1 Enoch 80

The Ethiopic Bible (Ge'ez)

¹ ወበውእቱ፡ መዋዕል፡ አውሥአኒ፡ ኡርኤል፡ መልአክ፡ ወይቤለኒ፡ ነዋ፡ አርአይኩከ፡ ኵሎ፡ ኦ፡ ሄኖክ፡ ወኵሎ፡ ከሠትኩ፡ ለከ፡ ትርአዮ፡ ለዝ፡ ፀሓይ፡ ወለዝ፡ ወርኅ፡ ወለእለ፡ ይመርሕዎሙ፡ ለከዋክብተ፡ ሰማይ፡ ወለኵሎሙ፡ እለ፡ ይመይጥዎሙ፡ ግብሮሙ፡ ወአዝማኖሙ፡ ወሙፃኢሆሙ።

² ወበመዋዕለ፡ ኃጥኣን፡ የሐጽራ፡ ክራማት፡ ወዘርዐ፡ ዚኣሆሙ፡ ይከውን፡ ደኃራዊ፡ በምድሮሙ፡ ወበሙፋሮሙ፡ ወኵሉ፡ ግብር፡ ዘዲበ፡ ምድር፡ ይትመየጥ፡ ወኢያስተርኢ፡ በዘመኑ፡ ወዝናም፡ ይትከላእ፡ ወሰማይ፡ ታቀውም።

³ ወውእቱ፡ አዝማን፡ ፍሬ፡ ምድር፡ ደኃራዌ፡ ይከውን፡ ወኢይበቍል፡ በዘመኑ፡ ወፍሬ፡ ዕፅ፡ ይትከላእ፡ በዘመነ፡ ዚኣሁ።

⁴ ወወርኅ፡ ይዌልጥ፡ ሥርዐቶ፡ ወኢይትረአይ፡ በዘመነ፡ ዚኣሁ።

⁵ ወበእማንቱ፡ መዋዕለ፡ ይትረአይ፡ ሰማይ፡ ወይበጽሕ፡ ዓባር፡ በጽንፈ፡ ሠረገላት፡ ዐቢይ፡ በምዕራብ፡ ወይበርህ፡ ፈድፋደ፡ እምሥርዐተ፡ ብርሃን።

⁶ ወይስሕቱ፡ ብዙኃን፡ አርእስቲሆሙ፡ ለከዋክብተ፡ ትእዛዝ፡ ወእሉ፡ ይመይጡ፡ ፍናዊሆሙ፡ ወግብሮሙ፡ ወኢይትመየጡ፡ በአዝማነ፡ ዚኣሆሙ፡ እለ፡ ተአዘዘ፡ ሎሙ።

⁷ ወኵሉ፡ ሥርዐተ፡ ከዋክብት፡ ይትዐጸው፡ ላዕለ፡ ኃጥኣን፡ ወኅሊናሆሙ፡ ለእለ፡ ይነብሩ፡ ዲበ፡ ምድር፡ ይስሕቱ፡ ዲቤሆሙ፡ ወይትመየጡ፡ እምኵሉ፡ ፍናዊሆሙ፡ ወይስሕቱ፡ ወያመስልዎሙ፡ አማልክተ።

⁸ ወይበዝኅ፡ ላዕሌሆሙ፡ እከይ፡ ወመቅሠፍት፡ ይመጽእ፡ ዲቤሆሙ፡ ከመ፡ ያህጕሎሙ፡ ለኵሎሙ።