1 Enoch 9

The Ethiopic Bible (Ge'ez)

¹ ወአሜሃ፡ ሐወጹ፡ ሚካኤል፡ ወገብርኤል፡ ወሱሩያል፡ ወኡርያል፡ እምሰማይ፡ ወርእዩ፡ ብዙኀ፡ ደመ፡ ዘይትከዐው፡ በዲበ፡ ምድር፡ ወኵሎ፡ ዐመፃ፡ ዘይትገበር፡ በዲበ፡ ምድር።

² ወይቤሉ፡ በበይናቲሆሙ፡ ቃለ፡ ጽራሐቲሆሙ፡ ዕራቃ፡ ጸርሐት፡ ምድር፡ እስከ፡ አንቀጸ፡ ሰማይ።

³ ወይእዜኒ፡ ኦ፡ ቅዱሳነ፡ ሰማይ፡ ለክሙ፡ ይሰክዩ፡ ነፍሳተ፡ ሰብእ፡ እንዘ፡ ይብሉ፡ አብኡ፡ ለነ፡ ፍትሐ፡ ኀበ፡ ልዑል።

⁴ ወይቤሉ፡ ለእግዚኦሙ፡ ለንጉሥ፡ እስመ፡ እግዚኦሙ፡ ለአጋእዝት፡ ወአምላኮሙ፡ ለአማልክት፡ ወንጉሦሙ፡ ለነገሥት፡ ወመንበረ፡ ስብሐቲሁ፡ ውስተ፡ ኵሉ፡ ትውልድ፡ ዘለዓለም፡ ወስምከ፡ ቅዱስ፡ ወስቡሕ፡ ውስተ፡ ኵሉ፡ ትውልድ፡ ዓለም፡ ወቡሩክ፡ ወስቡሕ።

⁵ አንተ፡ ወገበርከ፡ ኵሎ፡ ወሥልጣነ፡ ኵሉ፡ ምስሌከ፡ ወኵሉ፡ ክሡት፡ በቅድሜከ፡ ወግሁድ፡ ወአንተ፡ ትሬኢ፡ ኵሎ፡ ወአልቦ፡ ዘይትከሀል፡ ይትኀባእ፡ እምኔከ።

⁶ ርኢኬ፡ ዘገብረ፡ አዛዝኤል፡ ዘከመ፡ መሀረ፡ ኵሎ፡ ዐመፃ፡ በዲበ፡ ምድር፡ ወአግሀደ፡ ኅቡኣተ፡ ዓለም፡ እለ፡ ይትገበራ፡ በሰማያት።

⁷ ወአመረ፡ ስብዓታተ፡ ስማዝያ፡ ዘአንተ፡ ወሀብኮ፡ ሥልጣነ፡ ከመ፡ ይኰንን፡ እለ፡ ምስሌሁ፡ ኅቡረ።

⁸ ወሖሩ፡ ኀበ፡ አዋልደ፡ ሰብእ፡ ኅቡረ፡ ወሰከቡ፡ ምስሌሆን፡ ለእልኩ፡ አንስት፡ ወረኵሱ፡ ወአግሀዱ፡ ሎን፡ እሎንተ፡ ኃጣውአ።

⁹ ወአንስትኒ፡ ወለዳ፡ ረዓይተ፡ ወበዝ፡ መልአት፡ ኵላ፡ ምድር፡ ደመ፡ ወዐመፃ።

¹⁰ ወይእዜኒ፡ ናሁ፡ ይጸርሑ፡ ነፍሳተ፡ እለ፡ ሞቱ፡ ወይሰክዩ፡ እስከ፡ አንቀጸ፡ ሰማይ፡ ወዐርገ፡ ገዐሮሙ፡ ወኢይክሉ፡ ወፂአ፡ እምቅድመ፡ ገጸ፡ ዐመፃ፡ ዘይትገበር፡ በዲበ፡ ምድር።

¹¹ ወአንተ፡ ተአምር፡ ኵሎ፡ ዘእንበለ፡ ይኩን፡ ወአንተ፡ ተአምር፡ ዘንተ፡ ወዘዚኣሆሙ፡ ወአልቦ፡ ዘትነግረነ፡ ወምንት፡ መፍትው፡ ንረስዮሙ፡ በእንተ፡ ዝንቱ።