2 Meqabyan 9

Biblia etíope (ge'ez)

¹ ወአንተኒ፡ ኦሰብእ፡ ወአኮ፡ እግዚአብሔር፡ ለምንት፡ ትትዒበይ፡ ዘዮምኪ፡ ሰብእ፡ ወጌሠመ፡ መሬት፡ ወሐመድ፡ ወትከውን፡ ዕፄ፡ ወዕፄያት፡ ውስተ፡ መቃብሪከ።

² ወዓዲ፡ ሲኦል፡ ትተልወከ፡ ወለእለ፡ ይገብሩ፡ ምግባረ፡ ዚአከ፡ እስመ፡ ለከሰ፡ መምህርከ፡ ሰብልያኖስ፡ ዘአግብኦ፡ ዲበ፡ ርእሱ፡ ኃጢአተ፡ ኵሉ፡ ዓለም፡ በእንተ፡ ዘአስሐቶ፡ ለአቡነ፡ አዳም፡ በትዕቢቱ።

³ እስመ፡ ዘአበየ፡ ሰጊደ፡ ለግብረ፡ አምላኩ፡ በአዕብዮ፡ ርእሱ፡ ወበግዝፈት፡ ክሣዱ።

⁴ ወአንተኒ፡ በከመ፡ መምህርከ፡ አበይከ፡ ሰፊደ፡ ለእግዚአብሔር፡ አምላክከ።

⁵ ውአንተኒ፡ ተሐውር፡ በከመ፡ ሖሩ፡ ቀደምትከ፡ እለ፡ ኢየአምርዎ፡ ለእግዚአብሔር፡ አምላኮሙ።

⁶ ወተበቀሎሙ፡ ወወረዱ፡ ውስተ፡ ሲኦል፡ በእንተ፡ እከየ፡ ምግባሮሙ፡ ዘገብሩ፡ በዲብነ፡ ምድር።

⁷ ወእንተኒ፡ ከማሆሙ፡ ትወርድ፡ ውስተ፡ ገሃነም።

⁸ ይመስለከኑ፡ ዘታመሥጥ፡ እምእዴሁ፡ ለእግዚአብሔር፡ እስመ፡ መዓቶ፡ ወሀከ፡ ወተሀከ፡ ይከ፡ አምልኮቶ፡ እግዚአብሔር፡ ዘወሀበከ፡ ሥልጣነ፡ ላዕለ መንግሥታት።

⁹ ወፈተነከ፡ እመ፡ ትገብር፡ ፈቃዶ፡ ወእመ፡ አልቦ፡ ወእመሰ፡ ዓሠነይከ፡ ፍኖተከ፡ በዲበ፡ ምድር፡ ያሤኒ፡ እግዚአብሔር፡ ፍናዊከ፡ ወኵሎ፡ ዘወደይከ፡ እዴከ፡ ይሤኒ፡ ወይባርክ፡ ለከ፡ ወኵሎ፡ ፀረከ፡ ወጸላእትከ፡ ያገርር፡ ለከ።

¹⁰ ወትትፌሣሕ፡ በፀዓትከ፡ ወበበአትከ፡ ወበፍሬ፡ ከርሥከ፡ ወበመዛግብቲከ፡ ወበመራዕይከ፡ ወኀበ፡ ዘአንፀርከ፡ በአፃብዒከ፡ ወሀለይከ፡ በልብከ፡ ኵሉ፡ ይትኤዘዝ፡ ለከ፡ እስመ፡ እምኀበብ፡ እግዚአብሔር፡ ትበውሐ፡ ለከ፡ ከመዝ፡ ትግበር፡ ወትሕንጽ፡ ወትትክል፡ ወትንሥት።

¹¹ ወእመሰ፡ አበይከ፡ ሰሚዓ፡ ቃሉ፡ ወሕጉ፡ ለእግዚአብሔር፡ ወኢሖርከ፡ በኵነኔሁ፡ አልብከ፡ ኀበ፡ ታመሥጥ፡ እምእዴሁ፡ ለእግዚአብሔር፡ ከመ፡ ኵሎሙ፡ ዓላውያን፡ እለ፡ እምቅድሜከ፡ እለ፡ ኢያመልክዎ፡ ለእግዚአብሔር፡ በንጹሕ፡ ወኢትወከሉ፡ በኵነኔሁ፡ ርቱዕ፡ እስመ፡ ጽድቅ፡ ኵሉ፡ ኵነኔሁ።

¹² ወአልቦ፡ ዘይሴወር፡ እምቅድመ፡ እምአዕይንቲሁ፡ ወኵሉ፡ ክሡተ፡ ወጽጡህ፡ በቅድሜሁ።

¹³ አሐዜ፡ ሥልጣነ፡ ነገሥተ፡ ውእቱ፡ ወገፍታዒ፡ መነብርት፡ ኃያላን፡ ውእቱ።

¹⁴ ወመልዓሌ፡ ትሑታን፡ ውእቱ፡ ወመንሥኤ፡ ውዱቃን፡ ውእቱ።

¹⁵ ወፈታሑ፡ ዕሡራን፡ ውእቱ፡ ወመንሥኤ፡ ምውታን፡ ውእቱ፡ ወለእለ፡ በልየ፡ ሥጋሆሙ፡ ወኮነ፡ ከመ፡ ሐመድ፡ ያነቅሖሙ፡ በጊዜ፡ ፈቀደ፡ እስመ፡ ጠለ፡ ምሕረት፡ ውእቱ፡ እምኀቤሁ።

¹⁶ ወለእለ፡ ገብሩ፡ እኩየ፡ ያነሥ፡ ኦሙ፡ ውእተ፡ ትንሣኤ፡ ደይን፡ እስመ፡ አምዕዕዎ፡ ወይትበቀሎሙ።

¹⁷ ወዲበ፡ ምድርኒ፡ ያማስን፡ ዘርኦሙ፡ እስመ፡ ዓላውያን፡ ሕጉ፡ ወሥርዓቱ፡ ለእግዚአ፡ ብሔር፡ እሙንቱ።

¹⁸ ወኢይፈቅዱ፡ የሀልዉ፡ ኃጥአን፡ ውስተ፡ ምክሮሙ፡ ለጻድቃን፡ እስመ፡ ዕፁብ፡ ፍኖ፡ ቶሙ፡ ለጻድቃን፡ እምፍኖቶሙ፡ ለኃጥአን።

¹⁹ ወበከመ፡ ልዑል፡ ሰማይ፡ እምድር፡ ከማሁ፡ ርኁቅ፡ ፍኖቶሙ፡ ለጻድቃን፡ እምፍኖቶሙ፡ ለኃጥአን።

²⁰ ወፍኖቶሙሰ፡ ለኃጥአን፡ ምግባረ፡ ጹግ፡ ወትዕግልት፡ ወዓመፃ፡ ወዝሙት፡ ወጽልሑት፡ ወስስዕት፡ ወሐይደ፡ ንዋዩ፡ ባዕደ፡ ወስካር፡ በዓመፃ።

²¹ ወረዊጽ፡ ውስተ፡ ከዕወተ፡ ደም፡ ወአማስኖ፡ ውስተ፡ ዘኢይበቍዕ፡ ወስአንብዓ፡ ዕጓለ፡ ማውታ፡ ወበሊዓ፡ ማውታ፡ ወደም፡ ወበሊዓ፡ ሥጋ፡ ሐራውያን፡ ወገመል፡ ወሐዊር፡ ውስተ፡ ብእሲት፡ ሐራሰ፡ ወትክት፡ ዘእንበለ፡ ተነጽሕ።

²² ወዝንቱ፡ ኵሉ፡ ምግባሮሙ፡ ለኃጥአን፡ ስፍሕት፡ ፍኖተ፡ ወርብብት፡ መርበብተ፡ ሰይጣን፡ እንተ፡ ትወስድ፡ ውስተ፡ ኃጐል፡ ወኵነኔ፡ ዘለዓለም።

²³ ወፍኖቶሙሰ፡ ለጻድቃን፡ ፀባብ፡ ወመቅዓን፡ እንተ፡ ትወስድ፡ ውስተ፡ ሕይወት፡ ትሕትና፡ ወየሃውት፡ ፍቅረ፡ ወሰላም፡ ጾም፡ ወጸሎት፡ ወንጽሐ፡ ሥጋ፡ ወተዓቅቦ፡ እመባልዕት፡ ዘኢይበቍዕ፡ ማውታ፡ ወብትክ፡ ወዝሙት፡ ወሐዊረ፡ ብእሲተ፡ ብእሲ።

²⁴ ወይትዓቀቡ፡ እምኵሉ፡ ምግባር፡ ርስሑ፡ ወመባልዕት፡ ርኵሳት፡ እለ፡ ኢእዝዙ፡ ውስተ፡ ሕግ፡ ወእምግባር፡ ርሱሕ፡ ዘኢይሠምሮ፡ እግዚአብሔር፡ እስመ፡ ዘንተ፡ ኵሉ፡ ይግብሩ፡ ኃጥአን።

²⁵ ወጻድቃንሰ፡ ይትገሃሡ፡ እምኵሉ፡ ፍናዋት፡ እኵያተ፡ ዘኢይሠምሮ፡ እግዚአብሔር።

²⁶ ወይፈቅሮሙ፡ ወይትመሐፀኖሙ፡ ወያድኅኖሙ፡ እምኵሉ፡ ምንዳቤሆሙ።

²⁷ ወለኃጥአንሰ፡ ሰይጣን፡ ይቀንዮሙ፡ እስመ፡ የዓቅቡ፡ ሕጎ፡ ወሥርዓቶ፡ ወኵሎ፡ ዘያፈቅር።