Messale 1

The Ethiopic Bible (Ge'ez)

¹ ምሳሌያተ፡ ሰሎሞን፡ ወልደ፡ ዳዊት፡ ዘነግሠ፡ ለእስራኤል፡ በኢየሩሳሌም።

² ለአእምሮ፡ ጥበብ፡ ወተግሣፅ፡ ወለአእምሮ፡ ቃለ፡ ጥበብ።

³ ወለተወክፎ፡ መይጠ፡ ቃል፡ ወለአእምሮ፡ ጽድቅ፡ ዘበአማን።

⁴ ወለአርትዖ፡ ፍትሕ፡ ከመ፡ የሀቦሙ፡ ጥበበ፡ ለየዋሃን፡ ለሕፃናት፡ ወለወራዙት፡ ተዐውቆ፡ ወአእምሮ።

⁵ ዘንተ፡ እምከመ፡ ሰምዐ፡ ጠቢብ፡ ይዌስከ፡ ጥበበ።

⁶ ወዘሰ፡ አጥረየ፡ ሐዳፈ፡ የአምር፡ ምሳሌ፡ ወሥውረ፡ ነገረ፡ ነገረ፡ ጠቢባን፡ በቅጽበት።

⁷ ቀዳሚሃ፡ ለጥበብ፡ ፈሪሀ፡ እግዚአብሔር፡ ወአእምሮ፡ ሠናይት፡ ለኵሉ፡ ዘይገብራ፡ ፈሪሀ፡ እግዚአብሔር፡ ቀዳሜ፡ ተዐውቆ፡ ጥበበ፡ ወተግሣፀ፡ ይሜንኑ፡ ረሲዓን።

⁸ ስማዕ፡ ወልድየ፡ ሕገገ፡ አቡከ፡ ወኢትትኀየይ፡ ትእዛዘ፡ እምከ።

⁹ አክሊለ፡ ክብር፡ ትነሥእ፡ ለርእስከ፡ ወባዝግና፡ ወርቅ፡ ለክሳድከ።

¹⁰ ኦ፡ ወልድየ፡ ኢያስሕቱከ፡ ሰብእ፡ ረሲዓን፡ ወኢትፍቅድ፡ እመ፡ አስተብቊዑከ፡ እንዘ፡ ይብሉ፡ ነዓ፡ ተሳተፍ፡ ምስሌነ፡ ደመ።

¹¹ ወንድፍን፡ ውስተ፡ ምድር፡ ብእሴ፡ ጻድቀ፡ በዓመፃ።

¹² ወነኀጦ፡ ከመ፡ ገሃነም፡ ሕያዎ፡ ወንስዓር፡ እምድር፡ ዝክሮ።

¹³ ወጥሪቶ፡ ብዙኀ፡ ናስተጋብእ፡ ወንምላእ፡ አብያቲነ፡ በርበሮ።

¹⁴ ወአንተኒ፡ ኅበር፡ ምስሌነ፡ ወአሐዱ፡ ቊናማት፡ ይኩነነ፡ ለኵልነ፡ ወመስነቅት፡ አሐቲ፡ ትኩነነ።

¹⁵ ኢትሑር፡ ወልድየ፡ ምስሌሆሙ፡ ፍኖተ።

¹⁶ አግኅሥ፡ እገሪከ፡ እምአሠሮሙ፡ እስመ፡ ለእከይ፡ ይረውፃ፡ እገሪሆሙ፡ ወያፈጥና፡ ለከዒወ፡ ደም።

¹⁷ እስመ፡ አኮ፡ በከ፡ ዘይረብቡ፡ መሥገርተ፡ ለሰብእ።

¹⁸ እሙንቱሰ፡ እለ፡ ቀቲለ፡ ለመዱ፡ ይዘግቡ፡ ሎሙ፡ እከየ፡ ወድቀቶሙ፡ ለሰብእ፡ ኃጥአን፡ እኩይ።

¹⁹ ዝ፡ ፍናው፡ ውእቱ፡ ለኵሎሙ፡ እለ፡ ይፌጽም፡ ኃጣውአ፡ ኃጢአት፡ ወትዕግልት፡ ነፍሶሙ፡ ታኃጒል።

²⁰ ጥበብ፡ በፍናው፡ ትሴባሕ፡ ወበመራኅብት፡ ትሁብ፡ ቃላ።

²¹ ወውስተ፡ አርእስተ፡ ጥቅም፡ ትሰበክ፡ ወውስተ፡ አናቅጺሆሙ፡ ለኃያላን፡ ትፀመድ፡ ወውስተ፡ አናቅጸ፡ ሀገር፡ ጥቡዐ፡ ትብል።

²² መጠነ፡ መዋዕል፡ የዋሃን፡ ቦሙ፡ ጽድቅ፡ ወኢይትኃፈሩ።

²³ እስከ፡ ማእዜኑ፡ ረሲዓን፡ ታፈቅሩ፡ ስሕተተ፡ ዓብዳንሰ፡ ፈታውያነ፡ ጽእለት፡ እሙንቱ፡ ወረሲዓነ፡ ከዊኖሙ፡ ጸልኡ፡ አእምሮ፡ ወርሱሐነ፡ ኮኑ፡ ለእለ፡ ይዘልፍዎሙ፡ ለምንት፡ ትመይጡ፡ ዘለፋየ።

²⁴ ወናሁ፡ አነ፡ እነግረክሙ፡ እስትንፋሰ፡ ቃልየ፡ ወእሜህረክሙ፡ ነገረ፡ ዚአየ።

²⁵ እስመ፡ ጸዋዕኩ፡ ወኢያውሣእክሙኒ፡ ሰፋሕኩ፡ እደውየ፡ ወኢያጽማእክሙኒ።

²⁶ ወአብዛኅኩ፡ ነገረ፡ ወኢተሰጠውክሙኒ፡ ወምኑነ፡ ረሰይክሙ፡ ትእዛዝየ፡ ወዘለፋየኒ፡ ኢነጸርክሙ።

²⁷ ወአነሂ፡ በኃጒልክሙ፡ አስሕቅ፡ ወእትፌሣሕ፡ ሶበ፡ ይመጽአክሙ፡ ግብተ፡ ተሠርዎ።

²⁸ ወሶበ፡ ይመጽአክሙ፡ ግብተ፡ ሀከከ፡ ወሙስናሂ፡ ከማሁ፡ ሶበ፡ ይመጽአክሙ፡ ለአሥግሮሙ፡ ወሶበ፡ ይመጽአክሙ፡ ምንዳቤ፡ ወተፄውዎ፡ ሀሎኩ፡ ህየ።

²⁹ ወሶበ፡ ትጼውዑኒ፡ አነሂ፡ ኢይሰምዐክሙ፡ የኃሥሡኒ፡ እኩያን፡ ወኢይረክቡኒ።

³⁰ እስመ፡ ጸልእዋ፡ ለጥበብ፡ ቃለ፡ እግዚአብሔርኒ፡ ይስምዑ፡ ኢፈቀዱ።

³¹ ወኢፈቀዱ፡ ይነጽሩ፡ ዘዚአየ፡ ምክረ፡ ወያስተራኵሱ፡ ኵሎ፡ ዘዚአየ፡ ዘለፋ።

³² እንከሰኬ፡ ይብልዑ፡ ፍሬ፡ ምግባሮሙ፡ ወበዘዚአሆሙ፡ ኃጢአት፡ ይጽገቡ።

³³ እስመ፡ ኢተመይጦቶሙ፡ ለዓብዳን፡ ትቀትሎሙ፡ እምእንተ፡ ገፍዑ፡ ደቂቅ፡ ይትቀተሉ፡ ወሐተታሆሙ፡ ለረሲዓን፡ ትቀትሎሙ።

³⁴ ወዘሰ፡ ኪያየ፡ ይሄሉ፡ በተስፋ፡ ወየዓርፍ፡ ዘእንበለ፡ ድንጋፄ፡ እምኵሉ፡ እኩይ።