1 Enoch 46

The Ethiopic Bible (Ge'ez)

¹ ወበህየ፡ ርኢኩ፡ ዘሎቱ፡ ርእሰ፡ መዋዕል፡ ወርእሱ፡ ከመ፡ ፀምር፡ ጸዐዳ፡ ወምስሌሁ፡ ካልእ፡ ዘገጹ፡ ከመ፡ ርእየተ፡ ሰብእ፡ ወምሉእ፡ ጸጋ፡ ወገጹ፡ ከመ፡ አሐዱ፡ እመላእክት፡ ቅዱሳን።

² ወተስእልክዎ፡ ለአሐዱ፡ እመላእክት፡ ቅዱሳን፡ ዘየሐውር፡ ምስሌየ፡ ወኵሎ፡ ኅቡኣተ፡ ዘአርአየኒ፡ በእንተ፡ ዝኩ፡ ወልደ፡ ሰብእ፡ ወእቤሎ፡ መኑ፡ ውእቱ፡ ወእምአይቴ፡ ይከውን፡ ውእቱ፡ ወበእንተ፡ ምንት፡ ምስለ፡ ርእሰ፡ መዋዕል፡ የሐውር።

³ ወአውሥአኒ፡ ወይቤለኒ፡ ዝንቱ፡ ውእቱ፡ ወልደ፡ ሰብእ፡ ዘሎቱ፡ ኮነ፡ ጽድቅ፡ ወጽድቅ፡ ምስሌሁ፡ ኀደረ፡ ወኵሎ፡ መዛግብተ፡ ዘኅቡእ፡ ውእቱ፡ ይከሥት፡ እስመ፡ እግዚአ፡ መናፍስት፡ ኪያሁ፡ ኀረየ፡ ወዘክፍሎ፡ ኵሎ፡ ሞአ፡ በቅድመ፡ እግዚአ፡ መናፍስት፡ በርትዕ፡ ለዓለም።

⁴ ወዝንቱ፡ ወልደ፡ ሰብእ፡ ዘርኢከ፡ ያነሥኦሙ፡ ለነገሥት፡ ወለኀያላን፡ እምስካባቲሆሙ፡ ወለጽኑዓን፡ እመናብርቲሆሙ፡ ወይፈትሕ፡ ልጓማተ፡ ጽኑዓን፡ ወያደቅቅ፡ አስናነ፡ ኃጥኣን።

⁵ ወይገፈትዖሙ፡ ለነገሥት፡ እመናብርቲሆሙ፡ ወእመንግሥቶሙ፡ እስመ፡ ኢያሌዕልዎ፡ ወኢይሴብሕዎ፡ ወኢይገንዩ፡ ወእምአይቴ፡ ተውህበት፡ ሎሙ፡ መንግሥት።

⁶ ወገጸ፡ ጽኑዓን፡ ይገፈትዕ፡ ወይመልኦሙ፡ ኀፍረት፡ ወጽልመተ፡ ይከውኖሙ፡ ማኅደሪሆሙ፡ ወዕፄያት፡ ይከውንዎሙ፡ ምስካቢሆሙ፡ ወኢይሴፈዉ፡ ከመ፡ ይትነሥኡ፡ እምስካባቲሆሙ፡ እስመ፡ ኢያሌዕሉ፡ ስሞ፡ ለእግዚአ፡ መናፍስት።

⁷ ወእሙንቱ፡ ኮኑ፡ እለ፡ ይኴንኑ፡ ከዋክብተ፡ ሰማይ፡ ወያሌዕሉ፡ እደዊሆሙ፡ ውስተ፡ ልዑል፡ ወይከይዱ፡ ዲበ፡ የብስ፡ ወየኀድሩ፡ ውስቴታ፡ ወኵሎ፡ ተግባሮሙ፡ ዐመፃ፡ ያሬእዩ፡ ወኵሉ፡ ተግባሮሙ፡ ዐመፃ፡ ወኀይሎሙ፡ ዲበ፡ ብዕሎሙ፡ ወሃይማኖቶሙ፡ ኮነ፡ ለአማልክት፡ እለ፡ ገብሩ፡ በእደዊሆሙ፡ ወይክሕዱ፡ ስሞ፡ ለእግዚአ፡ መናፍስት።

⁸ ወይሰድዱ፡ እምአብያት፡ ምስትጉቡአ፡ ዚኣሁ፡ ወለመሃይምናን፡ እለ፡ ስቁላን፡ በስሙ፡ ለእግዚአ፡ መናፍስት።