2 Meqabyan 14

The Ethiopic Bible (Ge'ez)

¹ ሊተሰ፡ የኃዝነኒ፡ ፈድፋደ፡ ወያቴክዘኒ፡ ወይቀልየኒ፡ ልብየ፡ በእንተ፡ አይሁድ፡ ወሳም፡ ራውያን፡ ወፈሪሳውያን፡ ወሰዱቃውያን፡ እለ፡ ኢየአምኑ፡ ትንሣኤ፡ ምውታን፡ አይሁድ፡ ይብሉ፡ ንብላዕ፡ ወንሰተይ፡ ጌሠማ፡ ንመውት፡ ወበህየ፡ አልቦ፡ ዘንሬኢ።

² ወሳምራውያንሰ፡ ይብሉ፡ ሥጋነሰ፡ ኢይትነሣእ፡ እስመ፡ ፀበለ፡ ይከውን።

³ ወእመሰ፡ ይከውን፡ ትንሣኤ፡ ትንሣኤ፡ ነፍሳቲነ፡ ነአምን፡ እስመ፡ ነፍሰ፡ እመኒ፡ ሞተ፡ ሥጋ፡ ኢትመውት፡ እስመ፡ ከመ፡ ነፋስ፡ ይእቲ፡ እንተ፡ ኢትትረአይ፡ ወከመ፡ ድምፀ፡ ነጐድጓድ፡ ወኢይብልዋ፡ ነያ፡ ወኢታስተርኢ።

⁴ ወሥጋነሰ፡ ትትረአይ፡ በኵሉ፡ ወትከውን፡ ሐመደ፡ ወፀበለ፡ እስመ፡ አራዊት፡ ይበልዕዋ፡ ወዕፄያትኒ፡ ይበልዕዋ፡ በውስተ፡ መቃብር።

⁵ ወእሙንቱኒ፡ እለ፡ በልዕዋ፡ ይከውኑ፡ ሐመደ፡ ወኢይትረከብ፡ ዓሠሮሙ፡ እስመ፡ ከመ፡ ሣዕር፡ ይከውኑ፡ ወከመ፡ ዘኢትፈጥሩ፡ ኮኑ፡ ሐመደ።

⁶ ወበይእቲ፡ ይትረከቡ፡ ሥጋት፡ እለ፡ በልዩ፡ ወከመዝ፡ ይብሉ፡ ፈሪሳውያን፡ ትንሣኤ፡ ምውታንሰ፡ ነአምን፡ ወባሕቱ፡ ያለብሶሙ፡ ለነፍሳት፡ በሰማያት፡ ካልዓ፡ ሥጋ፡ ዘኢኮነ፡ ዘበምድር።

⁷ ወከመዝ፡ ይብሉ፡ ሰዱቃውያን፡ እምአመ፡ ወፅአት፡ ነፍስነ፡ እምሥጋነ፡ ኢንትነሣእ፡ እምውታን፡ ወአልቦሙ፡ ትንሣኤ፡ ሙታን፡ ኢለነፍስ፡ ወኢለሥጋ፡ ወእምከመ፡ ሞትነ፡ ኢንትነሣእ።

⁸ ወበእንተ፡ ዝንቱ፡ የዓብዱ፡ ፈድፋደ፡ ወያቲክዘኒ፡ በእንተአሆሙ፡ እስመ፡ ይትናገሩ፡ ጽርፈት፡ ላዕለ፡ እግዚአብሔር፡ ወስብሐቲሁ።

⁹ ወአልቦሙ፡ ተስፋ፡ ለድኂን፡ እስመ፡ ኢተአመንዎ፡ ለእግዚአብሔር፡ ለዘያጸድቆሙ፡ ወባሕቱ፡ ተስፋ፡ አልቦሙ፡ ለድኂን፡ ወትንሣኤ፡ ሙታን።

¹⁰ ወአይሁዳዊ፡ ዕውር፡ ታሰተዓብይኑ፡ ለእግዚአብሔር፡ ዘአምጽአከ፡ እምኀበ፡ ኢሀሎከ፡ ወእንዘ፡ ምራት፡ ረሰየከ፡ ሰብአ፡ ይሥዕነከሁ፡ ዘዘርዓከ፡ ዓብቍሎ፡ ነፍስከ፡ ወሥጋከ፡ በአርዓያሁ፡ ወበአምሳሌሁ።

¹¹ ወኢትትሐሰብኪ፡ ከመዝ፡ እስመ፡ ኢታመሥጥ፡ እምእዴሁ፡ ለእግዚአብሔር፡ ትትነሣ፡ እኬ፡ እንዘ፡ ኢትፈክድ፡ ወትትኳነን፡ እንዘ፡ ኢትሠምር፡ እስመ፡ ሀብለ፡ ሲኦል፡ ውስተ፡ ክሣድከ፡ ሀለወ፡ ዘተእኅዝከ፡ ዛቲ፡ አመ፡ ዕለት፡ ሞትከ።

¹² እስመ፡ በውስተ፡ ከርሠ፡ እምከ፡ ትሠርፅ፡ ለከ፡ እምጕንደ፡ ሲኦል፡ ይእቲ፡ ሀብል፡ እንተ፡ ይወድይዋ፡ ውስተ፡ ክሣድከ፡ ወሶበ፡ ትልህቅ፡ አንተ፡ ወከማሁ፡ ትልህቅ፡ ይእቲ።

¹³ ወሶበ፡ ትመውት፡ አንተ፡ ይወድይዋ፡ ውስተ፡ ክሣድከ፡ ወሶበ፡ ይስህብዋ፡ ጕንዳ፡ ታመጽኦሙ፡ ይእቲ።

¹⁴ ወትስህብ፡ አዕፁቂሃ፡ እስመ፡ ሀለዉ፡ ኵሎሙ፡ ኃጥአን፡ እኁዛን፡ ውስቴታ፡ ከመ፡ አህባል፡ ሀሎ፡ ውስተ፡ ክሣውዲሆሙ።

¹⁵ ወየመጽአ፡ ኵሎን፡ ነፍሳተ፡ ኃጥአን፡ እምኀበ፡ ሀለዋ፡ እምአጽናፈ፡ ሰማይ፡ ወከማሁ፡ ትስሕበከ፡ ሀብልከ፡ ከመ፡ ታምጽእ፡ ነፍሰከ፡ እምኀበ፡ ሀለዉከ፡ ወታገብዓከ፡ ውስተ፡ ፈለገ፡ ሲኦል።

¹⁶ ወሥጋከኒ፡ ተአቲቶ፡ ወዊኖ፡ ምስብዒተ፡ በከመ፡ ሥጋሁ፡ ለአቡነ፡ አዳም፡ ታነሥአከ፡ ጠለ፡ ምሕረቱ፡ ለእግዚአብሔር፡ ወበህየ፡ ትትፈደይ፡ በከመ፡ ገብርከ፡ አበሰ፡ ወኃጢአተ፡ በከመ፡ ኢአሚኖትከ።

¹⁷ ወኢይመስልከ፡ በከመ፡ ዘታስት፡ ባዕደ፡ ወትስሐት፡ ለሊከ፡ ዘትነብር፡ ውስተ፡ መቃብር፡ በስሕተትከ፡ ወትብል፡ አልቦ፡ ትንሣኤ፡ ሙታን፡ ከመ፡ ይስሕቱ፡ እንትእዛዘ፡ እግዚአብሔር።

¹⁸ ወመኑ፡ የኃድገከ፡ ውስተ፡ ሐመድ፡ ወመሬት፡ ዳዕሙ፡ ያነሥአከ፡ ከመ፡ ይፍዲከ፡ በከመ፡ ምግባሪከ፡ ዘገበርከ።

¹⁹ ወአሜሃሰ፡ ይመጽእ፡ እመሂ፡ ዘውስተ፡ ነፋሳት፡ መናፍስቲከ፡ ወእመሂ፡ ዘውስተ፡ ምድር፡ ፀበልከ፡ ወእመሂ፡ ዘውስተ፡ እሳት፡ ላህብከ።

²⁰ ወእመሂ፡ መንፈሰ፡ ሕይወት፡ ዘተነፍሐ፡ ላዕሌከ፡ በውስተ፡ ዓፀደ፡ ጽልመት።

²¹ ዘትዓዕዋቀ፡ ወነፍሳተ፡ ጻድቃንሰ፡ ውስተ፡ ገነት፡ በፍሥሐ፡ ይትዓፅዋ።

²² ወአንተሰ፡ ኦአይሁዳዊ፡ ወሳምራዊ፡ ወፈሪሳዊ፡ ወሰዱቃዊ፡ እስከ፡ ጊዜ፡ ኵነኔከ፡ ትት፡ ዓሠር፡ በውስተ፡ ጽልመት።

²³ ወአሜሃ፡ ትሬኢ፡ በከመ፡ ይፈድየከ፡ እግዚአብሔር፡ በከመ፡ ምግባሪከ፡ በእንተ፡ ዘአስ፡ ሐተከ፡ ሉብኦ።

²⁴ ወትቤሎሙ፡ ኢየሐይዉ፡ ምውታን፡ ንብላዕ፡ ወንስተይ፡ እስመ፡ ጌሠመ፡ ንመውት፡ ወትብል፡ በካልከ፡ እንዘ፡ ትትነብር፡ ዲበ፡ መንበረ፡ ሙሴ፡ አልቦ፡ ትንሣኤ፡ ሙታን።

²⁵ ወበእንተዝ፡ ስሕተከ፡ እንዘ፡ ተአምር፡ መጽሐፈ፡ ኦሪት፡ ወትሜህር፡ ቃለ፡ መጻሕፍት፡ ወእምታሰሕት፡ ሰብእ፡ እምኀሰየከ፡ ሶበ፡ ኢትምህርከ፡ ወኢያአመርከ።

²⁶ ቃለ፡ መጻሕፍት፡ እምታዕሉ፡ ሕዝበ፡ እግዚአብሔር፡ በአከየ፡ ትምህርትከ፡ ወበዘኢይበቍዕ፡ ቃልከ።

²⁷ ወእንተሰ፡ ትትዓሠይ፡ በከመ፡ ምግባሪከ፡ ወበከመ፡ ፍሬ፡ ከናፍሪከ፡ እስመ፡ ኢያደሉ፡ እግዚአብሔር፡ ለገጽ፡ ወለእለ፡ ይሜህሩ፡ ሠናየ፡ የዓሥዮሙ፡ እምሠናያት፡ ዘአስተደለወ፡ ለእለ፡ ይፈቅርዎ።

²⁸ ወአንተሰ፡ አልብከ፡ ኀበ፡ ታመሥጥ፡ እምእዴሁ፡ ለዘይኳንነከ፡ ወሀሎ፡ ይፍዲከ፡ በከመ፡ ምግባሪከ፡ እስመ፡ አንተ፡ ወእለ፡ መሀርኮሙ፡ ኅቡረ፡ ትትኳነኑ።

²⁹ አእምርኩ፡ ከመ፡ ይትነሥኡ፡ ምውታን፡ እመሂ፡ እለ፡ ዓቀቡ፡ ትእዛዞ፡ ይትነሥኡ፡ ወኢ፡ ይትሃከሎሙ፡ ቀዊም፡ እስመ፡ ትእዛዙ፡ ያወፅኦሙ፡ ወበከመ፡ ታወፅዕ፡ ምድር፡ ሣዕረ፡ ሶበ፡ ይዘብጣ፡ ዝናም።

³⁰ ወከመ፡ ታወፅኦ፡ ርጥብት፡ ዕፅ፡ ቈፅለ፡ ሶበ፡ አርወያ፡ ለምድር፡ ዝናመ፡ ወበከመ፡ ትገብር፡ ፍሬ፡ ሥርናይ፡ አው፡ ሰብለ፡ እክል፡ ወኢይትከሃል፡ ከመ፡ ትክላዕ፡ ፍሬሃ፡ ለአመ፡ ሠምረ፡ እግዚአብሔር።

³¹ ወከመ፡ ፅንሰተ፡ ሶበ፡ ይመጽአ፡ ሕማማ፡ ኢትክል፡ ዓፂወ፡ ማኅፀና፡ እምከመ፡ ሰምዓት፡ ቃለ፡ እግዚአብሔር፡ አላ፡ ትወልዶሙ፡ ሶቤሃ፡ በምዕር፡ እስመ፡ ጠል፡ ዘእምኀበ፡ እግዚአብሔር፡ ይወርድ፡ ላዕሌሃ።

³² ወከማሁ፡ ምድርኒ፡ ታወፅዕ፡ ዕለተ፡ ተዘግቡ፡ ኀቤሃ፡ ኢትክል፡ ዓፂወ፡ ማኅፀና፡ እምከመ፡ ሰምዓት፡ ቃለ፡ እግዚአብሔር፡ አላ፡ ትወልዶሙ፡ ሶቤሃ፡ በምዕር፡ እስመ፡ ጠል፡ ዘእምኀበ፡ እግዚአብሔር፡ ይወርድ፡ ላዕሌሃ።

³³ ወይትጋብኡ፡ ሥጋት፡ ውስተ፡ መካናቲሆሙ፡ ኀበ፡ ወድቀ፡ አብድንቲሆሙ፡ ወይትረ፡ ኃው፡ አብያተ፡ መዛግብተ፡ ነፍሳት፡ ወይገብኡ፡ ነፍሳት፡ ውስተ፡ ሥጋት፡ እምኀበ፡ ወፅአ፡ ቀዲሙ።

³⁴ ወበንፍሐተ፡ ከርን፡ ይትነሥኡ፡ ሙታን፡ ከመ፡ ቅጽበተ፡ ዓይን፡ ወይቀውሙ፡ ቅድመ፡ እግዚአብሔር፡ ወየዓሥዮሙ፡ በከመ፡ ግብረ፡ እደዊሆሙ።

³⁵ አሜሃ፡ ትሬኢ፡ ከመ፡ ትትነሣእ፡ እምውታን፡ ወታነክር፡ በኵሉ፡ ምግባሪከ፡ ዘገበርከ፡ አንተ፡ በዲበ፡ ምድር፡ ወሶበ፡ ትሬኢዮሙ፡ ጽሑፋነ፡ ቅድመ፡ አዕይንቲከ፡ ወይእተ፡ አሚረ፡ ትኔስሕ፡ በኀበ፡ ኢይበቍአከ።

³⁶ ወተአምረ፡ ከመ፡ ትትነሣእ፡ እሙታን፡ ወትትፈደይ፡ በከመ፡ ምግባሪከ፡ ዘገብርከ።