1 Enoch 92

The Ethiopic Bible (Ge'ez)

¹ ዘተጽሕፈ፡ እምሄኖክ፡ ጸሐፈ፡ ዝ፡ ኵሉ፡ ትምህርተ፡ ጥበብ፡ እምኵሉ፡ ሰብእ፡ ስቡሕ፡ ወመኰንነ፡ ኵሉ፡ ምድር፡ ለኵሎሙ፡ ውሉድየ፡ እለ፡ የኀድሩ፡ ዲበ፡ ምድር፡ ወለትውልድ፡ ደኃራውያን፡ እለ፡ ይገብሩ፡ ርትዐ፡ ወሰላመ።

² ኢትሕዘን፡ መንፈሰክሙ፡ በአዝማን፡ እስመ፡ መዋዕለ፡ ወሀበ፡ ቅዱስ፡ ወዐቢይ፡ ለኵሉ።

³ ወይትነሣእ፡ ጻድቅ፡ እምንዋም፡ ይትነሣእ፡ ወየኀልፍ፡ በፍኖተ፡ ጽድቅ፡ ወኵሉ፡ ፍኖቱ፡ ወምሕዋሪሁ፡ በኂሩት፡ ወበሣህል፡ ዘለዓለም።

⁴ ይሠሀሎ፡ ለጻድቅ፡ ወሎቱ፡ ይሁብ፡ ርትዐ፡ ዘለዓለም፡ ወይሁብ፡ ሥልጣነ፡ ወይከውን፡ በኂሩት፡ ወበጽድቅ፡ ወየሐውር፡ ብርሃን፡ ዘለዓለም።

⁵ ወኀጢአት፡ በጽልመት፡ ትትሀጐል፡ እስከ፡ ለዓለም፡ ወኢትትረአይ፡ እንከ፡ እምይእቲ፡ ዕለት፡ እስከ፡ ለዓለም።