Tagsas 1

The Ethiopic Bible (Ge'ez)

¹ ተግሣፀ፡ ሰሎሞን፡ እለ፡ እንበለ፡ ኑፋቄ፡ ዘጸሐፉ፡ አዕርክቲሁ፡ ለሕዝቅያስ፡ ንጉሠ፡ ይሁዳ።

² ክብረ፡ እግዚአብሔር፡ የኀብእ፡ ነውረ፡ ወስብሐተ፡ ንጉሥ፡ ያከብር፡ ገብረ።

³ ሰማይ፡ ልዑል፡ ወምድር፡ ዕሙቅ፡ ወከማሁ፡ ልበ፡ ንጉሥ፡ ኢይትአመር።

⁴ አጽርዮ፡ ለብሩር፡ ዘኢኮነ፡ ፍቱነ፡ ወይነጽሕ፡ ለከ፡ ንጽሐ፡ ፍጹመ።

⁵ ቅትል፡ ረሲዓነ፡ እምቅድመ፡ ገጸ፡ ንጉሥ፡ ወይረትዕ፡ መንበሩ፡ በጽድቅ።

⁶ ወኢትትዓበይ፡ በቅድመ፡ ገጸ፡ ንጉሥ፡ ወኢትጸደቅ፡ በቅድመ፡ እግዚአብሔር፡ ወውስተ፡ መካነ፡ መኳንንት፡ ኢትቁም።

⁷ ይኄይሰከ፡ ይበሉከ፡ ዕርግ፡ ኀቤነ፡ እምትኅሥር፡ በቅድመ፡ መኰንን፡ ዘርእያ፡ አዕይንቲከ፡ ንግር፡ ወኢትደቅ፡ ውስተ፡ ጋእዝ፡ ፍጡነ።

⁸ ቅስተ፡ ተዋቀስ፡ ምስለ፡ ቢጽከ፡ ወምሥጢሮሰ፡ ኢትክሥት፡ ከመ፡ ኢትነስሕ፡ በደኃሪትከ።

⁹ ሶበ፡ ይግእዘከ፡ ዓርክከ፡ ግባእ፡ ድኅሬከ፡ ወኢትትኀየይ፡ ከመ፡ ኢይሒስከ፡ ዓርክከ፡ ወጋእዝከኒ፡ ወጽልእከኒ፡ ኢያርኅቀከ፡ እምኔሁ።

¹⁰ እመሰ፡ ከሠትከ፡ ምሥጢሮ፡ ይከውነከ፡ መጠነ፡ ሞት፡ ጸጋ፡ ወታእኃ፡ ያግእዝ፡ አላ፡ ተዓቀብ፡ በርእስከ፡ ከመ፡ ኢትኩን፡ ዝንጉገ፡ ወዕቀብ፡ ፍናዊከ፡ በሥነ፡ ምግባሪከ።

¹¹ ኮለ፡ ወርቅ፡ ውስተ፡ ድደ፡ ብሩር፡ ሰንፀት፡ ከማሁ፡ ብሂለ፡ ቃል፡ በበገጹ።

¹² ውዕቦ፡ ወርቅ፡ ውስተ፡ ዕንቈ፡ ሰርድዮን፡ ዘብዜኅ፡ ሤጡ፡ ውዱድ፡ ከማሁ፡ ቃለ፡ ጠቢብ፡ ውስተ፡ ዕዝነ፡ ዘይሰምዕ፡ ሠናይ፡ ውእቱ።

¹³ ከመ፡ ጸአተ፡ አስሐትያ፡ በማእረር፡ በመርቄ፡ ይደሉ፡ ከማሁ፡ ሐዋርያ፡ ምእመን፡ ለነፍሰ፡ እለ፡ ፈነውዎ፡ ይበቊዕ።

¹⁴ ከመ፡ ነፋሳት፡ ወደመናት፡ ዘአልቦሙ፡ ዝንም፡ ወዝናማት፡ እሙራት፡ በመዋዕለ፡ ማእረር፡ ኢይበቊዕ፡ ከማሁ፡ ኵሎሙ፡ እለ፡ ይትሜክሑ፡ በሀብት፡ ሕሰው።

¹⁵ በትዕግሥት፡ ሥነ፡ ሕይወት፡ ትነግሥ፡ ልሳን፡ ድክምት፡ ወትሰብር፡ አዕፅምተ።

¹⁶ ወልድየ፡ መዓረ፡ እምከመ፡ ረከብከ፡ ብላዕ፡ በዓቅም፡ ከመ፡ ኢትጽገብ፡ ወኢትቂእ።

¹⁷ ጒንዱየ፡ አብጽሕ፡ እገሪከ፡ ኀበ፡ ዓርክከ፡ ከመ፡ ኢይጽገብከ፡ ወኢይጽላእከ።

¹⁸ በትር፡ ወመቅሠፍት፡ ማኅዘኒ፡ ለልብ፡ ከማሁ፡ ብእሲ፡ ዘይሰምዕ፡ ስምዐ፡ በሐሰት፡ ላዕለ፡ ዓርኩ።

¹⁹ ፍኖት፡ እኩይ፡ ወእግረ፡ ኃጥእ፡ ይትኃጐል፡ በዕለት፡ እኪት፡ ከመ፡ ብሒላ፡ ኢይደልዎ፡ ለቊስል፡ ከማሁ፡ ነውር፡ ዘይወርድ፡ ዲበ፡ ሥጋ፡ ማኅዘኒ፡ ለልብ።

²⁰ ከመ፡ ነቀዝ፡ ለዕፅ፡ ወቊንቊኔ፡ ለልብስ፡ ከማሁ፡ ኀዘን፡ ለብእሲ፡ ታማስን፡ ልቦ።

²¹ ለአመ፡ ርኅበ፡ ጸላኢከ፡ አብልዖ፡ ወለእመ፡ ጸምአ፡ አስትዮ፡ ዘንተ፡ ለእመ፡ ገበርከ፡ አፍሐመ፡ እሳት፡ ታስተጋብእ፡ ዲበ፡ ርእሱ፡ ወእግዚአብሔር፡ የዓሥየከ፡ ሠናያተ።

²² ነፋስ፡ ሰሜናዊ፡ ያነሥእ፡ ደመናተ፡ ወገጸ፡ ዘኢየኃፍር፡ ልሳን፡ ያስኦዝዝ።

²³ ይኄይስ፡ ኃዲር፡ ውስተ፡ ማዕዘንተ፡ ናሕስ፡ ንሡት፡ እምስለ፡ ብእሲት፡ ጸአሊት፡ ውስተ፡ ቤት፡ ርሡይ።

²⁴ ከመ፡ ማይ፡ ቈሪር፡ ለነፍስ፡ ጽምእት፡ አዳም፡ ከማሁ፡ ዜና፡ ሠናይ፡ እምድር፡ ርኁቅ።

²⁵ ከመ፡ ዘይፈጽም፡ ዓዘቃተ፡ ወያማስን፡ ሙፃአ፡ ማይ፡ ከማሁ፡ አኮ፡ ሠናይ፡ ይደቅ፡ ጻድቅ፡ በቅድመ፡ ረሲዓን።

²⁶ በሊዐ፡ መዓር፡ ብዙኅ፡ አኮ፡ ሠናይ፡ ወአክብሮ፡ ርቱዕ፡ ቃለ፡ ስቡሐ፡ ወሐቲተ፡ ክብረ፡ ክቡር።

²⁷ ከመ፡ ሀገር፡ እንተ፡ ንህለ፡ ጥቅማ፡ ወአልባ፡ ጥቅም፡ ከማሁ፡ ብእሲ፡ ዘእንበለ፡ ምክር።