1 Enoch 18

The Ethiopic Bible (Ge'ez)

¹ ወርኢኩ፡ መዛግብተ፡ ኵሉ፡ ነፋሳት፡ ወርኢኩ፡ ከመ፡ ቦሙ፡ አሰርገወ፡ ኵሎ፡ ፍጥረተ፡ ወመሠረታቲሃ፡ ለምድር።

² ወርኢኩ፡ እብነ፡ ማእዘንተ፡ ምድር፡ ወርኢኩ፡ አርባዕተ፡ ነፋሳተ፡ እለ፡ ይጸውርዋ፡ ለምድር፡ ወለጽንዐ፡ ሰማይ።

³ ወርኢኩ፡ ከመ፡ ነፋሳት፡ ይረብብዋ፡ ለልዕልና፡ ሰማይ፡ ወእሙንቱ፡ ይቀውሙ፡ ማእከለ፡ ሰማይ፡ ወምድር፡ ወእሙንቱ፡ ውእቶሙ፡ አዕማደ፡ ሰማይ።

⁴ ወርኢኩ፡ ነፋሳተ፡ እለ፡ ይመይጥዋ፡ ለሰማይ፡ እለ፡ ያዐርቡ፡ ክበበ፡ ፀሓይ፡ ወኵሎ፡ ከዋክብተ።

⁵ ወርኢኩ፡ ዘዲበ፡ ምድር፡ ነፋሳተ፡ ዘይጸውሩ፡ ደመናተ፡ ወርኢኩ፡ ፍናወ፡ መላእክት፡ ወርኢኩ፡ ውስተ፡ ጽንፈ፡ ምድር፡ ጽንዐ፡ ዘሰማይ፡ መልዕልተ።

⁶ ወኀለፍኩ፡ መንገለ፡ አዜብ፡ ወይነድድ፡ መዓልተ፡ ወሌሊተ፡ ኀበ፡ ሰብዐቱ፡ አድባር፡ ዘእምእብን፡ ክቡር፡ ሠለስቱ፡ ዘመንገለ፡ ጽባሕ፡ ወሠለስቱ፡ ዘመንገለ፡ አዜብ።

⁷ ወዘመንገለ፡ ጽባሕሰ፡ ዘእምእብነ፡ ኅብር፡ ወአሐዱ፡ ዘእምእብን፡ ባሕር፡ ወአሐዱኒ፡ ዘእምእብነ፡ ፈውስ፡ ወዘመንገለ፡ አዜብ፡ እምእብን፡ ቀይሕ።

⁸ ወማእከላይሰ፡ ይጐድእ፡ እስከ፡ ሰማይ፡ ከመ፡ መንበሩ፡ ለእግዚአብሔር፡ ዘእምእብነ፡ ፔካ፡ ወድማኁ፡ ለመንበሩ፡ እምእብነ፡ ሰንፔር።

⁹ ወእሳተ፡ ዘይነድድ፡ ርኢኩ፡ ወዘሀሎ፡ ውስተ፡ ኵሉ፡ አድባር።

¹⁰ ወርኢኩ፡ ህየ፡ መካን፡ ማዕዶቱ፡ ለዐቢይ፡ ምድር፡ ህየ፡ ይትጋብኡ፡ ማያት።

¹¹ ወርኢኩ፡ ንቅዐተ፡ ምድር፡ ዕሙቀ፡ በአዕማዲሁ፡ ለእሳተ፡ ሰማይ፡ ወርኢኩ፡ በውስቴቶሙ፡ አዕማደ፡ ሰማይ፡ ዘእሳት፡ ዘይወርዱ፡ ወአልቦሙ፡ ኍልቊ፡ ኢ፡ መንገለ፡ መልዕልት፡ ወኢ፡ መንገለ፡ ዕመቅ።

¹² ወዲበ፡ ውእቱ፡ ንቅዐት፡ ርኢኩ፡ መካነ፡ ወኢ፡ ጽንዐ፡ ሰማይ፡ ላዕሌሁ፡ ወኢ፡ መሠረተ፡ ምድር፡ በታሕቴሁ፡ ወኢ፡ ማይ፡ አልቦ፡ ላዕሌሁ፡ ወኢ፡ አዕዋፈ፡ አላ፡ መካነ፡ በድው፡ ውእቱ።

¹³ ወግሩመ፡ ርኢኩ፡ በህየ፡ ሰብዐተ፡ ከዋክብተ፡ ከመ፡ ዐበይት፡ አድባር፡ ዘይነድዱ፡ ወከመ፡ መንፈስ፡ ዘይሴአለኒ።

¹⁴ ይቤ፡ መልአክ፡ ዝ፡ ውእቱ፡ መካነ፡ ተፍጻሜቱ፡ ለሰማይ፡ ወለምድር፡ ቤተ፡ ሞቅሕ፡ ኮኖሙ፡ ዝንቱ፡ ለከዋክብተ፡ ሰማይ፡ ወለኀይለ፡ ሰማይ።

¹⁵ ወከዋክብት፡ እለ፡ ያንኰረኵሩ፡ ዲበ፡ እሳት፡ ወእሉ፡ እሙንቱ፡ እለ፡ ኀለፉ፡ ትእዛዘ፡ እግዚአብሔር፡ እምቅድመ፡ ጽባሖሙ፡ እስመ፡ ኢመጽኡ፡ በጊዜሆሙ።

¹⁶ ወተምዕዖሙ፡ ወአሰሮሙ፡ እስከ፡ ጊዜ፡ ተፍጻሜተ፡ ኀጢአቶሙ፡ በዓመተ፡ ምሥጢር።