልከ፡ በለይስ፡ ኢትዌለጥ፡ ከመ፡ ይኩን፡ ወይነ፡ ወእመኒ፡ ዘራዕከ፡ ሥርናየ፡ ኢይትዌለጥ፡ ከመ፡ ይኩን፡ ሰገመ።

⁷ ወእመኒ፡ ዘራእከ፡ ሰገመ፡ ኢይትዌለጥ፡ ከመ፡ ይኩን፡ ሥርናየ፡ እለ፡ ኵሉ፡ በዘርኡ፡ ወበበዘመዱ፡ ወበበፍሬሁ፡ ወበዕፁ፡ ወበበቍፅሉ፡ ወበበምርዉ፡ ይትቄበል፡ በረከተ፡ በጠለ፡ ምሕረት፡ ዘእምኀበ፡ እግዚአብሔር፡ ወያወፅ፡ ፍሬ።

⁸ ከማሁ፡ ምድርኒ፡ ታወጽኦ፡ በዘዘርአ፡ እግዚአብሔር፡ ታበቍል፡ ነፍሰ፡ ወሥጋ፡ ገባርያነ፡ ሠናይ፡ እንዘ፡ ኢይትዌለጡ፡ በገባርያነ፡ እኪት፡ ወገባርያነ፡ እኪት፡ እንዘ፡ ኢይትዌለጥ፡ በገባርያነ፡ ሠናይእለ፡ ዘዘርአ፡ እግዚአብሔር፡ ይበቍሉ፡ ነፍስ፡ ወሥጋ።

⁹ ወእምከመ፡ በጽሐ፡ ጊዜሑ፡ ለንፍሐተ፡ ቀርን፡ ይትነሥኡ፡ ምውታን፡ በጠለ፡ ምሕረት፡ ዘእምኀበ፡ እግዚአብሔር፡ እለ፡ ገብሩ፡ ሠናየ፡ ውስተ፡ ትንሣኤ፡ ሕይወት፡ ወዕሤቶሙ፡ ገነተ፡ ትፍሥሕት፡ ማኀድር፡ ለንጹሐን፡ ዘአስተዳለወ፡ ለኄራን፡ ኀበ፡ አልቦ፡ ደዌ፡ ወሕማም፡ ኀበ፡ ኢይመውቱ፡ እምዝ፡ ደግመ።

¹⁰ ወእለሰ፡ እኩየ፡ ገብሩ፡ ውስተ፡ ትንሣኤ፡ ደይን፡ ምስለ፡ ዲያብሎስ፡ ዘአለሐቶሙ።

¹¹ ወአጋንንቲሁ፡ እኩያን፡ እለ፡ ኢይፈቅዱ፡ ይድኅን፡ እ፡ እምኵሉ፡ እጓለ፡ እመሕያው፡ ውስተ፡ ኵነኔ፡ ዘለዓለም።

¹² መትሕት፡ ታሕቲት፡ ውስተ፡ ጸናፌ፡ ጽልመት፡ ኀበ፡ ብካይ፡ ወሐቅየስነን፡ ኀበ፡ አልቦ፡ ሣህል፡ ወምህረት፡ ወኀበ፡ አልቦ፡ ሙፃዕ፡ እስከ፡ ለዓለመ፡ ዓለም፡ እስመ፡ ኢገብሩ፡ ሠናየ፡ በሕይወቶሙ፡ በዲበ፡ ምድር፡ እንዘ፡ ሀለዉ፡ በሥጋሆሙ።

¹³ ወበእንተዝ፡ ይትኴነኑ፡ አመ፡ ትንሣኤ፡ ነፍሰ፡ ወሥጋ።

¹⁴ ለሌሎሙ፡ ለእለ፡ ኢየአምኑ፡ ትንሣኤ፡ ነፍስ፡ ወሥጋ፡ ኅቡረ፡ አንተ፡ ባቲ፡ ያርኢ፡ እግዚአብሔር፡ ዕበየ፡ ተአምሪሁ።

¹⁵ ወይትፈደይ፡ ኵሉ፡ ለለ በከመ፡ ምግባሩ፡ ወበከመ፡ ፃማ፡ እዴሁ።