3 Meqabyan 5

The Ethiopic Bible (Ge'ez)

¹ አእምሮ፡ ለዘፈጠርከ፡ ወኢትርሥዖ፡ ለዘአፅንዓከ፡ ወአድኃነከ፡ ቅዱሰ፡ እስራኤል፡ እስመ፡ እንዘ፡ መሬት፡ አንተ፡ ረሰየከ፡ በአርአያሁ፡ ወበአምሳሌሁ፡ ወሤመከ፡ ውስተ፡ ገነት፡ ከመ፡ ትትፈጋዕ፡ ወትትገብራ፡ ለምድር።

² ወሶበ፡ አለውከ፡ ትእዛዞ፡ አውፅአከ፡ እምህየ፡ ውስተ፡ ዛቲ፡ ምድር፡ ይብስት፡ ምድረ፡ ሦክ፡ ወአሜከላ፡ አንተ፡ ረገማ፡ በእንቲአከ።

³ እስመ፡ አንተ፡ ምድር፡ ወይእቲ፡ ምድር፡ ወአንተ፡ ሐመድ፡ ወይእቲ፡ ሐመድ፡ ወአንተ፡ መሬት፡ ወይእቲ፡ መሬት፡ ወትሴሰይ፡ እምኔሃ፡ ወትገብአ፡ ኀቤሃ፡ ወትከውን፡ ሐመደ፡ እስከ፡ አመ፡ ፈቀደ፡ ከመ፡ ያንሥእከ፡ ወያሐትተከ፡ ኵሎ፡ ዘገበርከ፡ አበሰ፡ ወኃጢአተ።

⁴ ውእተ፡ ጊዜ፡ አእምር፡ ዘታውሥእ፡ ወትዘከር፡ በዝየ፡ ዘገበርከ፡ እኩየ፡ ወሠናየ፡ ወድሉ፡ ወምክር፡ ለእመ፡ ይበዝኅ፡ እኩይ፡ ወለእመ፡ ይበዝኅ፡ ሠናይ።

⁵ ወለእመ፡ አብዛኅኮ፡ ለሠናይ፡ ሠናይ፡ ለከ፡ ከመ፡ ትትፈሣሕ፡ ወትትኃሠይ፡ በትንሣኤ፡ ሙታን።

⁶ ወለእመ፡ አብዛኅኮ፡ ለእከይ፡ አሊ፡ ለከ፡ እስመ፡ ትትፈደይ፡ ብበከ፡ ግብረ፡ እደዊከ፡ ወበከመ፡ እከየ፡ ሕሊናከ፡ ወበከመ፡ ትፀውጎ፡ ለእኁከ፡ ወበከመ፡ ኢትፈርሆ፡ ለእግዚአብሔር፡ ትት፡ ፈደይ፡ በከመ፡ ምግባሪከ።

⁷ ወበከመ፡ ትሔስዎ፡ ለቢጽከ፡ ወትምሐል፡ በሐሰት፡ ስመ፡ እግዚአብሔር፡ ትትፈደይ፡ በከመ፡ ምግባሪከ።

⁸ እስመ፡ ትረሰዮ፡ ሐሰተ፡ ለቃልከ፡ ከመ፡ ይኩን፡ እሙነ፡ በአስተማሰሎ፡ ለቢጽከ፡ ወአንተሰ፡ ተአምር፡ ከመ፡ ሐሰተ፡ ትነብብ።

⁹ ወለእለሰ፡ ምስሌከ፡ ትቀውም፡ ከመ፡ ጽድቅ፡ ቃልከ፡ እንዘ፡ ታስተአምኖሙ፡ ወታበዝኅ፡ ነገረ፡ ኀበ፡ ዘኢኮነ፡ እሙነ፡ ጽድክ፡ ቃልከ፡ ወትትፈደይ፡ በከመ፡ ምግባሪከ፡ ወበከመ፡ አንተ፡ ትብል፡ እሁበከ፡ ኀበ፡ ዘኢትሁቦ፡ ለቢጽከ፡ ወዘትሔሰዎ፡ ለካልዕከ።

¹⁰ ወሶበ፡ ትብል፡ በንጹሕ፡ ልብከ፡ እሑብ፡ ያጸንሑከ፡ አጋንንት፡ ከመ፡ ከለባት፡ ወያረሥዑከ፡ ኵሎ፡ እመኒ፡ ነሣእከ፡ ወፈቀድከ፡ ከመ፡ ተሀብ፡ ያፈትወከ፡ ንዋየ፡ ዓለም፡ ከመ፡ ትዝግብ፡ ለዘኢይበቍዓከ፡ ወለዘኢትበልዕ፡ እስመ፡ ይቤ፡ ይዘግቡ፡ ወኢየአምሩ፡ ለዘያስተጋብዑ።

¹¹ ወካዕበ፡ ይቤ፡ ሐሳውያን፡ ደቂቀ፡ እጓለ፡ እመሕያው፡ ይዔምፁ፡ መዳልወ፡ ወእሙንቱሰ፡ እምከንቱ፡ ውስተ፡ ከንቱ፡ ክመ።

¹² ኦሰብእ፡ ኢትለፈውዋ፡ ለዓመፃ፡ በዐምፆ፡ መዳልው፡ ወበዓምፆ፡ መስፍርት፡ ወበቀሲጠ፡ ንዋየ፡ ባዕድ፡ ወደምሮ፡ ኀበ፡ ንዋይክሙ፡ በዓመፃ፡ ወበተዓደዎ፡ ንዋየ፡ ቢጽክሙ፡ ወኵሎ፡ በዘታረብሁ፡ ለርእስክሙ፡ ወአኮ፡ ለቢጽክሙ።

¹³ ወዘንተሂ፡ ለእመ፡ ገብርክሙ፡ ትትፈደዩ፡ በከመ፡ ምግባሪክሙ።

¹⁴ እሰብእ፡ ኢትትአመንዋ፡ ለሐይድ፡ አላ፡ በዘይረትዕ፡ በግብረ፡ እደዊክሙ፡ ትሴሰዩ፡ ወኢትፍቅዱ፡ ፃማ፡ ባዕድ፡ ከመ፡ ትብልዑ፡ በሐይድ፡ ወመሢጥ፡ ዘእንበለ፡ ፍትሕ፡ ወርትዕ።

¹⁵ ወዘኢያጸግበክሙ፡ ሶበ፡ ትበልዑ፡ ወዘኢይረብሐብክሙ፡ ሶበ፡ ትዘግቡ፡ አላ፡ ተኀድግዎ፡ ለባዕድ፡ ሶበ፡ ትመውቱ።

¹⁶ ወብዕልክሙኒ፡ ለእመ፡ በዝኃ፡ ፈታዕብዩ፡ ልበክሙ፡ ይኄይስ፡ ኅዳጥ፡ ዘበጽድቅ፡ እምብዙኅ፡ ብዕለ፡ ኃጥአን፡ እስመ፡ ብዕሎሙ፡ ለኃጥአን፡ ከመ፡ ጢስ፡ ዘይወጽእ፡ እምአፈ፡ እቶን፡ ወይነሥአ፡ ነፋስ።