1 Meqabyan 9

The Ethiopic Bible (Ge'ez)

¹ ቈላተ፡ ጊላቡሂ፡ ወአድባረ፡ ሊባኖስ፡ ሶበ፡ ኢወርድ፡ ላዕሌሆሙ፡ ዝናመ፡ ምሕረት፡ እምኀበ፡ እግዚአብሔር፡ ኢያብቍሉ፡ ሣዕረ፡ ለእንስሳ፡ ወለአራዊት።

² ወአድባረ፡ ገልዓድኒ፡ ወቈላተ፡ ኢለምኒ፡ ኢይሁብ፡ ሐመልማለ፡ ለዓጣሌ፡ ወለአባሕኵ፡ እለ፡ ይትረእዩ፡ ወለእንስሳ፡ ገዳምኒ፡ ወይጠል፡ ወቶራት፡ ወኀያላት።

³ ወከማሁ፡ ዕልዋን፡ ወመናፍቃን፡ እለ፡ ቀዲሙ፡ አጥረዋይ፡ ለዕልወት፡ ወለስሕተት፡ ለእመ፡ ኢወረደ፡ ላዕሌሆሙ፡ ጠለ፡ ምሕረት፡ እምኀበ፡ እግዚአብሔር፡ ኢትይነሥኡ፡ ሙታን፡ ወመሠርያን፡ ወምጠዓውያን፡ ቆጵሮሰ፡ ወዲማሶ፡ መስተዋድያን።

⁴ ወእለ፡ ይነብሩ፡ ሰገለ፡ ወሥራየ፡ ወመስተቃትላነ።

⁵ ወእለ፡ ይዜምው፡ ዘእንበለ፡ ሕግ፡ ወአትናውያን፡ ወሜዶን፡ እለ፡ ይትአመኑ፡ በጣዖቶሙ፡ ወየሐልዩ፡ ሎሙ፡ ወይትወነዩ፡ ሎሙ፡ በከበሮ፡ ወበመሰንቆ፡ ወበእንዚራ።

⁶ ወየዓብዱ፡ ምስለ፡ ጣዖቶሙ፡ ወይዜምዉ፡ በግብረ፡ እደዊሆሙ፡ እለ፡ ኢያድኅኑ፡ ርእሶሙ፡ እለ፡ እሙንቱ፡ ይትኰነኑ፡ በዕለተ፡ ዳይን፡ አመ፡ ትንሣኤ።

⁷ አአብድ፡ ወአእዩየ፡ ሕሊና፡ ይመስለከኑ፡ ዘኢይትነሥኡ፡ ምውታን።

⁸ ኢተሐሊኪ፡ ከመዝ፡ እስመ፡ ኢትነውም፡ ህየ፡ ሶበ፡ ይትነፋሕ፡ ቀርን፡ በትንሣኤ፡ ሙታን፡ በአፈ፡ ሚካኤል፡ ሊቀ፡ መላእክት።

⁹ አድባር፡ ወአውግር፡ ይቴሐቱ፡ አፍላግ፡ ወማዕምቅ፡ ይኤርዩ፡ ወይከውኑ፡ መጽያሕቶ፡ ርቱዓ።

¹⁰ ወይከውን፡ ትንሣኤ፡ ለኵሉ፡ ዘሥጋ።