Jubilees 6

The Ethiopic Bible (Ge'ez)

¹ ወአመ፡ ሠርቁ፡ ለወርኅ፡ ሣልስ፡ ወፅእ፡ እምነ፡ ታቦት።

² ወአስተርአየ፡ ዲበ፡ ምድር፡ ወነሥአ፡ ማሕስአ፡ ጠሊ፡ ወአስተስረየ፡ በደሙ፡ በእንተ፡ ኵሉ፡ አበሳ፡ ምድር፡ እስመ፡ ተደምሰሰ፡ ኵሉ፡ ዘሀሎ፡ ውስቴታ፡ ዘእንበለ፡ እለ፡ ሀለዉ፡ ውስተ፡ ታቦት፡ ምስለ፡ ኖኅ።

³ ወአዕረገ፡ ስብሐ፡ ዲበ፡ ምሥዋአ፡ ወነሥአ፡ ላህመ፡ ወበሐኰ፡ ወበግዐ፡ ወአጣሌ፡ ወፄወ፡ ወመንጤጠ፡ ወእጓለ፡ ርግብ።

⁴ ወአጼነወ፡ እግዚአብሔር፡ መዓዛ፡ ሠናየ፡ ወተካየደ፡ ምስሌሁ፡ ኪዳነ፡ ከመ፡ ኢይኩን፡ ማየ፡ አይኅ፡ ዘያማስን፡ ምድረ፡ ኵሎ፡ መዋዕለ፡ ምድር፡ ዘርእ፡ ወማእረር፡ ኢይትነተግ፡ ደደክ፡ ወመርቄ፡ ሐጋይ፡ ወክረምት፡ ወመዓልት፡ ወሌሊት፡ ኢይወልጡ፡ ሥርዓቶሙ፡ ወኢይንተጉ፡ ለዓለም።

⁵ ወአንትሙኒ፡ ለሀቁ፡ ወተባዝኁ፡ ውስተ፡ ምድር፡ ወብዝኁ፡ ላዕሌሃ፡ ወኩኑ፡ ለበረከት፡ ማእከለ፡ ፍርሃትክሙ፡ ወረዓድክሙ።

⁶ ወናሁ፡ ወሀብኩክሙ፡ ኵሎ፡ አራዊተ፡ ወኵሎ፡ እንስሳ፡ ወኵሎ፡ ዘይሰርር፡ ወኵሎ፡ ዘይትሐወስ፡ ውስተ፡ ምድር፡ ወውስተ፡ ማያት፡ ዓሣተ፡ ወኵሎ፡ ለሲሲት፡ ከመ፡ ሐምለ፡ ሣዕር፡ ወሀብኩክሙ፡ ኵሎ፡ ትብልዑ።

⁷ ወባሕቱ፡ ሥጋ፡ ዘምስለ፡ መንፈሱ፡ ምስለ፡ ደም፡ ኢትብልዑ፡ እስመ፡ ነፍሰ፡ ኵሉ፡ ዘሥጋ፡ ውስተ፡ ደም፡ ውእቱ፡ ከመ፡ ኢይትኃሠሥ፡ ደምክሙ፡ ውስተ፡ ነፍሳቲክሙ፡ እምውስተ፡ እደ፡ ኵሉ፡ ሰብእ፡ እምእደ፡ ኵሉ፡ አኀሥሦ፡ ለደመ፡ ሰብእ።

⁸ ዘይክዑ፡ ደመ፡ ሰብእ፡ በሰብእ፡ ደሙ፡ ይትከዐው፡ እስመ፡ በመልክዐ፡ እግዚአብሔር፡ ገብሮ፡ ለአዳም።

⁹ ወአንትሙሂ፡ ለሀቁ፡ ወብዝኁ፡ ዲበ፡ ምድር።

¹⁰ ወመሐሉ፡ ኖኅ፡ ወደቂቁ፡ ከመ፡ ኢይብልዑ፡ ኵሎ፡ ደመ፡ ዘበኵሉ፡ ሥጋ።

¹¹ በእንተ፡ ዝንቱ፡ ተናገረከ፡ ትትካየድ፡ ኪዳነ፡ አንተኒ፡ ምስለ፡ ደቂቀ፡ እስራኤል፡ በዝ፡ ወርኅ፡ በዲበ፡ ደብር፡ ምስለ፡ መሐላ።

¹² ወጽሕፍት፡ ዛቲ፡ ስምዕ፡ ላዕሌክሙ፡ ከመ፡ ትዕቀብዋ፡ ኵሎ፡ መዋዕለ፡ ከመ፡ ኢትብልዑ፡ በኵሉ፡ መዋዕል፡ ኵሎ፡ ደመ፡ አራዊት፡ ወአዕዋፍ፡ ኵሎ፡ መዋዕለ፡ ምድር።

¹³ ወአንተ፡ አዝዞሙ፡ ለደቂቀ፡ እስራኤል፡ ኢይብልዑ፡ ኵሎ፡ ደመ፡ ከመ፡ የሀሉ፡ ስሞሙ፡ ወዘርኦሙ፡ ቅድመ፡ እግዚአብሔር፡ አምላክነ፡ መዋዕለ።

¹⁴ ወአልቦ፡ ለዝሕግ፡ ዐቅመ፡ መዋዕል፡ እስመ፡ ለዓለም፡ ውእቱ፡ ይዕቀብዎ፡ ለትውልድ፡ ከመ፡ ይኩኑ፡ እንዘ፡ ይትመሀለሉ፡ በእንቲአሆሙ፡ በደም፡ በቅድመ፡ ምሥዋዕ፡ በኵሉ፡ ዕለት፡ ወዕለተ፡ ነግህ፡ ወሰርክ፡ ያስተስርዩ፡ በእንቲአሆሙ፡ ወትረ፡ ቅድመ፡ እግዚአብሔር፡ ከመ፡ ይዕቀብዎ፡ ወኢይሠረዉ።

¹⁵ ወወሀቦ፡ ለኖኅ፡ ወለደቂቁ፡ ትእምርተ፡ ከመ፡ ኢይኩን፡ ዳግመ፡ አይኅ፡ ዲበ፡ ምድር።

¹⁶ ቀስቶ፡ ወሀበ፡ ውስተ፡ ደመና፡ ለትእምርተ፡ ኪዳን፡ ዘለዓለም።

¹⁷ በእንተዝ፡ ተሠርዐ፡ ወተጽሕፈ፡ ውስተ፡ ጽላተ፡ ሰማይ፡ ከመ፡ ይኩኑ፡ ገበርተ፡ በዓል፡ ዘሱባዔ፡ በዝ፡ ወርኅ፡ ምዕረ፡ ለዓመት፡ ለሐዲስ፡ ኪዳን፡ በኵሉ፡ ዓም፡ ወዓመት።

¹⁸ ወኮነት፡ ኵላ፡ ዛቲ፡ በዓል፡ እንዘ፡ ትትገበር፡ በሰማይ፡ እምዕለተ፡ ፍጥረት፡ እስከ፡ መዋዕለ፡ ኖኅ፡ ዕሥራ፡ ወስድስቱ፡ ኢዮቤልዉ፡ ወሱባዔ፡ ዓመት፡ ኃምስተ፡ ወዐቀብዋ፡ ኖኅ፡ ወደቂቁ፡ ሰብዓተ፡ ኢዮቤልዉ፡ ወሱባዔ፡ ዓመታት፡ አሐተ፡ እስከ፡ አመሞቱ፡ ለኖኅ፡ ወእምዕለተ፡ ሞቱ፡ ለኖኅ፡ አማስኑ፡ ውሉዱ፡ እሰከ፡ አመ፡ መዋዕለ፡ አብርሃም፡ ወይበልዑ፡ ደመ።

¹⁹ ወአብርሃም፡ ባሕቲቱ፡ ዐቀበ፡ ወይስሐቅ፡ ወያዕቆብ፡ ውሉዱ፡ ዐቀብዋ፡ እስከ፡ መዋዕሊከ።

²⁰ ወአንተሂ፡ አዝዞሙ፡ ለውሉደ፡ እስራኤል፡ ወይዕቀብዋ፡ ለዛቲ፡ በዓል፡ በኵሉ፡ ትዝምዶሙ፡ ለትእዛዝ፡ ሎሙ፡ ዕለተ፡ አሐተ፡ በዓመት፡ በዝ፡ ይግበሩ፡ በዓለ፡ ባቲ።

²¹ እስመ፡ በዓለ፡ ሱባዔያት፡ ይእቲ፡ ወበዓለ፡ ቀዳሜ፡ ፍሬ፡ ይእቲ፡ ክልኤ፡ ዕፅፈት፡ ይእቲ፡ ወለክልኤ፡ ዘመድ፡ ዛቲ፡ በዓል፡ በከመ፡ ጽሑፍ፡ ወቍሩጽ፡ በእንቲአሃ፡ ግብራ።

²² እስመ፡ ጸሐፍኩ፡ ውስተ፡ መጽሐፈ፡ ሕግ፡ ዘቀዳሚ፡ ውስተ፡ ዘጸሐፍኩ፡ ለከ፡ ትግበራ፡ በበ፡ ጊዜሃ፡ ዕለተ፡ አሐተ፡ ለዓመት።

²³ ወበሠርቀ፡ ወርኅ፡ ቀዳሚ፡ ወበሠርቀ፡ ወርኀ፡ ራብዕ፡ ወበሠርቀ፡ ወርኅ፡ ዓሥር፡ ዕለታተ፡ ተዝካር፡ እማንቱ፡ ወዕለታተ፡ ጊዜ፡ እማንቱ።

²⁴ ወኖኅ፡ ሠርዖን፡ ሎቱ፡ ለበዓላት፡ ለትውልድ፡ ዘለዓለም፡ እስከ፡ አመ፡ ኮነ፡ ሎቱ፡ ቦቶን፡ ተዝካረ።

²⁵ በሠርቀ፡ ወርኅ፡ ቀዳሚ፡ ተብህለ፡ ሎቱ፡ ይግበር፡ ታቦተ፡ ወባቲ፡ የብሰት፡ ምድር፡ ወአርኀወ፡ ወርእየ፡ ምድረ።

²⁶ ወበሠርቀ፡ ወርኅ፡ ራብዕ፡ ተፈጸመ፡ አፈ፡ መዓምቅቲሃ፡ ለቀላይ፡ ታሕቲት፡ ወበሠርቀ፡ ወርኅ፡ ሳብዕ፡ ተርኅወ፡ ኵሉ፡ አፈወ፡ መዓምቅተ፡ ምድር፡ ወአኀዘ፡ ማያት፡ ይረድ፡ ውስቴቱ።

²⁷ ወበሠርቀ፡ ወርኀ፡ ዓሥር፡ አስተርአየ፡ አርእስተ፡ አድባር፡ ወተፈሥሐ፡ ኖኅ።

²⁸ በእንተዝ፡ ሠርዖን፡ ኪያሆን፡ ሎቱ፡ ለበዓላት፡ ለተዝካር፡ እስከ፡ ለዓለም።

²⁹ ወያዐርግዎን፡ ውስተ፡ ጽላተ፡ ሰማይ።

³⁰ ወይከውና፡ ኵሎን፡ መዋዕል፡ ዘትእዛዛት፡ ኀምሳ፡ ወክልኤ፡ ሰንበታተ፡ መዋዕል።

³¹ ከመዝ፡ ተቈርዐ፡ ወተሠርዐ፡ ውስተ፡ ጽላተ፡ ሰማይ።

³² ወአንተኒ፡ አዝዞሙ፡ ለደቂቀ፡ እስራኤል፡ ወይዕቀቡ፡ ዓመታተ፡ በዝ፡ ኆልቍ፡ ሠለስተ፡ ምእተ፡ ወስሳ፡ ወረቡዐ፡ መዋዕለ፡ ወይከውን፡ ፍጹመ፡ ዓመት።

³³ ወለእመ፡ ተዐደዉ፡ ወኢገብርዎን፡ በከመ፡ ትእዛዙ፡ ሎቱ፡ አሜሃ፡ ኵሎሙ፡ ያማስኑ፡ ጊዜያቲሆሙ፡ ወዓመታትኒ፡ ይትሐወሱ፡ ዘእምውስተዝ፡ ወጊዜያትሂ፡ ያማስኑ፡ ወዓመታትሂ፡ ይትሐወሱ፡ ወይትዐደዉ፡ ሥርዓቶሙ።

³⁴ ወኵሎሙ፡ ውሉደ፡ እስራኤል፡ ይረስዑ፡ ወኢይረክቡ፡ ፍኖተ፡ ዓመታት።

³⁵ አአምር፡ አነ።

³⁶ ወይከውኑ፡ እለ፡ ያስተሐይጹ፡ ወርኀ፡ በሑያጼ፡ ወርኅ።

³⁷ በእንተዝ፡ ይመጽእ፡ ዓመታት፡ ሎሙ፡ እንዘ፡ ያማስኑ፡ ወይገብሩ፡ ዕለተ፡ ስምዕ፡ ምንንተ።

³⁸ በእንተዝ፡ አነ፡ እኤዝዘከ፡ ወአሰምዕ፡ ለከ፡ ከመ፡ ታስምዕ፡ ሎሙ፡ እስመ፡ እምድኅረ፡ ሞትከ፡ ያማስኑ፡ ውሉድከ፡ ከመ፡ ኢይግበሩ፡ ዓመተ፡ ሠለስተ፡ ምእተ፡ ወስሳ፡ ወረቡዐ፡ ባሕቲቶን።