3 Meqabyan 1

Biblia etíope (ge'ez)

¹ ይትፌሥሐ፡ ደስያተ፡ ግብፅ፡ በደኃሪ፡ መዋዕል፡ በእንተ፡ ዘይመጽእ፡ ዲቤሆን፡ ኄር፡ ወየዋህ፡ ዘይትቤቀል፡ በእንተ፡ ዘገፍዓ፡ ወአስሐተ፡ ሰብልያኖስ፡ ዘይጻረራ፡ ለፍኖተ፡ ፈጣሪሁ።

² ወውእቱ፡ ይትቤቀሎ፡ ወያገብእ፡ ክብሮ፡ ውስተ፡ መሬት፡ ወኃሣር፡ እስመ፡ ተዓበየ፡ በሕሊናሁ።

³ ወይቤ፡ መኑ፡ ይትሌዓል፡ እምኔየ፡ እስመ፡ አነ፡ አበውዕ፡ ውስተ፡ ልበ፡ አብሕርት፡ ወአዓርግ፡ ውስተ፡ መልዕልት፡ ወኢሬኢ፡ ቀላያተ፡ ወዕፀብጦሙ፡ ከመ፡ ዕጕለ፡ ዖፍ፡ ለደቂቀ፡ አዳም።

⁴ ወአልቦ፡ ዘይከልዓኒ፡ እምእዴየ፡ እስመ፡ አነ፡ ኢትኄየሎሙ፡ ለእለ፡ ይነብሩ፡ ዲበ፡ ምድር፡ ለእመ፡ ይገብሩ፡ ፈቃደ፡ እግዚአብሔር፡ እስመ፡ እትመከነይ፡ አነ፡ በእንቲአሆሙ፡ ከመ፡ አግኀሦሙ፡ እምፍኖተ፡ እግዚአብሔር፡ ርትዕት።

⁵ ወአገብኦሙ፡ ውስተ፡ ፍኖተ፡ ዚአየ፡ መብዕስ፡ ከመ፡ ይሑሩ፡ ምስሌየ፡ ውስተ፡ ኃጕል።

⁶ ወበእንተዝ፡ እለ፡ አፍቀርዎ፡ ወአቀቡ፡ ትእዛዞ፡ ይፀልዑ፡ ኪያየ፡ ወአለሰ፡ ስሕቱ፡ እምእግዚኦሙ፡ ይመጽኡ፡ ኀቤየ፡ ወያፈቅሩ፡ ኪያየ፡ ወየዓቅቡ፡ ኪዳንየ፡ ወይገብሩ፡ ትእዛዝየ፡ በከመ፡ አነ፡ አዘዝክዎሙ፡ እስመ፡ አነ፡ አሐሥም፡ ልቦሙ፡ ወአጠዊ፡ ሕሊናሆሙ፡ ከመ፡ ኢይትመየጡ፡ ኀበ፡ እግዚአብሔር፡ ፈጣሪሆሙ።

⁷ ወሶበ፡ አርእዮሙ፡ ንዋየ፡ ዓለም፡ አስሕት፡ ልቦሙ፡ እምፍኖት፡ ርትዕት፡ ወሶበ፡ አርእዮሙ፡ ላህያተ፡ አንስተ፡ ወደናግለ፡ ወበእላንቱኒ፡ አግኅሦሙ፡ እምፍኖት፡ ርትዕት።

⁸ ወሶበ፡ አርእዮሙ፡ አዕባነ፡ ህንደኬ፡ ዘያንጸባርቁ፡ ወአዕባነ፡ ወርቅ፡ ወብሩር፡ ወበዝኒ፡ አግኅሦሙ፡ እምፍኖት፡ ርትዕት፡ ከመ፡ ይትመየጡ፡ ውስተ፡ ዘዚአየ፡ ምግባር።

⁹ ወሶበ፡ አርእዮሙ፡ አልባሰ፡ ቀጠንት፡ ወቢሶሳት፡ ወሲራያት፡ ወዲባጋተ፡ ወአጌያተ፡ ወበዝየኒ፡ እመይጦሙ፡ እምፍኖተ፡ ርትእት፡ ወአገብኦሙ፡ ውስተ፡ ዘዚአየ፡ ሕሊናት፡ ወሶበ፡ አርእዮሙ፡ ጥረታተ፡ ወከመ፡ ኆፃ፡ እንስሳተ፡ ወበዝኒ፡ እመይጦሙ፡ ውስተ፡ ዘዚአየ፡ ምግባራት።

¹⁰ ወሶበ፡ አርእዮሙ፡ ቅኀዓታት፡ ዘበትዕቢት፡ ወዘበእንተ፡ አንስት፡ ወዘበዕልዕ፡ ወመዓት፡ ወበዝኒ፡ ኵሉ፡ እመይጦሙ፡ ውስተ፡ ዘዚአየ፡ ፍኖት።

¹¹ ወሶበ፡ አርእዮሙ፡ ትእምርታተ፡ ወእበውዕ፡ ውስተ፡ ልበ፡ ካልዓኒሆሙ፡ ወእቶስሕ፡ ውስተ፡ ልቦሙ፡ ነገራተ፡ ትእምርታተ፡ ዘዚአሆሙ፡ ወአርእይየ፡ ትእምርተ፡ ቃሎሙ፡ አዕበድክዎሙ።

¹² ወለእለ፡ ርሰይክዎሙ፡ ማኅደርየ፡ አርእዮሙ፡ ተአምርታተ፡ እመሂ፡ በሩፀተ፡ ከዋክብት፡ አው፡ በሥረተ፡ ደመናት፡ አው፡ በንደተ፡ እሳት፡ አውበንቃወ፡ አዕዋፍ፡ ወአራዊት፡ ወበዝንቱ፡ ኵሉ፡ እሬሲ፡ ሎሙ፡ ትእምርተ፡ ውስተ፡ አልባቢሆሙ፡ እስመ፡ ማኅደርየ፡ እሙንቱ።

¹³ ወይትናገሩ፡ ወይሁብዎሙ፡ ትእምርተ፡ ለቢጾሙ፡ ወአቀድሞሙ፡ ወእከውን፡ ትእም፡ ርተ፡ በከመ፡ ነገርዎሙ፡ እሙንቱ፡ ማርያኒሆሙ።

¹⁴ ወአገብር፡ ሎሙ፡ ትእምርተ፡ ቃሎሙ፡ ከመ፡ ይስሐቱ፡ እለ፡ ሐተትዎሙ፡ ወየሀብዎሙ፡ አሰበ፡ ወይዜንዉ፡ ለቢጾሙ፡ ከመ፡ ይበሉ፡ አልቦ፡ ማዕምራን፡ ከመ፡ እገሌ፡ ወእገሊት፡ እለ፡ ይከውኖሙ፡ በከመ፡ ተናገሩ፡ ወየአምሩ፡ ትንቢተ፡ ወይፈልጡ፡ ሥናየ፡ ወእኩየ፡ ወኵሉ፡ በከመ፡ ነበቡ፡ ይከውኖሙ፡ ወበከመ፡ ቃሎሙ፡ ይትገበር፡ ሎሙ።

¹⁵ ወዘንተ፡ ሶበ፡ ይብሉ፡ እትፌሣሕ፡ አነ፡ ከመ፡ ይብዝኁ፡ እለ፡ ይትኀጐል፡ ወይፈድፍዱ፡ እለ፡ ይስሕቱ፡ ብየ፡ ከመ፡ ይትኀጐሉ፡ ምስሌየ፡ ደቂቁ፡ ለአዳም፡ እስመ፡ ብእንተ፡ አቡሆሙ፡ አዳም፡ አውድቀኒ፡ እግዚአብሔር፡ እመንበርየ፡ በብሂልየ፡ ኢይሰግድ፡ ለዞይቲሐት፡ ሊተ።

¹⁶ ወአነሂ፡ እትማልዖሙ፡ ውስተ፡ ኃጕል፡ ለኵሎሙ፡ ደቂቁ፡ እለ፡ የሐውሩ፡ በትእዛዝየ፡ ወብየ፡ ማዕኰት፡ እምኀበ፡ ዘፈጠረኒ፡ ከመ፡ እለ፡ አስሐትክዎሙ፡ ይትወደዩ፡ ምስሌየ፡ ውስተ፡ እሳት።

¹⁷ ወአነሂ፡ አስተምህርኩ፡ ኀበ፡ እግዚእየ፡ ሶበ፡ አንሀ፡ መዓቶ፡ ላዕሌየ፡ ወአዘዘ፡ ከመ፡ ይዕሥሩኒ፡ ወይደዩኒ፡ ውስተ፡ ገሃነም፡ ወውስተ፡ ማዕምቅተ፡ ሲኦል፡ ወሶበ፡ አዘዘ፡ ከመዝ፡ ፈጣሪየ፡ አነሂ፡ አስተምሕርኩ፡ ቅድሜሁ፡ እንዘ፡ እብል፡ እግዚእየ፡ እስመ፡ ተማእከኒ፡ ወበመቅሠፍትከ፡ ገሠጽከኒ፡ ወበመዓትከ፡ ቀሠፍከኒ፡ አብሐኒ፡ አሐተ፡ ካል፡ አንብብ፡ በቅድሜከ።

¹⁸ ወአውሥአኒ፡ ወይቤለኒ፡ እግዚእየ፡ ንብብ፡ ወእሰምዓከ፡ ወሶቤሃ፡ አኃዝኩ፡ ወአስተ፡ ብቋዕኩ፡ ኀቤሁ፡ እንዘ፡ እብል፡ እምከመ፡ ተሰደድኩ፡ እመንበርየ፡ እለ፡ አስሐትክዎሙ፡ ይኩኑ፡ ምስሌየ፡ ውስተ፡ ዘአሥቀይ፡ አነ።

¹⁹ ወእለሰ፡ አበዩኒ፡ ወኢስሕቱ፡ ብየ፡ ወኢዓቀቡ፡ ትእዛዝየ፡ ከመ፡ ይግበሩ፡ ትእዛዘከ፡ ወይ፡ ፈጽም፡ ፈቃደከ፡ ወይዕቀቡ፡ ቃለከ፡ ወሶበ፡ አበዩኒ፡ ዘከመ፡ አነ፡ መሐርክዎሙ፡ ወኢስሕቱ፡ ብየ፡ ዘከመ፡ አስሐትክዎሙ፡ ወኢስሕቱ፡ ብየ፡ ዘከመ፡ አስሐትክዎሙ፡ እሙንቱ፡ ይኩን፡ ለመንግሥትከ፡ ወይንሥኡ፡ አክሊለ፡ ዘሊተ፡ ወሀብከኒ፡ አመ፡ ታፈቅረኒ።

²⁰ ወለኵሎሙ፡ ሥልጣናት፡ እለ፡ ተሰዱ፡ ምስሌየ፡ ወእለ፡ ተሰምዩ፡ ሰይጣናት፡ ሀቦሙ፡ አክ፡ ሊለ፡ ዚአሆሙ፡ ወአንብሮሙ፡ በየማንከ፡ ውስተ፡ መንበረ፡ ዚአየ፡ አንተ፡ ብድወት፡ እም፡ ነየ፡ ወእመላክትየ።

²¹ ወይሰብሑከ፡ በከመ፡ ፈቀድከ፡ ወይኩኑ፡ ከማየ፡ ወከመ፡ መላእክትየ፡ ወይሰብሑከ፡ በከመ፡ ፈቀድከ፡ እስመ፡ ተሥዕረ፡ ሥልጣንየ፡ ወተለዓለ፡ ሥልጣነ፡ ዚአሆሙ፡ እስመ፡ ጽላዕከኒ፡ ወአፍቀርኮሙ፡ ለእለ፡ ተፈጥሩ፡ እመሬት፡ ወሐመድ።

²² ወአውሥአኒ፡ እግዚእየ፡ ወይቤለኒ፡ በከመ፡ ፈቀድከ፡ እንዘ፡ ኢይፈቅዱ፡ ለምባርየ፡ ይኩኑከ፡ በከመ፡ ቃልከ፡ እስመ፡ እንዘ፡ ይሬእዩ፡ ወይሰምዑ፡ አስሐተኮሙ፡ አንተ።

²³ ወሊተኒ፡ ኢየኃዝነኒ፡ ተኃጕሎቶሙ፡ ሶበ፡ ይመጽኡ፡ ኀቤከ፡ ኀዲጎሙ፡ ትእዛዝየ፡ ወቃለ፡ መጻሕፍትየ፡ ወለእመ፡ አንተ፡ አስሐትኮሙ፡ ይትኰነኑ፡ ምስሌከ፡ አደይን።

²⁴ ወአልብክሙ፡ ኑፃዕ፡ እስከ፡ ለዓለመ፡ ዓለም፡ ወእለ፡ ስሕቱ፡ ብከ፡ ውስተ፡ ኵነኔ፡ ደይን፡ አላ፡ ትሣቀዩ፡ ውስተ፡ እሳት፡ እስከ፡ ለዓለመ፡ ዓለም።