Messale 3

Biblia etíope (ge'ez)

¹ ወልድየ፡ ሕገገ፡ ዚአየ፡ ኢትርሳዕ፡ ወቃላትየ፡ ይዕቀብ፡ ልብከ።

² ኑኀ፡ መዋዕል፡ ወዓመታተ፡ ሕይወት፡ ወሰላም፡ ይትዌሰኩከ።

³ ምጽዋት፡ ወሃይማኖት፡ ኢይርኃቀ፡ እንቆ፡ ውስተ፡ ክዳድከ፡ ወጸሐፎ፡ በጽሌ፡ ልብከ።

⁴ ወትረክብ፡ ሞገሰ፡ ሐሊ፡ ሠናየ፡ በቅድመ፡ እግዚአብሔር፡ ወሰብእ።

⁵ ሀሉ፡ ተወኪለከ፡ በእግዚአብሔር፡ በኵሉ፡ ልብከ፡ ወበጥበብከ፡ ኢትትዓበይ።

⁶ በኵሉ፡ ፍናዊከ፡ አክብራ፡ ከመ፡ ታርትዕ፡ ፍናዊከ።

⁷ ኢትኩን፡ ጠቢበ፡ ዘበርእስከ፡ አላ፡ ፍርሆ፡ ለእግዚአብሔር፡ ወተገኀሥ፡ እምኵሉ፡ እኩይ።

⁸ ወሶቤሃ፡ ፈውሰ፡ ይከውነከ፡ ለሥጋከ፡ ወሥራየ፡ ለአዕፅምቲከ።

⁹ አክብሮ፡ ለእግዚአብሔር፡ እምዘ፡ በጽድቅ፡ ጥሪትከ፡ ወአብእ፡ ሎቱ፡ ቀዳሜ፡ ማእረርከ፡ ወእምፍሬ፡ ጽድቅከ።

¹⁰ ከመ፡ ይስፍፋ፡ መዛግብቲከ፡ ብዙኀ፡ ሥርናየ፡ ወወይነ፡ ማኅበብቲከ፡ ይስፍፍ።

¹¹ ወልድየ፡ ኢትትአንተል፡ ተግሣፀ፡ እግዚአብሔር፡ ወኢትድክም፡ እምኀቤሁ፡ በተዛልፎቱ።

¹² እስመ፡ ዘአፍቀረ፡ ይጌሥፅ፡ እግዚአብሔር፡ ከመ፡ አብ፡ ዘይሠምር፡ ወልዶ፡ ወይቀሥፍ፡ ኵሎሙ፡ ውሉዶ፡ ዘኢይትዌከፉ።

¹³ ብፁዕ፡ ብእሲ፡ ዘይረክባ፡ ለጥበብ፡ ወኢ፡ መዋቲ፡ ዘአእመረ፡ ሐኒከ።

¹⁴ ይኄይስ፡ ኪያሃ፡ ተገብሮ፡ እምተገብሮ፡ ወርቅ፡ ወብሩር፡ ወእምብዙኅ፡ መዛግብት።

¹⁵ ክብርት፡ ይእቲ፡ እምዕንቊ፡ በብዙኅ፡ ሤጡ፡ ወኢይትቃወማ፡ ምንትኒ፡ እኩይ።

¹⁶ ሠናይት፡ ሀገሪት፡ ይእቲ፡ ለኵሎሙ፡ እለ፡ ይቀርብዋ፡ ወኵሉ፡ ክብር፡ ኢኮነ፡ መጠና፡ ኑኀ፡ መዋዕል፡ ወዓመተ፡ ሕይወት፡ ውስተ፡ የማና።

¹⁷ ውስተ፡ ጸጋማ፡ ክብር፡ ወብዕል፡ ወእምአፉሃ፡ ይወጽእ፡ ጽድቀ፡ ሕገ፡ ወምጽዋተ፡ በልሳና፡ ትለብስ፡ ፍናዊሃ፡ ፍናወ፡ ሕይወት፡ ወኵሉ፡ አሠራ፡ በሰላም።

¹⁸ ዕፅ፡ ሕይወት፡ ይእቲ፡ ለኵሎሙ፡ እለ፡ ይትመረጐዝዋ፡ ወለእለ፡ ይትአመኑ፡ ባቲ፡ ዘበእግዚአብሔር፡ ፅኑዕ።

¹⁹ እግዚአብሔር፡ በጥበብ፡ ሣረራ፡ ለምድር፡ ወአስተዳለወ፡ ሰማያተ፡ በአእምሮ።

²⁰ ወበተዓውቆቱ፡ ቀላያት፡ ነቅዑ፡ ወደመናትኒ፡ ያውኅዙ፡ ጠላተ።

²¹ ወልድየ፡ ኢትትሀከይ፡ ዕቀብ፡ ምክርየ፡ ወሕሊናየ፡ ከመ፡ ትሕየው፡ ነፍስከ።

²² ወሞገሰ፡ ይከውነከ፡ ውስተ፡ ክዳድከ፡ ወይከውን፡ ፈውሰ፡ ለሥጋከ፡ ወሥራየ፡ ለአዕፅምቲከ፡ ከመ፡ ትሑር፡ ጥቡዐ፡ በሰላም፡ በኵሉ፡ ፍናዊከ።

²³ ወእገሪከ፡ ኢይትዓቀፉ፡ እመሂ፡ ትነብር፡ ኢትፍራህ።

²⁴ ወእመኒ፡ ሰከብከ፡ ሐዋዘ፡ ትነውም፡ ወኢተፈርህ፡ ዘይመጽአከ፡ ሀከከ፡ ወመራደ፡ ረሲዓን፡ ዘይመጽእ።

²⁵ እስመ፡ እግዚአብሔር፡ ይሁሉ፡ ምስሌከ፡ ውስተ፡ ኵሉ፡ ፍናዊከ፡ ወያቀውሞን፡ ለእገሪከ፡ ከመ፡ ኢያንቀልቅላ።

²⁶ ወኢትትሀከይ፡ ገቢረ፡ ሠናይ፡ ለፅኑስ፡ መጠነ፡ ቦ፡ ውስተ፡ እዴከ፡ ርድኦ።

²⁷ ወኢትበል፡ ሑር፡ ወግባእ፡ ጌሠመ፡ እሁበከ፡ እንዘ፡ ትክል፡ ገቢረ፡ ሠናይ፡ እስመ፡ ኢተአምር፡ ዘትወልድ፡ ሳኒታ።

²⁸ ወዓዲ፡ ኢተሐሊ፡ እኩየ፡ ላዕለ፡ ዓርክከ፡ ዘየኃድር፡ ወይትዌከል፡ ብከ፡ ወኢትፍቅድ፡ ተጻልኦ፡ ምስለ፡ ሰብእ፡ በከ፡ እመ፡ አልቦ፡ ዘይገብር፡ እኩየ፡ ላዕሌከ።

²⁹ ኢትጥሪ፡ ዝንጓጔ፡ በኀበ፡ ሰብእ፡ እኩያን፡ ከመ፡ ኢትኩን፡ ከማሆሙ።

³⁰ ወኢትቅናእ፡ በፍናዊሆሙ፡ እስመ፡ ርስ፡ ውእቱ፡ በኀበ፡ እግዚአብሔር፡ ኵሉ፡ ኃጥእ፡ ወምስለ፡ ጻድቃን፡ ኢይዴመር።

³¹ ወርገመ፡ እግዚአብሔር፡ ውስተ፡ አብያተ፡ ረሲዓን።

³² ወውስተ፡ አብያተ፡ ጻድቃን፡ በረከተ፡ እግዚአብሔር፡ ወለዕቡያን፡ ይትቃወሞሙ፡ ንዴት።

³³ ወለትሑታን፡ ይሁቦሙ፡ ክብረ፡ ወክብረ፡ ይወርሱ፡ ጠቢባን።

³⁴ ወረሲዓንሰ፡ አዕበዩ፡ ኃሣረ።