1 Мекабіян 34

Ефіопська Біблія (ґеез)

¹ መንግሥተ፡ ሜዶን፡ ትማስን፡ ወመንግሥተ፡ ሮምሰ፡ ትፀንዕ፡ ፈድፋደ፡ ላዕለ፡ መንግሥተ፡ መቄዶንያ፡ ወመንግሥተ፡ ነነዌ፡ ወበላዕለ፡ መንግሥተ፡ ፋርስ።

² ወመንግሥተ፡ ኢትዮጵያ፡ ላዕለ፡ መንግሥተ፡ እስክንድርያ፡ ውመንግሥተ፡ ሞዓብ፡ ላዕለ፡ አማሌቅ፡ እስመ፡ ይትንሥኡ።

³ ወይትነሣእ፡ እኁ፡ ላዕለ፡ እኁሁ፡ ወይገብር፡ እግዚአብሔር፡ በቀለ፡ በከመ፡ ነበበ፡ ላዕሌሆሙ፡ ከመ፡ ይትኃለቁ።

⁴ ወይቤ፡ ይትነሣእ፡ መንግሥት፡ ላዕለመንግሥት፡ ወሕዝብ፡ ላዕለ፡ ሕዝብ፡ ወሀገር፡ ላዕለ፡ ሀገር።

⁵ ወይከውን፡ ሐከክ፡ ወይከውን፡ ቀትል፡ ወረኃብ፡ ወብድብድ፡ ወድልቅልቅ፡ ወቢተተ፡ ክረምት፡ እስመ፡ ተንሥአ፡ ሰላም፡ ወፍቅር፡ ወወረደ፡ መቅሠፍቱ፡ እግዚአብሔር፡ ላዕሌሃ።

⁶ ወአመ፡ አልፀቀት፡ ዕለተ፡ እግዚአብሔር፡ ግብተ፡ ከመ፡ እንተ፡ መብረቅ፡ ዘያስተርኢ፡ እምጽባሕ፡ እስከ፡ ምዕራብ።

⁷ ወአሜሃ፡ ይትፈደይ፡ ኬሉ፡ በከመ፡ ምግባሩ፡ ወበከመ፡ ፃማ፡ እደዊሁ፡ ወበከመ፡ ፍሬ፡ ምግባሩ፡ እስመ፡ ለሊሁ፡ ይቤ፡ እግዚአብሔር፡ በዕለተ፡ ኵነኔ፡ ይትቤቀሎሙ፡ ወበጊዜ፡ ይድኀጽ፡ እግሮሙ፡ እስመ፡ ቀርበ፡ ዕለተ፡ ኊልቆሙ።

⁸ ይእተ፡ አሚረ፡ ያኃልቆሙ፡ እግዚአብሔር፡ ለገባርያነ፡ እኪት፡ እለ፡ ኢሐውሩ፡ በሕጉ፡ ውስተ፡ ኵነኔ፡ ዘለዓለም፡ ሕዝበ፡ ይሁዳ፡ ወቆጵሮስ፡ ወሰማርያ፡ ወደማስቆ፡ ወሕዝበ፡ ባቢሎን።

⁹ ወእለሂ፡ ይነብሩ፡ ደስያት፡ ዓረብ፡ ወሕንደኬ፡ ወኖባ፡ ወሳባ፡ ወግብፅ፡ ወኢትዮጵያ፡ ወክሎሙ፡ እለ፡ ይነብሩ፡ ዲቤሆን።

¹⁰ አሜሃ፡ የአምራኒ፡ ከመ፡ አነ፡ ውእቱ፡ እግዚአብሔር፡ ዘእኳንን፡ ሰማየ፡ ወምድረ፡ ወአነ፡ ውእቱ፡ ዘአሁብ፡ ክብረ፡ ወሞገሰ፡ ወአነ፡ ዘእቀትል፡ ወአሐዩ።

¹¹ ወአነ፡ ዘአሠርቅ፡ ጸሐየ፡ ወእፌንዎ፡ ውስተ፡ ምዕራቢሁ፡ ወአነ፡ ዘአመጽእ፡ ሠናየ፡ ወእኩየ።

¹² ወአነ፡ ዘአምጽእ፡ ሕዝበ፡ ዘኢተአምሩ፡ እለ፡ ይበልዑ፡ ፍሬ፡ ፃማክሙ፡ ወመራዕየ፡ አልህምቲክሙ፡ ወአባግዒክሙ።

¹³ ወይኰልርዕ፡ ደቂቀክሙ፡ በቅድሜክሙ፡ ወይፄውውዎሙ፡ ወኢትክሉ፡ አድኀኖቶሙ፡ ወይበልዑ፡ ራሕፀክሙ፡ ወለምለመክሙ፡ እስመ፡ ኢፈራህክሙ፡ ትእዛዘ፡ እግዚአብሔር፡ ዘሰማዕክሙ፡ እስመ፡ ኢተቶስሐ፡ መንፈሰ፡ እግዚአብሔር፡ ላዕሌክሙ።

¹⁴ ወዘሰ፡ ኅዱር፡ መንፈሰ፡ እግዚአብሔር፡ ላዕሌሁ፡ የአምር፡ ኵሎ፡ በከመ፡ ይቤሎ፡ ናቡከደነ፡ ፆር፡ ለዳንኤል፡ ነቢይ፡ እስመ፡ እሬኢ፡ መንፈሰ፡ እግዚአብሔር፡ ላዕሌከ።

¹⁵ እስመ፡ ዘቦ፡ መንፈሰ፡ እግዚአብሔር፡ የአምር፡ ኵሎ፡ ኅቡዕኒ፡ ክሡተ፡ ይከውኖ፡ ሎቱ፡ ወአልቦ፡ ዘይትኀባዕ፡ እመንፈሰ፡ እግዚአብሔር፡ አላ፡ የአምር፡ ኵሎ፡ ኅቡዐኒ፡ ወክሡተኒ።

¹⁶ እስመ፡ ንሕነሰ፡ ሰብእ፡ ንሕነ፡ ዘጌመ፡ ንመውት፡ ወይትከሠት፡ ምግባራቲነ፡ ዘበኅቡዕ፡ ኬሉ፡ ዘገበርነ።

¹⁷ በከመ፡ ይፈትንዎ፡ ለወርቅ፡ ወለብሩር፡ በእሳት፡ ከማሁ፡ ይትፈተኑ፡ ኃጥአን፡ በደኃሪት፡ ዕለት፡ እስመ፡ ኢዓቀቡ፡ ትእዛዘ፡ እግዚአብሔር።

¹⁸ አሜሃኪ፡ ይትፈተኑ፡ ምግባራቲሆሙ፡ ለኵሎሙ፡ ደቂቀ፡ እስራኤል፡ ወለኵሎሙ፡ አሕዛብ።