2 Мекабіян 15

Ефіопська Біблія (ґеез)

¹ ወእለሰ፡ አድምዑ፡ በምግባሮሙ፡ ሠናይ፡ አሜሃ፡ ይትፌሥሑ፡ ወእለሰ፡ ተሐከዩ፡ እንዘ፡ ይብሉ፡ ኢይትነሥኡ፡ ምውታን፡ አሜሃ፡ የኃዝኑ፡ ሶበ፡ ርእዩ፡ ከመ፡ ተንሥኡ፡ እሙታን፡ ምስለ፡ ምግባሮሙ፡ እኩይ፡ ዘአልቦ፡ ባቍዕ።

² ወይኳንኖሙ፡ ውእቱ፡ ምግባሮሙ፡ ዘገብሩ፡ እንዘ፡ አልቦ፡ ዘይወቅሶሙ፡ ለሊሆሙ፡ የአምሩ፡ ርእሶሙ፡ ዘከመ፡ ይትኳነን።

³ ወይቀውሙ፡ ምቅዋመ፡ ረሲዓን፡ አመ፡ ዕለተ፡ ብካይ፡ ወኵነኔ፡ አመ፡ ዕለተ፡ ደይን፡ ወአመ፡ ዕለተ፡ እግዚአብሔር።

⁴ አመ፡ ዕለተ፡ ጽልመት፡ አመ፡ ዕለተ፡ ጣቃ፡ አመ፡ ዕለተ፡ ጊሚ፡ አመ፡ ዕለተ፡ ፀዓዕ፡ አመ፡ ዕለተ፡ መብረቅ።

⁵ አመ፡ ዕለተ፡ ፍርሃት፡ ወረዓድ፡ አመ፡ ዕለተ፡ ደደክ፡ ወመርቂ፡ አመ፡ ዕለተ፡ አሰሐትያ።

⁶ አመ፡ ዕለተ፡ ይትፈደይ፡ እኩይ፡ በከመ፡ ገብረእኩየ፡ ወአመ፡ ይትፈደይ፡ ንጹሕ፡ በከመ፡ ገብረ፡ ንጹሐ፡ ወአመ፡ ይትፈደይ፡ ጸዋግ፡ በከመ፡ ገብረ፡ ፁገ።

⁷ ወአመ፡ ኢይከብር፡ እግዚእ፡ እምገብረ፡ ወአመ፡ ኢትከብር፡ አግዓዚት፡ እምዓመት።

⁸ ወአመ፡ ኢይከብር፡ ንጉሥ፡ እምሰኪን፡ ወመኰንን፡ እምሕፃን፡ ወአብ፡ እምወልዱ፡ ወእም፡ እምወለታ።

⁹ ወአመ፡ ኢይከብር፡ ባዕል፡ እምነደይ፡ ወዕቡይ፡ እምትሑት፡ ወአአመ፡ ኢይከብር፡ ዓቢይ፡ እምንዑሰ፡ እስመ፡ ዕለተ፡ ፍትሕ፡ ይእቲ፡ ወዕለተ፡ ፍዳ፡ ወኵነኔ፡ ወእለት፡ በዘይት፡ ፈደይ፡ ኵሉ፡ በከመ፡ ገብረ።

¹⁰ ወዕለት፡ በዘይትዓሠዩ፡ ገባርያነ፡ ሠናይ፡ ወአመ፡ ይትፈደዩ፡ እኩየ፡ እለ፡ ገብሩእኪት።

¹¹ ወዕለት፡ አመ፡ ይትፌሥሑ፡ እለ፡ ተዓሠዩ፡ ሠናየ፡ ወዕለት፡ አመ፡ የኃዝኑ፡ እለ፡ ተዓሠዩ፡ እኩየ፡ ወይሬእዩ፡ እለ፡ አሐሰዩ፡ መጻሕፍተ፡ እንዘ፡ ይብሉ፡ ኢይትነሥኡ፡ ምውታን።

¹² አሜሃ፡ ይበክዩ፡ ኵሎሙ፡ ኃጥአን፡ ምድር፡ በእንተ፡ ኃጢአቶሙ፡ ዘገብሩ፡ በእንተ፡ ዘረከቦሙ፡ ኃዘን፡ ዘአልቦ፡ ኑዛዜ፡ በእንተ፡ ዘኢገብሩ፡ ሠናየ፡ በዲበ፡ ምድር።

¹³ ወከማሁ፡ ለኄራንሂ፡ እለ፡ ገብሩ፡ ሠናይ፡ ኢየኃልቅ፡ ፍስሐሆሙ፡ እስከ፡ ለዓለመ፡ ዓለም፡ እስመ፡ እንዘ፡ ሀለዉ፡ በዲበ፡ ምድር፡ አድምዑ፡ ገቢረ፡ ሠናይ።

¹⁴ ወኢተዓደዉ፡ ትእዛዘ፡ ፈጣሪሆሙ፡ እስመ፡ አእመሩ፡ ከመ፡ ይትነሥኡ፡ እምነ፡ ምውታን።

¹⁵ ወበእንተ፡ ዘኢተዓደዉ፡ እምትእዛዙ፡ ወይወርሱ

¹⁶ ወበሰማያትኒ፡ አውረሶሙ፡ ምድረ፡ ሕይወት፡ እንተ፡ መሐለ፡ ለአበዊሆሙ፡ አመ፡ ዕለተ፡ ትንሣኤ፡ አመ፡ ይነድዩ፡ አብዕልት።

¹⁷ ወየአወይዉ፡ ገባርያነ፡ እኪት፡ እለ፡ ኢየአምኑ፡ ትንሣኤ፡ ሙታን፡ ወሕገ፡ እግዚአብሔር፡ ወእዕለተ፡ ትንሣኤ፡ ኢተዘከሩ።

¹⁸ አሜሃ፡ ይሬእዩ፡ አንተ፡ ትረክቦሙ፡ እኪተ፡ እንተ፡ አልባቲ፡ ማኅለቅት፡ ወእንተ፡ አል፡ ባቲ፡ ፈውስ፡ ወኢኑዛዜ፡ ወበውስተ፡ ልቦሙኒ፡ ኃዘን፡ ዘአልቦ፡ ኑዛዜ፡ ወአልቦ፡ ዕረፍት።

¹⁹ ወዕፄ፡ ዘኢይነውም፡ ወእሳት፡ ዘኢይጠፍዕ።

²⁰ ወበአፍአ፡ ሥጋሆሙኒ፡ እሳት፡ ወተይ፡ ወመንፈስ፡ ዓውሎ፡ ወሐሰትያ፡ ወበረድ፡ ወደደክ፡ ዘይዞንም፡ ላዕሌሆሙ።

²¹ መቃጽሐ፡ እሳት፡ ለእለ፡ ኢየአምኑ፡ ትንሣኤ፡ ሙታን።