1 Enoch 77

The Ethiopic Bible (Ge'ez)

¹ ይጼውዕዎ፡ ለነፋስ፡ ቀዳማዊ፡ ጽባሓዊ፡ እስመ፡ ቀዳማዊ፡ ውእቱ፡ ወይጼውዕዎ፡ ለካልእ፡ አዜብ፡ እስመ፡ ልዑል፡ ህየ፡ ይወርድ፡ ወፈድፋደ፡ ህየ፡ ይወርድ፡ ቡሩክ፡ ዘለዓለም።

² ወለነፋስ፡ ዘእምዕራብ፡ ስሙ፡ ንቱግ፡ እስመ፡ በህየ፡ የሐጽጹ፡ ኵሉ፡ ብርሃናተ፡ ሰማይ፡ ወይወርዱ።

³ ወራብዕ፡ ነፋስ፡ ዘስሙ፡ መስዕ፡ ይትከፈል፡ ሠለስተ፡ ክፍለ፡ ወአሐዱ፡ እምኔሆሙ፡ ማኅደር፡ ለሰብእ፡ ወካልእ፡ በአብሕርተ፡ ማያት፡ ወበቀላያት፡ ወበዖም፡ ወበአፍላግ፡ ወበጽልመት፡ ወበጊሜ፡ ወሣልስ፡ ክፍል፡ በገነተ፡ ጽድቅ።

⁴ ወሰብዐተ፡ አድባረ፡ ነዊኀነ፡ ርኢኩ፡ እለ፡ ይነውኁ፡ እምኵሉ፡ አድባር፡ እለ፡ ውስተ፡ ምድር፡ ወእምኔሆሙ፡ ይወፅእ፡ አስሐትያ፡ ወየኀልፍ፡ ወየሐውር፡ መዋዕል፡ ወዘመን፡ ወዓመት።

⁵ ወሰብዐተ፡ አፍላገ፡ ዲበ፡ ምድር፡ ርኢኩ፡ ዐበይት፡ እምኵሎሙ፡ አፍላግ፡ አሐዱ፡ እምኔሆሙ፡ ይመጽእ፡ እምዐረብ፡ ወውስተ፡ ባሕር፡ ዐቢይ፡ ይክዑ፡ ማዮ።

⁶ ወእልክቱ፡ ክልኤቱ፡ ይመጽኡ፡ እመስዕ፡ እስከ፡ ባሕር፡ ወይክዕዉ፡ ማዮሙ፡ በባሕረ፡ ኤርትራ፡ እምሥራቅ።

⁷ ወእለ፡ ተርፉ፡ አርባዕቱ፡ ይወፅኡ፡ በገቦ፡ መስዕ፡ እስከ፡ ባሕረ፡ ዚኣሆሙ፡ ባሕረ፡ ኤርትራ፡ ወክልኤቱ፡ በባሕር፡ ዐቢይ፡ ይሠወጡ፡ ወበህየ፡ ይቤሉ፡ መድበራ።

⁸ ሰብዐ፡ ደሰያተ፡ ዐበይተ፡ ርኢኩ፡ በባሕር፡ ወበምድር፡ ክልኤቱ፡ በምድር፡ ወኀምስቱ፡ በባሕር፡ ዐቢይ።