3 Мекабіян 10

Ефіопська Біблія (ґеез)

¹ ስማዕ፡ ለእመ፡ ኢተአምን፡ ትንሣኤ፡ ሙታን፡ ሚመጠነ፡ ይትነሥኡ፡ ነፍሳተ፡ ዘእንበለ፡ ይትወለዱ፡ በክረምት፡ እስመ፡ መንፈሰ፡ እግዚአብሔር፡ የአርፍ፡ ላዕሌሆሙ፡ በከመ፡ ነፍሐ፡ ቀዲሙ።

² ወይኤዝዞሙ፡ ቀዲሙ፡ በቃሉ፡ ከመ፡ ይሙቱ።

³ ወይትነሥኡ፡ በከመ፡ ፈቃደ፡ እንዘ፡ ይበሊ፡ ሥጋሆሙ፡ ወይትኄይስ፡ ዳግሙ።

⁴ ወካዕበ፡ ሶበ፡ ይወርድ፡ ዝናም፡ ወያረውያ፡ ለምድር፡ የሐይዉ፡ ወየሐውሩ፡ በከመ፡ ተሠርዑ፡ ቀዳሚ።

⁵ እስመ፡ ይቤ፡ ወኮኑ፡ ኵሉ፡ ዘነፍሰ፡ ሕይወት፡ ዘይትሐወስ፡ በዲበ፡ ምድር፡ ወኵሎ፡ ነፍሰ፡ ሕይወት፡ ዘይጐሥእ፡ ማይ፡ እስመ፡ መንፈሰ፡ እግዚአብሔር፡ ይጼልል፡ መልዕልተ፡ ማይ፡ ወበመንፈሱ፡ ወብካሉ፡ ይትወሀብ፡ ሎሙ፡ መንፈሰ፡ ሕይወት።

⁶ ርኢኪ፡ ኦዕውረ፡ ልብ፡ ዘትብል፡ ኢይትነሥኡ፡ ምውታን፡ እስመ፡ በመንፈሱ፡ ወበቃሉ፡ ይከውኑ፡ ዘእንበለ፡ እም፡ ወአብ፡ እመ፡ ብከ፡ አእምሮ፡ ወጥበብ፡ እፎ፡ ትብል፡ ኢይት፡ ነሥኡ፡ ምውታን፡ በቃለ፡ እግዚአብሔር፡ ፈጣሪሆሙ።

⁷ ወአንተሰ፡ ነስሕ፡ ወግባዕ፡ ውስተ፡ እመንተከ፡ እስመ፡ በቃለ፡ እግዚአብሔር፡ የሐይዉ፡ ምውታን፡ እለ፡ ኮኑ፡ ሐመደ፡ ወፀበለ፡ ውስተ፡ ምድር።

⁸ ወይትነሥኡ፡ በጠለ፡ ምሕረቱ፡ ዘእምኀበ፡ እግዚአብሔር፡ በከም፡ ነበበ፡ ቃሉ፡ ቀዳሚ፡ ወውእቱ፡ ቃል፡ የዓውድ፡ ኵሎ፡ ወያነሥኦሙ፡ ለምዉታን፡ በከመ፡ ፈቀደ።

⁹ አእምርኪ፡ ከመ፡ ትትነሣእ፡ ወትቀውም፡ ቅድሜሁ፡ ወኢይምሰልከ፡ በከመ፡ ሕሊናከ፡ ዘትተርፍ፡ ውስተ፡ መቃብር።

¹⁰ ወአኮ፡ ከማሁ፡ ትትነሣእ፡ ወትትፈደይ፡ መጠነ፡ ገበርከ፡ በዲበ፡ ምድር፡ እመኒ፡ ሠናየ፡ ወእ፡ መኒ፡ እኩየ፡ እስመ፡ ዕለተ፡ ፍዳ፡ ይእቲ።

¹¹ አመ፡ ትንሣኤ፡ ትትፈደይ፡ ኵሎ፡ ዘገበርከ፡ ኃጣውአ፡ ወትሠልጥ፡ መጽሐፈ፡ ዕዳከ፡ ዘተጽሕፈ፡ እምንዕስከ፡ እስከ፡ አሜሃ፡ ወአልብክሙ፡ ምክንያተ፡ በከመ፡ ግብረ፡ ዝንቱ፡ ዓለም፡ ዘታመከኒ፡ በኃጢአትከ፡ ከመ፡ ትክሀድ፡ በኃጢአት።

¹² ወታቀውም፡ ከመ፡ ጽድቅ፡ በቅድሜከ፡ ለሐሰት፡ ቃልከ፡ ወትረስዮ፡ ከመ፡ ጽድቅ፡ ለውእቱ፡ ሐሰት፡ ዘነበብከ።

¹³ ወአልቦ፡ አመክንዮ፡ በህየ፡ እስመ፡ መንፈሰ፡ እግዚአብሔር፡ ይትናበብ፡ በላዕሌከ፡ እስመ፡ ይእቲ፡ ተአምር፡ ኵሉ፡ ምግባረ፡ እከይከ፡ ዘገበርከ፡ ወትከሥት፡ ለከ፡ ኀበ፡ እግዚአብሔር፡ ፈጣሪሃ።

¹⁴ ወበህየ፡ ተኃፍር፡ በእንተ፡ ዘገበርከ፡ ኃጢአት፡ ወእምቅድመ፡ ትብጻሕየ፡ አስተፋጥን፡ ለገቢረ፡ ንስሐ፡ በዝየ፡ ከመ፡ ኢትትኃፈር፡ በቅድመ፡ መላእክት፡ ወሰብእ፡ አመ፡ ዕለተ፡ ኵነኔ፡ አላ፡ ከመ፡ ትትወደስ፡ ምስለ፡ እለ፡ ይትዌደስ፡ በስነ፡ ምግባሮሙ።

¹⁵ ወይነሥኡ፡ አሰቦሙ፡ በኀበ፡ ዘፈጠሮሙ፡ ዘእንበለ፡ ኃፍረት፡ ምስለ፡ መላእክት፡ እለ፡ ይሴብሕዎ፡ ለእግዚአብሔር፡ ወይትፌሥሑ፡ ወእመሰ፡ ኢገብርከ፡ ሠናየ፡ በሕይወትከ፡ እንዘ፡ ሀሎከ፡ በሥጋከ፡ አልብከ፡ መክፈልት፡ ምስለ፡ ጻድቃን።

¹⁶ ወይከውን፡ ለከ፡ ንስሐ፡ በኀበ፡ ኢይበቍዓከ፡ እስመ፡ ሊተ፡ ደለውከ፡ እንዘብከ፡ አእምሮ፡ ሤጥ፡ ወምሥያጥ፡ ወእንዘ፡ ብከ፡ ንዋይ፡ ኢያፍአምከ፡ ለርኁብ።

¹⁷ ወእንዘ፡ ብከ፡ ልብሰ፡ ኢያልበስከ፡ ለዕሩቅ፡ ወእንዘ፡ ብከ፡ ሥልጣን፡ ኢበላህኮ፡ ለግፉዕ።

¹⁸ ወእንዘ፡ ብከ፡ አእምሮ፡ ኢያለብውኮ፡ ለኃጥእ፡ ከመ፡ ይትመይጥ፡ ወይነስሕ፡ ወይሥረይ፡ ሎቱ፡ እግዚአብሔር፡ ኃጢአቶ፡ አንተ፡ በኢያእምሮ፡ አበሰ፡ ቀዲሙ፡ ወእንዘ፡ ብከ፡ ኃይል፡ ኢትጋደልከ፡ እምእለ፡ ይጸብዑከ፡ ከመ፡ ትክሃል፡ መዊዓ።

¹⁹ ወእንዘ፡ ብከ፡ ፅንዕ፡ ኢጾምከ፡ ወኢጸለይከ፡ ከመ፡ ታድክም፡ ኃይለ፡ ውርዝውትከ፡ ዘበሥጋ፡ ወከመ፡ ታግርር፡ ርእሰከ፡ ለጽድቅ፡ ወአኮ፡ ለአድልዎ፡ ሥጋ፡ ዘበዓለም።

²⁰ ወአኮ፡ ለተድላ፡ ዘበዓለም፡ ለመባልዕት፡ ጥዑማት፡ ወበስቲ፡ ሠናያን፡ ወአኮ፡ በአልባሰ፡ ቀጠንት፡ ወበተሠርግዎ፡ ወርቅ፡ ወብሩር።

²¹ ወበአዕባነ፡ ሕንደኬ፡ ክቡራን፡ ወጳዝዮን፡ ወበመረግድ፡ ወአኮ፡ ዝንቱ፡ ዘይደሉ፡ ሠርጐ፡ ብእሲ።

²² አላ፡ ሠርጕሰ፡ ለብእሲ፡ ንጽሕና፡ ወጥበብ፡ ወአእምሮ፡ ወተፋቅሮ፡ በንጽሕ፡ ዘእንበለ፡ ተቃንዖ፡ ወሕመሚ፡ ዘእንበለ፡ ኑፋቄ፡ ወጽልዕ፡ ወእንዘ፡ ታፈቅር፡ ቢጽከ፡ ከመ፡ ነፍስከ።

²³ ወእንዘ፡ ኢትፈዲ፡ እኩየ፡ ለዘገብረ፡ ለከ፡ እኩየ፡ ከመ፡ ትባእ፡ ውስተ፡ ማኅደር፡ ዘተውህበ፡ ለዕጉሣን፡ ወከመ፡ ይዕሢከ፡ ምስሌሆሙ፡ ለእለ፡ ወረስዋ፡ ለምድር፡ ቅድስት፡ በትዕ፡ ግሥት፡ ወበአእምሮ፡ ወልቡና፡ ወበተሰፍዎ፡ መንግሥተ፡ ሰማያት፡ ለአመ፡ ትንሣኤ።

²⁴ ወኢትበሉ፡ ኢንትነሣእእሙታን፡ እስመ፡ ዘንተ፡ እለ፡ ይብሉ፡ ወይሔልዩ፡ ያቀብዖሙ፡ ተስፋ፡ ዲያብሎስ፡ ከመ፡ ኢይድኃኑ፡ አመ፡ ትንሣኤ፡ ወየአምሩ፡ አመ፡ ትበጽሖሙ፡ ወየኀዝኑ፡ ወይትክዙ፡ በእያእምሮ፡ ዘገብሩ፡ ከመ፡ ይትሐሰቦሙ፡ ለእከይ፡ አመ፡ ትንሣኤ፡ እስመ፡ ኢአምንዎ፡ ከመ፡ ይትነሥኡ፡ በይእቲ፡ ዕለት።

²⁵ ወበእንተዝ፡ ይትወቀሱ፡ በከም፡ እከየ፡ ምግባሮሙ፡ ዘገብሩ፡ በዲበ፡ ምድር፡ ወይሬዕይዎ፡ ለእንተ፡ ክህዱ፡ ትንሣኤ፡ ዘበሥጋ፡ ኅቡረ።

²⁶ ወይእተ፡ አሚረ፡ ይበክዩ፡ በእንተ፡ ዘኢያሠነዩ፡ ፍኖቶሙ፡ ወሶበ፡ ይበክዩ፡ በዲበ፡ ምድር፡ እምኀየሶሙ፡ ሶበ፡ ተክህሎሙ፡ ከመ፡ ኢይኩኑ፡ በካይያነ፡ በህየ።

²⁷ ወለ፡ እመ፡ ኢበከይነ፡ በፈቃድነ፡ ዝየ፡ ይበክዩነ፡ በህየ፡ ዘእንበለ፡ ፈቃድነ፡ ወሶበ፡ ኢያስ፡ ተዳሎነ፡ ንስሐ፡ በዝየ፡ ናስተዳሉ፡ ብካየ፡ ወገዐረ፡ በህየ፡ በኀበ፡ ኢይበቍዓነ።

²⁸ ወአስተዳለዉ፡ ገቢረ፡ ሠናይ፡ ከመ፡ ትዕድዉ፡ እሞት፡ ውስተ፡ ሕይወት፡ ወእምዛቲ፡ ምድር፡ ኃላፊት፡ እንተ፡ በላዕሉ፡ ሰማያዊ፡ ወእምዛቲ፡ እንተ፡ በምድር፡ እንተ፡ በሰማያት፡ ብርሃን።

²⁹ ወዕበያ፡ ለፍግዓ፡ ዘበምድር፡ ዘእንበለ፡ ዓቅም፡ ከመ፡ በህየ፡ ትትፌጻሕ፡ ፍሥሐ፡ ዘኢየ፡ ኃልቅ፡ በመንግሥተ፡ ሰማያት፡ ምስለ፡ እለ፡ የአምኑ፡ ትንሣኤ፡ ሙታን፡ እምይእዜ፡ ወእስከ፡ ለዓለመ፡ ዓለም፡ ወአሜን።