2 Мекабіян 19

Ефіопська Біблія (ґеез)

¹ ኦ፡ ምድር፡ እንተ፡ አስተጋባዕኪዮሙ፡ ለነገሥት፡ ወለመኰንንት፡ ወለዓበይት፡ ወለክቡራን፡ ወለአንስት፡ ላህያት፡ ወለሠናያት፡ ደናግል።

² ወለዕደው፡ ፅኑዓን፡ እለ፡ ቦሙ፡ ሰን፡ ወሠናያን፡ አቍያጽ፡ ወእለ፡ ቦሙ፡ አእምሮ፡ ወልቡና፡ ወእለ፡ ቦሙ፡ ሠናይ፡ ቃል፡ ከመ፡ ቃለ፡ አርጋኖን፡ ነባቢት፡ ወከመ፡ ዝብጠት፡ መሰንቆ፡ ወዕንዚራ።

³ ወእለ፡ ቦሙ፡ ሠናይ፡ ዜማ፡ እለ፡ ያስተፌሥሑ፡ ከመ፡ ስታየ፡ ወይን፡ አዳም፡ አዕይንቲሆሙ፡ ብሩሃት፡ ከመ፡ ኮከብ፡ ጽባሕ።

⁴ ወየማኖሙ፡ ጽኑዕ፡ ከመ፡ ዘይሁብ፡ ወይነሥኦ፡ ወየሐይጱ፡ ወእገሪሆሙ፡ ሠናያን፡ ለርእይ፡ ወለእለ፡ ይረውጻ፡ ከመ፡ መኰራኵር፡ ርቱዓት።

⁵ አእምኔከ፡ ሞት፡ ዘነሣእከ፡ ነፍሣቲሆሙ፡ ለሠናያን፡ ዕደው፡ እስመ፡ በፈቃደ፡ እግዚአብ፡ ሔር፡ ተፈነውከ።

⁶ ወአንቲኒ፡ ምድር፡ እስመ፡ አስተጋባዖኪ፡ ብዙኃት፡ ሥጋተ፡ እለ፡ እምኔኪ፡ አውፅኦሙ፡ እግዚአብሔር፡ ወአግብኦሙ፡ ኀቤኪ፡ እምኔኪ፡ ወፃዕነ፡ ወኀቤኪ፡ ግባዕነ፡ በፈካደ፡ እግዚአብሔር፡ ተፈሣሕነ፡ በፈቃደ፡ እግዚአብሔር፡ ዲቤኪ።

⁷ ወኮንኪ፡ መንደፈ፡ ለአብድንቲነ፡ አንሶሰውነ፡ ዲቤኪ፡ ወኖምነ፡ በውቲትኪ፡ በላዕነ፡ ፍሬኪ፡ ወበላዕኪ፡ ሥጋነ።

⁸ ሠተይነ፡ እምጠለ፡ ነቅዕኪ፡ ወሰተይኪ፡ እምነቅዓ፡ ደምነ፡ በላዕነ፡ እምአንጕዓ፡ ምድርኪ፡ ወበላዕኪ፡ እምአንጕዓ፡ አዕፅምትኒ።

⁹ ባላዕነ፡ እምጠዕመ፡ ሐመድ፡ ጠልኪ፡ ሠናይ፡ በከመ፡ አዘዘኪ፡ እግዚአብሔር፡ ለሲሲትነ፡ ወነሣእኪ፡ ላህየ፡ ሥጋነ፡ ወረሰይኪ፡ ፀበለ፡ በከመ፡ አዘዘኪ፡ እግዚአብሔር፡ ለሲሲትኪ።

¹⁰ ኦ፡ እምኔከ፡ ሞት፡ ዘአስተጋባዕከ፡ ብዙኃነ፡ ኃያላነ፡ ነገሥት፡ ወመኳንንት፡ ወኢፈራህከ፡ እምግርማሆሙ፡ ወእምዕበዮሙ፡ በከመ፡ አዘዘከ፡ ዘፈጠሮሙ፡ ወኢመነንከ፡ ምስኪነ።

¹¹ ወኤምሕርከ፡ እለ፡ ሠናይ፡ ላህዮሙ፡ ወኢኀደገ፡ ኃያላነ፡ ወፅኑዓነ፡ ወኢኀደገ፡ አብዕልተ፡ ወነዳያነ፡ ኃሡማነ፡ ወሠናያነ፡ አዕሩገ፡ ወሕፃናተ፡ ዕደወ፡ ወአንስተ።

¹² ወኢኀደገ፡ እለ፡ ሠናየ፡ ይሔልዩ፡ ወኢትዓደወ፡ እምትእዛዙ፡ ወኢኀደገ፡ እለ፡ እኵየ፡ ይሔልዩ። እለ፡ ኮኑ፡ ከመ፡ እንስሳ፡ በምግባሮሙ፡ ወእለ፡ ፍጹማን፡ በሥነ፡ ላህዮሙ፡ ወቃሎሙ፡ ወጣዕመ፡ ነገሮሙ።

¹³ ወኢኃደገ፡ እለ፡ መሪር፡ ቃሎሙ፡ ወምሉዕ፡ መርገመ፡ ውስተ፡ አፉሆሙ፡ ወአስተጋባዕከ፡ ነፍሳቲሆሙ፡ ውስተ፡ መዛግብቲከ፡ እመሂ፡ ዘብሃን፡ ውእመሂ፡ ዘጽልመት።

¹⁴ ወምድርኒ፡ አስተጋብዖት፡ ሥጋሆሙ፡ እመሂ፡ ውስተ፡ ኰኵሕ፡ ወአመሂ፡ ውስተ፡ መሬት፡ እስከ፡ አመ፡ ንፍሐተ፡ ቀርን፡ ወይትነሥኦ፡ ምውታን።

¹⁵ ወይትፈደዩ፡ ገባርያነ፡ እስከ፡ በከመ፡ ምግባሮሙ፡ ዘገብሩ፡ እስመ፡ በንፍሐተ፡ ቀርን፡ ወበትእዛዘ፡ እግዚአብሔር፡ ይትነሥኡ፡ ምውታን፡ ከመ፡ ቅጽበተ፡ ዓይን፡ ወይት፡ ፌሥሑ፡ እለ፡ ሠናየ፡ ገብሩ።