2 Meqabyan 11

The Ethiopic Bible (Ge'ez)

¹ ተዘከሮ፡ ለሙሴ፡ ብእሴ፡ እግዚአብሔር፡ በጸሎቱ፡ ወበትሕትናሁ፡ እንዘ፡ ይርኢ፡ ዘመጠነ፡ ሕዝቦ፡ ኢተምዕዓ፡ ወኢያኅጐለ፡ አላ፡ ለእለ፡ ሐመይዎ፡ እኁሁ፡ ወውእቱ፡ ለእለ፡ ፈቀደ፡ እግዚአብሔር፡ ያጠፍዖሙ፡ በምዕር፡ አስተስረየ፡ ሎሙ፡ ኀበ፡ እግዚአብሔር፡ በየዋሃት፡ እንዘ፡ ይብል፡ መሐር፡ እግዚአብሔር፡ ሕዝበከ፡ ወኢትትሐይ፡ እስመ፡ አበሱ፡ ሕዝብከ፡ በቅድሜከ።

² ወሊተሰ፡ ለኃጥእ፡ ገብርከ፡ ተሣሃለኒ፡ እስመ፡ አበስኩ፡ አቅድሜከ፡ ወለእሙንቱኒ፡ ሥረይ፡ ሎሙ፡ እስመ፡ መሐሪ፡ አንተ፡ ወመስተሣህል።

³ ወከመዝ፡ አስተሥርየ፡ ሎሙ፡ ለአለ፡ ሐመይዎ።

⁴ ወበእንተ፡ ዝንቱ፡ ተአምየ፡ የዋሃ።

⁵ ወአፍቀሮ፡ እግዚአብሔር፡ ፈድፋደ፡ እምኬሎሙ፡ ድፈቂቀ፡ ሌዋውያን፡ አኃዊሁ፡ ወአስ፡ ተማሰሎ፡ ከመ፡ እግዚአብሔር፡ በኀቤሆሙ፡ እስመ፡ ለካህናትኒ፡ ይሰይሞሙ።

⁶ ወለእለ፡ ተዓደወ፡ ደቂቀ፡ ቆሬ፡ እሥጠሞሙ፡ መተሕተ፡ ምድር፡ ወአውረዶሙ፡ ውስተ፡ ሲኦል፡ ሕያዋኒሆሙ፡ በነፍስ፡ ወበሥጋ፡ ምስለ፡ ደባትሪሆሙ፡ ወእንስሳሆሙ፡ ወኵሉ፡ ቃሉ፡ በከመ፡ ነበበ፡ ይትገበር፡ ሎቱ፡ ከመ፡ እግዚአብሔር፡ እስመ፡ አፍቀሮ፡ ለእግዚአብ፡ ሔር፡ አምላኩ፡ ወኢተዓደወ፡ እምትእዛዙ።

⁷ ወከማሁ፡ አንተሂ፡ ለእመ፡ ኢተዓደውከ፡ ትእዛዘ፡ እግዚአብሔር፡ ይገብር፡ ለከ፡ እግዚአ፡ ብሔር፡ ፈቃደከ፡ ወይሠምር፡ ቃለከ፡ ወየዓቅብ፡ መንግሥተከ።

⁸ ወደቂቀ፡ ቆሬ፡ ወዓሳፍ፡ እለ፡ ተዓደዉ፡ እምትእዛዙ፡ ለሙሴ፡ ወአንጐርጐሩ፡ ላዕሌሁ፡ በእንተ፡ ዘይቤሎሙ፡ አርትዑ፡ ነፍስክሙ፡ ለእግዚአብሔር።

⁹ ወይቤልዎ፡ ኢኮነኑ፡ ንሕነሰ፡ ደቂከ፡ ሌዊ፡ ዘንገብር፡ ግብረ፡ ክህነት፡ በውስተ፡ ደብተራ፡ ዘመርውል።

¹⁰ ወነሥኡ፡ መዓጥኒሆሙ፡ ከመ፡ ይዕጥኑ፡ ወሖሩ፡ ወዓጠኑ፡ ወኢተወከፈ፡ እግዚአብሔር፡ ጸሎቶሙ፡ ወበእሳተ፡ መዓጥኒሆሙ፡ ወዕዩ፡ ወተመስዉ፡ ከመ፡ ሰምዕ፡ ዘይትመሰው፡ በእሳተ፡ ወኢተርፈ እምውስቴቶሙ፡ ወኢአፅምቲሆሙ፡ ወኢአልባሆሙ፡ ዘእንበለ፡ ማዕጠንት፡ ዘብርት፡ ዘአግብኡ፡ ውስተ፡ ቤተ፡ እግዚአብሔር፡ ዘበትእዛዘ፡ እግዚአብሔር፡ እስመ፡ ይቤ፡ ተቀደሰ፡ መዓጥኒሆሙ፡ በውዕየት፡ ሥጋሆሙ።

¹¹ ወበእንተዝ፡ ይቤሎሙ፡ እግዚአብሔር፡ ለሙሴ፡ ወለአሮን፡ አስተጋብዑ፡ መዓጥኒሆሙ፡ ውስተ፡ ደብተብራ፡ ወይኩን፡ ለቤትየ፡ ግበሪሃ፡ ወኵሉ፡ ዘሠራዕኩ፡ ላቱ፡ እምአፍኣ፡ እስከ፡ ውሥጥ።

¹² ወዓሠነየ፡ ግበሪሃ፡ ለቅድስት፡ ደብተራ፡ ምስሐለ፡ ወኆፃደተ፡ ወኪሩበ፡ ወአብሕርተ።

¹³ ወመቅድሐ፡ ወመሣውረ፡ ወመዋድደ፡ ወዓፀደ፡ ገድገድኒ፡ ለደብተራ፡ ጻሕራተ፡ ወመሥ፡ ዋዕተ፡ ዘይሠውዑ፡ በውስተ፡ ደብተራ፡ መርጡል።

¹⁴ ወመሥዋዕተ፡ ዘፈቃድ፡ ወመሥዋዕተ፡ ዘመድኃኒት፡ ወመሥዋዕተ፡ ብፅዓት፡ ወዘበእንተ፡ ኃጢአት፡ ወመሥዋዕተ፡ ዘበሕጉ።

¹⁵ ወኵሎ፡ ዘአዘዞ፡ ለሙሴ፡ በውስተ፡ ደብተራ፡ መርጡል፡ ከመ፡ ይግበሩ፡ ባቲ፡ አዘዞሙ።

¹⁶ ወኢያስተቱ፡ ተቀንዮ፡ ለአምላኮሙ፡ ከመ፡ ይስባሕ፡ ስሙ፡ በላዕሌሆሙ፡ በውስተ፡ ደብተራ፡ ሕጉ፡ ለእግዚአብሔር፡ አምላኮሙ፡ ዘአሰፈዎሙ፡ ከመ፡ የሃቦሙ፡ ርስተ፡ አበዊሆሙ፡ ምድረ፡ አንተ፡ ትውኅዘ፡ ሐሊበ፡ ወመዓረ፡ ዘመሐለ፡ ሎቱ፡ ለአብርሃም።

¹⁷ ወተካየደ፡ ለይስሐቅ፡ ወዓቀመ፡ ሰምዓ፡ ለያዕቆብ።

¹⁸ ወለሙሴ፡ ወለአሮን፡ በውስተ፡ ደብተራ፡ ሰምዕ።

¹⁹ ወለሳሙኤል፡ ወለኤልያስ፡ በኢየሩሳሌም፡ በውስተ፡ ደብተራ፡ በቤተ፡ መቅደስ፡ በኀበ፡ ሐነጸ፡ ሰሎሞን፡ እስከ፡ ይከውን፡ ቤተ፡ እግዚአብሔር፡ ወምዕራፈ፡ ስሙ፡ ለልዑል፡ ወማሕደሮ፡ ለቅዱስ፡ እስራኤል።

²⁰ እስመ፡ ምሰአል፡ ወምስትሥራየ፡ ኃጢአተ፡ ይእቲ፡ በኀበ፡ ያስተርኢ፡ ለካህናቲሁ፡ ለእለ፡ የሐውሩ፡ በየዋሃተ።

²¹ ወኀበ፡ ይሰምዕ፡ ጸሎቶሙ፡ ለእለ፡ ይገብሩ፡ ፈቃደ።

²² አኀበ፡ ይሠራዕ፡ ሕጉ፡ ለእግዚአብሔር፡ ቅዱስ፡ እስራኤል።

²³ ወበኀበ፡ ይትገበር፡ ጽንሐሐ፡ መሥዋዕት፡ ወዕጣን፡ ለመዓዛ፡ ሠናይ፡ ለእግዚአብሔር፡ ቅዱስ፡ እስራኤል።

²⁴ ወይትናገር፡ በመልዕልተ፡ ምስሐል፡ በደብተራ፡ መርጡል፡ ወያስተርኢ፡ ስብሐቲሁ፡ ለእግዚአብሔር፡ ለኅሩያኒሁ፡ ደቂቀ፡ ያዕቆብ፡ ወቅዱሳኒሁ፡ እለ፡ የሐውሩ፡ በትእዛዙ፡ ወኵነኔሁ፡ ለእግዚአብሔር።

²⁵ ወእለሰ፡ ይትዔየሩ፡ ይከውኑ፡ ከመ፡ ደቂቀ፡ ቆሬ፡ እለ፡ ውኅጠቶሙ፡ ምድር፡ ወከማሁ፡ ኃጥአን፡ ሀለዎሙ፡ ይትወደዩ፡ ውስተ፡ ኵነኔ፡ ነደ፡ እሳት፡ እንተ፡ አልባቲ፡ ሙፆዕ፡ እስከ፡ ለዓለም።