1 Enoch 103

The Ethiopic Bible (Ge'ez)

¹ ወይእዜኒ፡ አነ፡ እምሕል፡ ለክሙ፡ ለጻድቃን፡ በዐቢይ፡ ስብሐቱ፡ ወክብሩ፡ ወበክቡር፡ መንግሥቱ፡ ወበዕበዩ፡ እምሕል፡ ለክሙ።

² እስመ፡ አነ፡ ኣአምር፡ ዘንተ፡ ምሥጢረ፡ ወአንበብኩ፡ በጸፍጸፈ፡ ሰማይ፡ ወርኢኩ፡ ጽሕፈተ፡ ቅዱሳን፡ ወረከብኩ፡ ጽሑፈ፡ ውስቴቶሙ፡ ወልኩዐ፡ በእንቲኣሆሙ።

³ እስመ፡ ኵሉ፡ ሠናይ፡ ወፍሥሓ፡ ወክብር፡ ተደለወ፡ ሎሙ፡ ወተጽሕፈ፡ ለመናፍስቲሆሙ፡ ለእለ፡ ሞቱ፡ በጽድቅ፡ ወበርትዕ፡ ወበብዙኅ፡ ሠናይ፡ ይትወሀብ፡ ለክሙ፡ ተክለ፡ ጻማክሙ፡ ወክፍልክሙ፡ ፈድፈደ፡ እምክፍለ፡ ሕያዋን።

⁴ ወየሐዩ፡ መንፈሰክሙ፡ ለእለ፡ ሞትክሙ፡ በጽድቅ፡ ወይትፌሥሑ፡ ወይትሐሠዩ፡ መናፍስቲሆሙ፡ ወተዝካሮሙ፡ እምቅድመ፡ ገጹ፡ ለዐቢይ፡ ለኵሉ፡ ትውልደ፡ ዓለም፡ ወይእዜኒ፡ ኢትፍርህዎ፡ ለኀሳሮሙ።

⁵ አሌ፡ ለክሙ፡ ኃጥኣን፡ ሶበ፡ ትመውቱ፡ በኀጢአትክሙ፡ ወይብሉ፡ በእንቲኣክሙ፡ እለ፡ ከማክሙ፡ ብፁዓን፡ እሙንቱ፡ ኃጥኣን፡ ኵሎ፡ መዋዕሊሆሙ፡ ርእዩ።

⁶ ወይእዜኒ፡ ሞቱ፡ በሠናይ፡ ወበብዕል፡ ወምንዳቤ፡ ወቀትለ፡ ኢርእዩ፡ በሕይወቶሙ፡ ወበስብሐት፡ ሞቱ፡ ወኵነኔ፡ ኢተገብረ፡ ሎሙ፡ በሕይወቶሙ።

⁷ ኢተአምርዎሙኑ፡ እስመ፡ ውስተ፡ ሲኦል፡ ያወርድዎሙ፡ ለነፍሳቲሆሙ፡ ወእኩያተ፡ ይከውና፡ ምንዳቤሆሙ፡ ዐቢየ።

⁸ ወበጽልመት፡ ወበመርበብት፡ ወበላህብ፡ ዘይነድድ፡ ኀበ፡ ኵነኔ፡ ዐባይ፡ ትበውእ፡ መንፈሰክሙ፡ ወኵነኔ፡ ዐባይ፡ ትከውን፡ ለኵሉ፡ ትውልድ፡ እስከ፡ ለዓለም፡ አሌ፡ ለክሙ፡ እስመ፡ አልብክሙ፡ ሰላመ።

⁹ ኢትበልዎሙ፡ ለጻድቃን፡ ወለኄራን፡ እለ፡ ሀለዉ፡ ውስተ፡ ሕይወት፡ በመዋዕለ፡ ሥራሕነ፡ ጻማ፡ ጻመውነ፡ ወኵሎ፡ ሥራሐ፡ ርኢነ፡ ወእኩያተ፡ ብዙኃተ፡ ረከብነ፡ ወተወዳእነ፡ ወውኅድነ፡ ወንእሰት፡ መንፈሰነ።

¹⁰ ወተሀጐልነ፡ ወአልቦ፡ ዘረድአነ፡ በነገር፡ ወበምግባር፡ ስእነ፡ ወኢ፡ ምንተኒ፡ ኢረከብነ፡ ወተጽዕርነ፡ ወተሀጐልነ፡ ወኢተሰፈውነ፡ ከመ፡ ንርአይ፡ ሕይወተ፡ ዕለተ፡ እምዕለት።

¹¹ ወተሰፈውነ፡ ከመ፡ ንኩን፡ ርእሰ፡ ወኮነ፡ ዘነበ፡ ጻመውነ፡ እንዘ፡ ንትጌበር፡ ወኢሠለጥነ፡ ዲበ፡ ጻማነ፡ ወኮነ፡ መባልዕተ፡ ለኃጥኣን፡ ወዐማፅያን፡ አክበዱ፡ ላዕሌነ፡ አርዑተ፡ ዚኣሆሙ።

¹² ወተሠልጡ፡ ዲቤነ፡ እለ፡ ይጸልኡነ፡ ወእለ፡ ይደጕጹነ፡ ወለእለ፡ ይጸልኡነ፡ አትሐትነ፡ ክሳደነ፡ ወኢመሐሩነ።

¹³ ወፈቀድነ፡ ንሑር፡ እምኔሆሙ፡ ከመ፡ ንንፍጽ፡ ወናዕርፍ፡ ወኢረከብነ፡ ኀበ፡ ንጐይይ፡ ወንድኅን፡ እምኔሆሙ።

¹⁴ ወሰከይናሆሙ፡ ኀበ፡ መላእክት፡ በምንዳቤነ፡ ወጸራሕነ፡ ዲበ፡ እለ፡ ይበልዑነ፡ ወጽራሐ፡ ዚኣነ፡ ኢይሬእዩ፡ ወኢይፈቅዱ፡ ከመ፡ ይስምዑ፡ ቃለነ።

¹⁵ ወይረድእዎሙ፡ ለእለ፡ የሀይዱነ፡ ወይበልዑነ፡ ወለእለ፡ አውኀዱነ፡ ወየኀብኡ፡ ግፍዖሙ፡ ወኢያወፅኡ፡ እምኔነ፡ አርዑቶሙ፡ እለ፡ ይበልዑነ፡ ወይዘረዝሩነ፡ ወይቀትሉነ፡ ወየኀብኡ፡ ቀትለነ፡ ወኢተዘከሩ፡ ከመ፡ ያንሥኡ፡ እደዊሆሙ፡ ላዕሌነ።