1 Enoch 62

The Ethiopic Bible (Ge'ez)

¹ ወከመ፡ ዝ፡ አዘዘ፡ እግዚእ፡ ለነገሥት፡ ወለአዚዛን፡ ወለልዑላን፡ ወለኀያላን፡ ወለእለ፡ የኀድርዋ፡ ለምድር፡ ወይብል፡ ክሥቱ፡ አዕይንቲክሙ፡ ወአንሥኡ፡ አቅርንቲክሙ፡ እመ፡ ትክሉ፡ አእምሮቶ፡ ለኅሩይ።

² ወነበረ፡ እግዚአ፡ መናፍስት፡ ዲበ፡ መንበረ፡ ስብሐቲሁ፡ ወመንፈሰ፡ ጽድቅ፡ ተክዕወ፡ ዲቤሁ፡ ወነገረ፡ አፉሁ፡ ይቅትል፡ ኵሎ፡ ኃጥኣነ፡ ወኵሎ፡ ዐማፅያን፡ ወእምገጹ፡ ይትሀጐሉ።

³ ወይቀውሙ፡ በይእቲ፡ ዕለት፡ ኵሎሙ፡ ነገሥት፡ ወአዚዛን፡ ወልዑላን፡ ወእለ፡ ይእኅዝዋ፡ ለምድር፡ ወይሬእይዎ፡ ወየአምርዎ፡ ከመ፡ ይነብር፡ ዲበ፡ መንበረ፡ ስብሐቲሁ፡ ወጻድቃን፡ ይትኴነኑ፡ ቅድሜሁ፡ በጽድቅ፡ ወነገረ፡ በክ፡ አልቦ፡ ዘይትበሀል፡ በቅድሜሁ።

⁴ ወይመጽእ፡ ዲቤሆሙ፡ ሕማም፡ ከመ፡ ብእሲት፡ እንተ፡ ውስተ፡ ማሕምም፡ ወያዐጽባ፡ ወሊድ፡ ሶበ፡ ይመጽእ፡ ወልዳ፡ በአፈ፡ ማሕፀና፡ ወተዐጽብ፡ ለወሊድ።

⁵ ወይሬእይዎሙ፡ መንፈቆሙ፡ ለመንፈቆሙ፡ ወይደነግፁ፡ ወያቴሕቱ፡ ገጾሙ፡ ወይእኅዞሙ፡ ሕማም፡ ሶበ፡ ይሬእይዎ፡ ለዝኩ፡ ወልደ፡ ብእሲት፡ እንዘ፡ ይነብር፡ ዲበ፡ መንበረ፡ ስብሐቲሁ።

⁶ ወይሴብሕዎ፡ ወይባርክዎ፡ ወያሌዕልዎ፡ ነገሥት፡ አዚዛን፡ ወኵሎሙ፡ እለ፡ ይእኅዝዋ፡ ለምድር፡ ለዘይመልክ፡ ኵሎ፡ ዘኅቡእ።

⁷ እስመ፡ እምቅድም፡ ኅቡአ፡ ኮነ፡ ወልደ፡ ዕጓለ፡ እመሕያው፡ ወዐቀቦ፡ ልዑል፡ በቅድመ፡ ኀይሉ፡ ወከሠቶ፡ ለኅሩያን።

⁸ ወይዘራዕ፡ ማኅበረ፡ ቅዱሳን፡ ወኅሩያን፡ ወይቀውሙ፡ በቅድሜሁ፡ ኵሎሙ፡ ኅሩያን፡ በይእቲ፡ ዕለት።

⁹ ወይወድቁ፡ ኵሎሙ፡ ነገሥት፡ አዚዛን፡ ወልዑላን፡ ወእለ፡ ይመልክዋ፡ ለየብስ፡ በገጾሙ፡ ወይሰግዱ፡ ወይሴፈውዎ፡ ለዝኩ፡ ወልደ፡ ዕጓለ፡ እመሕያው፡ ወያስተበቍዕዎ፡ ወይስእሉ፡ ምሕረተ፡ እምኀቤሁ።

¹⁰ ወያጔጕኦሙ፡ እንከ፡ ውእቱ፡ እግዚአ፡ መናፍስት፡ ከመ፡ ያፍጥኑ፡ ወይፃኡ፡ እምቅድመ፡ ገጹ፡ ወገጾሙ፡ ይመልእ፡ ኀፍረተ፡ ወጽልመተ፡ ይትዌሰክ፡ ገጾሙ።

¹¹ ወይትመጠውዎሙ፡ መላእክተ፡ መቅሠፍት፡ ከመ፡ ይትፈደዩ፡ እምኔሆሙ፡ ዘገፍዕዎሙ፡ ለደቂቁ፡ ወለኅሩያነ፡ ዚኣሁ።

¹² ወይከውኑ፡ አርአያ፡ ለኅሩያኒሁ፡ ወጻድቃነ፡ ዚኣሁ፡ ቦሙ፡ ይትፌሥሑ፡ እስመ፡ መዓቱ፡ ለእግዚአ፡ መናፍስት፡ ዲቤሆሙ፡ ተዐርፍ፡ ወመቅሠፍቱ፡ ለእግዚአ፡ መናፍስት፡ ትሰክር፡ እምኔሆሙ።

¹³ ወጻድቃን፡ ወኅሩያን፡ ይድኅኑ፡ በይእቲ፡ ዕለት፡ ወገጾሙ፡ ለኃጥኣን፡ ወለዐማፅያን፡ ኢይሬእዩ፡ እምይእዜ።

¹⁴ ወእግዚአ፡ መናፍስት፡ ዲቤሆሙ፡ የዐርፍ፡ ወምስለ፡ ዝኩ፡ ወልደ፡ ዕጓለ፡ እመሕያው፡ የኀድሩ፡ ይበልዑ፡ ወይሰትዩ፡ ወይሰክቡ፡ ወይትነሥኡ፡ ለዓለመ፡ ዓለም።

¹⁵ ወተንሥኡ፡ ጻድቃን፡ ወኅሩያን፡ እምድር፡ ወኀደጉ፡ አትሕቶ፡ ገጾሙ፡ ወለብሱ፡ ልብሰ፡ ሕይወት።

¹⁶ ወውእቱ፡ ይከውን፡ ልብሰ፡ ሕይወት፡ በኀበ፡ እግዚአ፡ መናፍስት፡ ወአልባሲክሙኒ፡ ኢይበልዩ፡ ወስብሐቲክሙ፡ ኢየኀልቅ፡ በቅድመ፡ እግዚአ፡ መናፍስት።