1 Enoch 12

The Ethiopic Bible (Ge'ez)

¹ እምቅድመ፡ ኵሉ፡ ነገር፡ ተከብተ፡ ሄኖክ፡ ወአልቦ፡ ዘየአምር፡ እምውሉደ፡ ሰብእ፡ በኀበ፡ ተከብተ፡ ወኀበ፡ ሀሎ፡ ወምንተ፡ ኮነ።

² ወኵሉ፡ ግብሩ፡ ምስለ፡ ቅዱሳን፡ ወምስለ፡ ትጉሃን፡ በመዋዕለ፡ ዚኣሁ።

³ ወአነ፡ ሄኖክ፡ ኮንኩ፡ እባርኮ፡ ለእግዚእ፡ ዐቢይ፡ ወለንጉሠ፡ ዓለም፡ ወናሁ፡ ትጉሃን፡ ይጼውዑኒ፡ ሊተ፡ ለሄኖክ፡ ጸሓፊ፡ ወይቤሉኒ።

⁴ ሄኖክ፡ ጸሓፌ፡ ጽድቅ፡ ሑር፡ አይድዕ፡ ለትጉሃነ፡ ሰማይ፡ እለ፡ ኀደጉ፡ ሰማየ፡ ልዑለ፡ ወምቅዋመ፡ ቅዱሰ፡ ዘለዓለም፡ ወምስለ፡ አንስት፡ ማሰኑ፡ ወገብሩ፡ ዘከመ፡ ይገብሩ፡ ውሉደ፡ ሰብእ፡ ወነሥኡ፡ ሎሙ፡ አንስተ፡ ወማሰኑ፡ ዐቢየ፡ ሙስና፡ በዲበ፡ ምድር።

⁵ ወኢይከውን፡ ሎሙ፡ በዲበ፡ ምድር፡ ሰላም፡ ወኅድገተ፡ ኀጢአት።

⁶ እስመ፡ ይትፌሥሑ፡ በውሉዶሙ፡ ቀትለ፡ ፍቁራኒሆሙ፡ ይሬእዩ፡ ወዲበ፡ ሀጕለ፡ ውሉዶሙ፡ ይግዕሩ፡ ወይስእሉ፡ ለዓለም፡ ወኢይከውን፡ ሎሙ፡ ምሕረት፡ ወኢ፡ ሰላም።