2 Meqabyan 20

Biblia etíope (ge'ez)

¹ እመኑኒ፡ ከመ፡ ኢይትኃደግ፡ ወኢይትኃባዕ፡ ኵሉ፡ ምግባሪነ፡ ዘገበርነ፡ በዲበ፡ ምድር፡ አመ፡ ንቀውም፡ ቅድሜሁ፡ በፍርሃት፡ ወበርዓድ።

² ወእመ፡ ኢንትማላዕ፡ ስንቀ፡ ለፍኖትነ፡ ወአመ፡ አልብነ፡ ልብሰ፡ ለእርቃነ።

³ ወእመ፡ አልብነ፡ ምርጉዝ፡ ለዕደዊነ፡ ወዓሣዕነ፡ ለእገሪነ።

⁴ ወአነ፡ ኢነምር፡ ፍኖቶ፡ ለኀበ፡ ይወስዱነ፡ አመኒ፡ ደኅፅ፡ ወእመኒ፡ ጐጻጕጽ፡ ወእመኒ፡ ጽልመት፡ ወእመኒ፡ ሦክ፡ ወአሜከላ፡ እመኒ፡ ቀላየ፡ ባሕር፡ ወቀላየ፡ ሲኦል።

⁵ ወእለሂ፡ ይወስዱነ፡ ኢነአምሮሙ፡ ወኢነሰምዕ፡ ነገሮሙ።

⁶ ወኢንሬኢ፡ ገጾሙ፡ እስመ፡ ጽልመት፡ እሙንቱ፡ ወውስተ፡ ጽልመት፡ ይመርሁነ።

⁷ በከመ፡ ይቤ፡ ዳዊት፡ ነቢይ፡ ሶበ፡ ተኀልቅ፡ ነርፍስየ፡ ባላዕሌየ፡ አንተ፡ እግዚኦ፡ ተአምር፡ ፍኖትየ፡ በዛቲ፡ ፍኖት፡ ሖርኩ፡ ኃብዑ፡ ሊተ፡ መሥገርተ፡ ወተመየጥኩ፡ መንገለ፡ የማንየ፡ ወርኢኩ፡ ወኃጣእኩ፡ ዘየአምረኒ፡ ወኀበሂ፡ አመሥጥ፡ አልብየ።

⁸ ወዘንተ፡ ሶበ፡ ይብል፡ እስመ፡ የአምር፡ ከመ፡ ይሣለቅዎ፡ አጋንንት፡ ወይመርህዎ፡ ኀበ፡ ዘኢየአምር፡ ፍኖተ፡ ወይትመየጥ፡ ይምነ፡ ወጽግመ፡ ወአልቦ፡ ዘይረክብ፡ ዘየአምሮ።

⁹ ወሊቱኒ፡ አልቦ፡ ዘየአምር፡ አላ፡ ባሕቲቱ፡ ማዕከለ፡ መላእክተ፡ ጽልመት።

¹⁰ ወመንፈሳውያን፡ መላእክተ፡ ብርሃን፡ እለ፡ ትፈነዉ፡ ኀበ፡ ኄራን፡ ከመ፡ ይትመጠዉ፡ ነፍሳቲሆሙ፡ ለጻድቃን፡ ወከመ፡ ይሰዱ፡ ኀበ፡ ዓፀደ፡ ብርሃን፡ ዘሕይወት።

¹¹ ወእለሂ፡ ይትፌነዉ፡ መላእክተ፡ ጽልመት፡ ወአጋንንት፡ ኀበ፡ ነፍሳተ፡ ኃጥአን፡ ከመ፡ ይትቀበልዎሙ፡ ወይሰድዎሙ፡ ውስተ፡ ኵነኔ፡ ዘለዓለም፡ ዘድልወ፡ ሎሙ፡ ከመ፡ ይት፡ ፈደዩ፡ በከመ፡ ምግባሮሙ፡ ዘገብሩ።

¹² አሌ፡ ሎሙ፡ ለነፍሳተ፡ ኃጥአን፡ እለ፡ ይወስድዎሙ፡ ውስተ፡ ኃጕል፡ ወአልቦ፡ ዕረፍት፡ ወአድኂን፡ ወኢአምሥጦ፡ ወኢሙፃዕ፡ እስከ፡ ለዓለም፡ እምዘረከቦሙ፡ ምንዳቤ።

¹³ አሌ፡ ሎሙ፡ ለኃጥአን፡ እስመ፡ በፍኖተ፡ ቃየን፡ ሖሩ፡ ወበአሰበ፡ ዓመፃሁ፡ ለበለዓም፡ ተኃጉሉ፡ ወኃጥኡ፡ ዘይገብሩን፡ እስመ፡ በነሢኦ፡ ህልያን፡ ወርዱ፡ ይመከንዩ፡ ከመ፡ ይንሥኡ፡ ንዋየ፡ ባዕድ፡ በዓመፃ፡ ዘኢኮነ፡ ንዋዮሙ።

¹⁴ እሙንቱኪ፡ ይትፈደዩ፡ በከመ፡ ምግባሮሙ፡ ዘገብሩ፡ በኵነኔ፡ ነደ፡ እሳት።