Messale 25

The Ethiopic Bible (Ge'ez)

¹ መኑ፡ ዘዐርገ፡ ውስተ፡ ሰማይ፡ ወወረደ፡ ወመኑ፡ አስተጋብአ፡ ነፋሳተ፡ ውስተ፡ ኅፅኑ፡ ወመኑ፡ ዓቈረ፡ ማያተ፡ በልብሱ።

² ወመኑ፡ አኀዘ፡ ኵሎ፡ አጽናፈ፡ ምድር፡ መኑ፡ ስሙ፡ ወመኑ፡ ስመ፡ አቡሁ፡ ከመ፡ ታእምሩ፡ ኵሎ።

³ ነገረ፡ እግዚአብሔር፡ ርሱን፡ ወይትቃወም፡ ሎሙ፡ ለእለ፡ ይፈርህዎ።

⁴ ወኢትወስክ፡ ውስተ፡ ነገሩ፡ ከመ፡ ኢይዝልፍከ፡ ወሐሳዌ፡ ኢትኩን።

⁵ ክልኤተ፡ ነገረ፡ እስእል፡ እምኀቤከ፡ እግዚእየ፡ ወኢትክልአኒ፡ ጸጋከ፡ ዘእንበለ፡ እሙት።

⁶ ከንቶ፡ ነገረ፡ ወሐሰተ፡ አርኅቅ፡ እምኔየ፡ ብዕለ፡ ወንዴተ፡ ኢተሀበኒ፡ አላ፡ ሥራዕ፡ ሊተ፡ ዘይትፈቀድ፡ ወዘየአክለኒ።

⁷ ከመ፡ አእኪልየ፡ ሐሳዌ፡ ኢይኩን፡ ወኢይበል፡ መኑ፡ እግዚአብሔር፡ ወእመ፡ አኮ፡ ነዲይየ፡ ኢይስርቅ፡ ወኢይምሐል፡ በስመ፡ እግዚአብሔር፡ በሐሰት።

⁸ ወኢታግብእ፡ ገብረ፡ ውስተ፡ እደ፡ አግዚኡ፡ ከመ፡ እመቦ፡ ዘረገመከ፡ ኢትማስን።

⁹ ወልድ፡ እኩይ፡ ይረግም፡ አባሁ፡ ወእሞሂ፡ ይባርክ።

¹⁰ ወልድ፡ እኩይ፡ ጽድቀ፡ ርእሱ፡ ይፈትሕ፡ ወፀአቶሂ፡ ኢይጤይቅ።

¹¹ ለወልድ፡ እኩይ፡ አዕይንተ፡ ዕበይ፡ ቦቱ፡ ወቀራንብቲዑኒ፡ ያሌዕል።

¹² ወልድ፡ እኩይ፡ ስነነ፡ መጥባሕት፡ ቦቱ፡ ወጥረሲሁ፡ መከርክር፡ ከመ፡ ያኅልቅ፡ ነዳያነ፡ እምድር፡ ወምስኪናኒሆሙ፡ እምሰብእ።

¹³ ዘንተ፡ አየድዓክሙ፡ ለጠቢባን፡ ከመ፡ ታእምሩ፡ ኀፊረ፡ ገጽ፡ ለፍትሕ፡ አኮ፡ ሠናይ።

¹⁴ ዘይብሎ፡ ለረሲዕ፡ ጻድቅ፡ ውእቱ፡ ርጉመ፡ ይከውን፡ በሕዝብ፡ ወጽሉአ፡ በአሕዛብ።

¹⁵ ወእለሰ፡ ይዘልፉ፡ በጽድቅ፡ ያሤንዩ፡ አስተርእዮ፡ ወላዕሌሆሙ፡ ትመጽእ፡ በረከት፡ ሠናይት።

¹⁶ ከናፍር፡ ያወሥኣ፡ እለ፡ ያፈቅራ፡ ነገረ፡ ጥበብ።

¹⁷ አስተዳሉ፡ ለመንገድከ፡ ምግባሪከ፡ ወተደለው፡ ውስተወፍር፡ ወትሉ፡ ድኅሬየ፡ ወታነሥእ፡ ቤተከ።

¹⁸ ወኢትኩን፡ ስምዐ፡ በሐሰት፡ ላዕለ፡ ሰብአ፡ ብሔርከ፡ ወኢትጌጊ፡ በከናፍሪከ።

¹⁹ ወኢትበል፡ በከመ፡ ረሰየኒ፡ እሰ፡ ሬስ፡ ወእፈድዮ፡ በከመ፡ ገፍዐኒ።

²⁰ ውስተ፡ ገራህተ፡ ብእሲ፡ ዐብድ፡ ኀለፍኩ፡ ወውስተ፡ ዐፀደ፡ ወይነ፡ ብእሲ፡ ነዳየ፡ አእምሮ፡ ሖርኩ።

²¹ ናሁ፡ በቈለ፡ ላዕሌሁ፡ ሦከ፡ ወየዐብር፡ ሣዕሩ፡ ፍጹመ፡ ወይከውን፡ በድወ፡ ወፀቈነ፡ እበኒሁ፡ ይንኅል።

²² ድኅረ፡ አነ፡ ነሳሕኩ፡ ወነጸርኩ፡ እኅረይ፡ ተግሣፀ።

²³ ሕቀ፡ ድቃስ፡ ወሕቀ፡ ንዋም፡ ወሕቀ፡ አስተጋብኦ፡ እድዲበ፡ እንግድዓ።

²⁴ ወእመ፡ ዘንተ፡ ትገብር፡ ትመጽእ፡ እንዘ፡ ትትቄደም፡ ከመ፡ እኩይ፡ ሐዋርያ፡ ንዴት፡ ወተጽናስ፡ ከመ፡ ኄር፡ ረዋጺ።