1 Enoch 51

The Ethiopic Bible (Ge'ez)

¹ ወበእማንቱ፡ መዋዕል፡ ታገብእ፡ ምድር፡ ማሕፀንታ፡ ወሲኦል፡ ታገብእ፡ ማሕፀንታ፡ ዘተመጠወት፡ ወሀጕል፡ ያገብእ፡ ዘይፈዲ።

² ወየኀሪ፡ ጻድቃነ፡ ወቅዱሳነ፡ እምኔሆሙ፡ እስመ፡ ቀርበት፡ ዕለት፡ ከመ፡ እሙንቱ፡ ይድኅኑ።

³ ወበእማንቱ፡ መዋዕል፡ ይነብር፡ ኅሩይ፡ ዲበ፡ መንበሩ፡ ወኵሎ፡ ኅሊናተ፡ ጥበብ፡ እምኅሊና፡ አፉሁ፡ ያወፅእ፡ እስመ፡ እግዚአ፡ መናፍስት፡ ወሀቦ፡ ወሰብሖ።

⁴ ወበእማንቱ፡ መዋዕል፡ ይዘፍኑ፡ አድባር፡ ከመ፡ ሐራጊት፡ ወያንፈርዕፁ፡ ከመ፡ መሐስእ፡ ጽጉባነ፡ ሐሊብ፡ ወይከውኑ፡ ኵሎሙ፡ መላእክት፡ በሰማይ።

⁵ ወገጾሙ፡ ይበርህ፡ በፍሥሓ፡ እስመ፡ በእማንቱ፡ መዋዕል፡ ኅሩይ፡ ተንሥአ፡ ወምድር፡ ትትፌሣሕ፡ ወጻድቃን፡ ዲቤሃ፡ የኀድሩ፡ ወኅሩያን፡ ውስቴታ፡ የሐውሩ፡ ወያንሶስዉ።