2 Мекабіян 12

Ефіопська Біблія (ґеез)

¹ አሌ፡ ለክሙ፡ ኃያላነ፡ እስራኤል፡ እለ፡ ኢየዓቀብኩሙ፡ ዘአዘዝክሙ፡ በውስተ፡ ደብተራ፡ ወኢገበርክሙ፡ ፈቃደ፡ ዘእንበለ፡ ፈቃደ፡ ርእሰክሙ፡ ትዕቢት፡ ወትዝኅርት፡ ወዝሙት፡ ወስስዕት፡ ወስካር፡ ወስታይ፡ ወመሐሊ፡ በሐሰተ።

² ወበእንተዝኬ፡ ይነደድ፡ መዓትየ፡ ላዕሌክሙ፡ ከመ፡ ሐሠር፡ ዘቅድመ፡ ገጸ፡ እሳት፡ ወከመ፡ እሳት፡ ዘያነድድ፡ አድባረ፡ ወከመ፡ ነፋስ፡ ዓውሎ፡ ዘያነሥኦ፡ ለፀበል፡ ድኩም፡ እምድር፡ ወይዘርዎ፡ መልዕልተ፡ አየረ፡ ኃበ፡ ዘኢይትረክብ፡ ዓሠሩ፡ እምነ፡ ምግባሩ።

³ ወከማሁ፡ አጠፍዖሙ፡ ለኵሎሙ፡ እለ፡ ይገብርዋ፡ ለእኪት፡ እምቅድመ፡ ገጽየ፡ ይቤ፡ እግዚአብሔር፡ ቅዱስ፡ እስራኤል፡ ወተዘከርዎ፡ ለእግዚአብሔር፡ ዘኵሎ፡ ይመልክ፡ ወአልቦ፡ ዘይሠዓኖ።

⁴ ወያፈቅሮሙ፡ ለአለ፡ ያፈቅርዎ፡ ወይሠሪ፡ ሎሙ፡ ኃጢአቶሙ፡ ወአበሳሆሙ፡ ለእለ፡ የሐውሩ፡ በትእዛዙ፡ ወኢትኩኑ፡ ድንፅዋነ፡ ወድንዙዛነ፡ ልብ፡ ለኢአሜን።

⁵ ወአርትዑ፡ ነፍስክሙ፡ ለአግዚአብሔር፡ ወተመሰሎ፡ ቦቱ፡ ከመ፡ ታድኅኑ፡ ነፍስክሙ፡ ወአድኅንክሙ፡ እምእደ፡ ፀርክሙ፡ አመ፡ ዕለተ፡ ምንዳቤክሙ።

⁶ ወሶበ፡ ተጼውዑኒ፡ አብለክሙ፡ ነዋ፡ ሀሎኩ፡ ምስሌክሙ፡ ወአድኅነክሙ፡ እምእደ፡ ፀርክሙ፡ ወኢይትሔየይክሙ፡ አመ፡ ዕለተ፡ ምንዳቤክሙ፡ እስመ፡ ተወከልክሙ፡ ብየ፡ ወገብርክሙ፡ ትእዛዝየ፡ ወኢተዓደውክሙ፡ እምሕግየ፡ ወአፍቀርክሙ፡ ዘአነ፡ አፍቀር፡ ይቤ፡ እግዚአብሔር፡ ዘኵሎ፡ ይመልክ።

⁷ ወለእለ፡ ያፈቅርዎ፡ ያፈክሮሙ፡ ወለእለ፡ የዓቅቡ፡ ትእዛዞ፡ ይትመሐፀኖሙ፡ እስመ፡ መሐሪ፡ ወመስተሥሕል፡ ውእቱ።

⁸ ወየበዝኅ፡ መይጠ፡ መዓቱ፡ ወኢያነድድ፡ በኵሉ፡ መቅሠፍቱ፡ እስመ፡ መሐሪ፡ ውእቱ፡ እስመ፡ የአምሮሙ፡ ከመ፡ ሥጋ፡ ወደም፡ እሙንቱ፡ ወእምከመ፡ ወጽአት፡ ነፍሰቶሙ፡ እምሥጋሆሙ፡ ይገብዑ፡ ውስተ፡ መሬቶሙ።

⁹ ወኢየአምሩ፡ ሀበ፡ ሀለዉ፡ እስከ፡ አመ፡ ፈቀዶ፡ እግዚአብሔር፡ ከመ፡ ያምጽኦሙ፡ እምኀበ፡ ኢሀለዉ፡ እስመ፡ ፈጠሮሙ፡ እምኀበ፡ ኡሀለዉ፡ ወካእበ፡ ውእቱ፡ ነሥአ፡ ነፍሶሙ፡ ወአግብአ፡ መሬተ፡ ውስተ፡ መርስቱ።

¹⁰ ወካዕበ፡ ውእቱ፡ ያመጽኦሙ፡ እምኀበ፡ ኢሀለዉ፡ ውስተ፡ ሀለዎ፡ ፈቃዱ።

¹¹ ወጺሩጻይዳንሰ፡ ዓላዊሁ፡ ለእግዚአብሔር፡ አብዝኃ፡ ተዓብዮ፡ ቅድመ፡ እግዚአብሔር፡ ወሶበ፡ ኃደጎ፡ እስከ፡ አመ፡ ጊዜ፡ ፈቀዶ፡ አዕበየ፡ ርእሶ።

¹² ወይቤ፡ ኮነ፡ መዋዕልየ፡ ከመ፡ መዋዕለ፡ ሰማይ፡ ወአነ፡ ውእቱ፡ ዘአሠርቅ፡ ፀሐየ፡ ዘኢይመውት፡ እስከ፡ ለዓለም።

¹³ ወዘንተ፡ ቃለ፡ እንዘ፡ ኢይፌጽም፡ ወረዶ፡ መልአከ፡ ሞት፡ ዘስሙ፡ ጥልምያኮስ፡ ወዘበጦ፡ ልቦ፡ ወሞተ፡ በጊዜሃ፡ ወተአጐለ፡ እምስነ፡ ንብረቱ፡ ወእምብዝኃ፡ ትዕቢቱ፡ ወእምእከየ፡ ምግባሩ፡ እስመ፡ ኢያእኰቶ፡ ለፈጣሪሁ።

¹⁴ ወሠራዊተ፡ ንጉሠ፡ ከለዳውያንሰ፡ እንዘ፡ ሀለዉ፡ አፍአ፡ ሀገሩ፡ ወትዕይንት፡ እንዘ፡ ይፈቅዱ፡ ፀቢዖቶ፡ ወሶበ፡ ሞተ፡ ወፅኡ፡ ወአጥፍዑ፡ ብሔሮ፡ ወማህረኩ፡ ኵሎ፡ እንሳስሁ፡ ወኢያትረፉ፡ እስከ፡ አኢያስተአዝብ፡ ውስተ፡ ዓረፍት።

¹⁵ ወኵሎ፡ ንዋዮ፡ ማህረኩ፡ ወቈሳቍሰ፡ ነሥኡ፡ ወአውዓዩ፡ በእሳት፡ ሀገሮ፡ ወአተዉ፡ ውስተ፡ ብሔሮሙ።