Ювілеї 30

Ефіопська Біблія (ґеез)

¹ ወበቀዳሚ፡ ዓመት፡ ዘሱባዔ፡ ሳድስ፡ ዐርገ፡ ሳሌምሃ፡ ዘመንገለ፡ ጽባሒሁ፡ ለሰዊማ፡ በሰላም፡ በራብዕ፡ ወርኅ።

² ወበህየ፡ መሠጥዋ፡ ለዲና፡ ለወለተ፡ ያዕቆብ፡ ውስተ፡ ቤተ፡ ሴኬም፡ ወልደ፡ ኤሞር፡ ኤዋዊ፡ መኰንነ፡ ምድር፡ ወሰከበ፡ ምስሌሃ፡ ወአርኰሳ።

³ ወአስተብቍዐ፡ እምኀበ፡ አቡሃ፡ ትትወሀብ፡ ሎቱ፡ ብእሲተ፡ ወእምኀበ፡ አኃዊሃ፡ ብእሲተ፡ ሎቱ።

⁴ ወቦኡ፡ ስምዖን፡ ወሌዊ፡ ሰዊማሃ፡ ግብተ፡ ወገብሩ፡ ኵነኔ፡ ላዕለ፡ ኵሎሙ፡ ዕደወ፡ ሰቂሞን፡ ወቀተሉ፡ ኵሎ፡ ብእሴ፡ ዘረከቡ፡ ውስቴታ፡ ወኢያትረፉ፡ ውስቴታ፡ ወኢአሐደ፡ ኵሎ፡ ቀተሉ፡ በጻዕር፡ እስመ፡ ገመኑ፡ ዲናሃ፡ እኅቶሙ።

⁵ ወከመዝ፡ እንከ፡ ኢይትገበር፡ እምይእዜ፡ ለአርኵሶ፡ ወለተ፡ እስራኤል፡ እስመ፡ በሰማይ፡ ተሠርዐ፡ ላዕሌሆሙ፡ ኵነኔ፡ ከመ፡ ያጥፍእዎሙ፡ በሰይፍ፡ ለኵሎሙ፡ ዕደወ፡ ሰቂማ፡ እስመ፡ ገብሩ፡ ኀፍረተ፡ ውስተ፡ እስራኤለ።

⁶ ወመጠዎሙ፡ እግዚአብሔር፡ ውስተ፡ እደ፡ ውሉደ፡ ያዕቆብ፡ ከመ፡ ይሠርውዎሙ፡ በሰይፍ፡ ወከመ፡ ይግበሩ፡ ላዕሌሆሙ፡ ኵነኔ።

⁷ ወብእሲ፡ እመቦ፡ ዘፈቀደ፡ በውስተ፡ እስራኤል፡ የሀብ፡ ወለቶ፡ ወእመኒ፡ እኅቶ፡ ለኵሉ፡ ብእሲ፡ ዘእምዘርአ፡ አሕዛብ፡ ሞተ፡ ይሙት፡ ወበእብን፡ ይውግርዎ፡ እስመ፡ ገብረ፡ ኀፍረተ፡ በውስተ፡ እስራኤል።

⁸ ወኢይትረከብ፡ ዘማ፡ ወርኩስ፡ በውስተ፡ እስራኤል፡ ኵሎ፡ መዋዕለ፡ ትውልደ፡ ምድር፡ እስመ፡ ቅዱስ፡ እስራኤል፡ ለእግዚአብሔር።

⁹ እስመ፡ ከመዝ፡ ተሠርዐ፡ ወተጽሕፈ፡ ውስተ፡ ጽላተ፡ ሰማይ፡ በእንተ፡ ኵሉ፡ ዘርአ፡ እስራኤል፡ ዘያረኵስ፡ ሞተ፡ ለይሙት፡ ወበእብን፡ ይውግርዎ።

¹⁰ ወአልቦ፡ ለዝ፡ ሕግ፡ ዐቅመ፡ መዋዕል፡ ወአልቦ፡ ኅድገተ፡ ወኵሎ፡ ስርየተ፡ ዘእንበለ፡ ዳእሙ፡ ይሠረው፡ ብእሲ፡ ዘአርኰሰ፡ ወለቶ፡ በማእከለ፡ ኵሉ፡ እስራኤል፡ እስመ፡ እምውስተ፡ ዘርኡ፡ ወሀቦ፡ ለሞሎክ፡ ወአበሰ፡ ለአርኵሶቱ።

¹¹ ወአንተኒ፡ ሙሴ፡ አዝዞሙ፡ ለደቂቀ፡ እስራኤል፡ ወአስምዕ፡ ላዕሌሆሙ፡ ከመ፡ ኢየሀቡ፡ እምነ፡ አዋልዲሆሙ፡ ለአሕዛብ፡ ወከመ፡ ኢይንሥኡ፡ እምአዋልደ፡ አሕዛብ፡ እስመ፡ ምኑን፡ ውእቱ፡ በቅድመ፡ እግዚአብሔር።

¹² በእንተዝ፡ ጸሐፍኩ፡ ለከ፡ ውስተ፡ ቃለ፡ ሕግ፡ ኵሎ፡ ግብሮሙ፡ ለሰቂማ፡ ዘገብሩ፡ ላዕለ፡ ዲና፡ ወዘከመ፡ ተናገሩ፡ ደቁ፡ ለያዕቆብ፡ እንዘ፡ ይብሉ፡ ኢንሁብ፡ ወለተነ፡ ለሰብእ፡ ዘቦ፡ ቍልፈተ፡ እስመ፡ ጽዕለት፡ ውእቱ፡ ለነ።

¹³ ወጽዕለት፡ ውእቱ፡ ለእስራኤል፡ ለእለ፡ ይሁቡ፡ ወለእለ፡ ይነሥኡ፡ እምነ፡ አዋልደ፡ አሕዛብ፡ እስመ፡ ርኩስ፡ ውእቱ፡ ወምኑን፡ ውእቱ፡ እምእስራኤል።

¹⁴ ወኢይነጽሕ፡ እስራኤል፡ እምዝ፡ ርኵስ፡ ዘቦ፡ ብእሲተ፡ እምነ፡ አዋልደ፡ አሕዛብ።

¹⁵ እስመ፡ መቅሠፍት፡ ላዕለ፡ መቅሠፍት፡ ውእቱ፡ ወመርገም፡ ላዕለ፡ መርገም፡ ወኵሉ፡ ኵነኔ፡ ወመቅሠፍት፡ ወመርገም፡ ይመጽእ።

¹⁶ ወአልቦ፡ ነሢአ፡ ገጽ፡ ወአልቦ፡ አድልዎ፡ ለገጽ፡ ወአልቦ፡ ነሢአ፡ እምእዴሁ፡ ፍሬ፡ ወመሥዋዕተ፡ ወጽንሐሐ፡ ወስብሐ፡ ወተምዕዞ፡ መዓዛ፡ ሠናይ፡ ከመ፡ ይትወከፎ።

¹⁷ በእንተዝ፡ አዘዝኩከ፡ እንዘ፡ እብል፡ አስምዕ፡ ዛተ፡ ስምዐ፡ ላዕለ፡ እስራኤል።

¹⁸ ወተኀርየ፡ ዘርአ፡ ሌዊ፡ ለክህነት፡ ወለሌዋዊያን፡ ከመ፡ ይትለአኩ፡ ቅድመ፡ እግዚአብሔር፡ ከመ፡ ንሕነ፡ በኵሉ፡ መዋዕል።

¹⁹ ወከመዝ፡ ያዐርጉ፡ ሎቱ፡ በስምዕ፡ ውስተ፡ ጽላተ፡ ሰማይ፡ በረከተ፡ ወጽድቀ፡ ቅድሜሁ፡ ለአምላከ፡ ኵሉ።

²⁰ ወንዜክር፡ ንሕነ፡ ጽድቀ፡ ዘገብረ፡ ሰብእ፡ በሕይወቱ፡ በኵሉ፡ ጊዜያት፡ ዘዓመት፡ እስከ፡ ዐሠርቱ፡ ምእት፡ ትውልድ፡ ያዐርጉ፡ ወይመጽእ፡ ሎቱ፡ ወለትውልዱ፡ እምድኅሬሁ፡ ወተጽሕፈ፡ ዐርከ፡ ወጻድቀ፡ ውስተ፡ ጽላተ፡ ሰማይ።

²¹ ኵሎ፡ ዘንተ፡ ነገረ፡ ጸሐፍኩ፡ ለከ፡ ወአዘዝኩከ፡ ከመ፡ ትንግር፡ ለውሉደ፡ እስራኤል፡ ከመ፡ ኢይግበሩ፡ አበሳ፡ ወኢይትዐደዉ፡ ሥርዐተ፡ ወኢይንሥቱ፡ ኪዳነ፡ እንተ፡ ተሠርዐት፡ ሎሙ፡ ከመ፡ ይግበርዋ፡ ወይጸሐፉ፡ አዕርክተ።

²² ወእመሰ፡ ተዐደዉ፡ ወገብሩ፡ እምኵሉ፡ ፍናዊሃ፡ ለርኵስ፡ ይጸሐፉ፡ ውስተ፡ ጽላተ፡ ሰማይ፡ ጸላእተ፡ ወይደመሰሱ፡ እመጽሐፈ፡ ሕያዋን፡ ወይጸሐፉ፡ ውስተ፡ መጽሐፈ፡ እለ፡ ይትሐጐሉ፡ ወምስለ፡ እለ፡ ይሤረዉ፡ እምውስተ፡ ምድር።

²³ ወበዕለተ፡ ቀተሉ፡ ውሉደ፡ ያዕቆብ፡ ሰቂማሃ፡ ዐርገ፡ ሎሙ፡ መጽሐፍ፡ ውስተ፡ ሰማይ፡ ከመ፡ ገብሩ፡ ጽድቀ፡ ወርትዐ፡ ወበቀለ፡ ላዕለ፡ ኃጥኣን፡ ወተጽሕፈ፡ ለበረከት።

²⁴ ወአውፅኡ፡ ዲናሃ፡ እኅቶሙ፡ እምነ፡ ቤተ፡ ሴኬም፡ ወፄወዉ፡ ኵሎ፡ ዘሀሎ፡ ውስተ፡ ሰቂሞን፡ አባግዒሆሙ፡ ወአልህምቲሆሙ፡ ወአእዱጊሆሙ፡ ወኵሎ፡ ንዋዮሙ፡ ወኵሎ፡ መራዕዮሙ፡ ወአምጽኡ፡ ኵሎ፡ ኀበ፡ ያዕቆብ፡ አቡሆሙ።

²⁵ ወተናገረ፡ ምስሌሆሙ፡ በእንተ፡ ዘቀተሉ፡ ሀገረ፡ እስመ፡ ፈርሀ፡ እምእለ፡ ይነብሩ፡ ምድረ፡ እምእለ፡ ከነናዊያን፡ ወፈሪዛዊያን።

²⁶ ወኮነ፡ ግርማ፡ እግዚአብሔር፡ ውስተ፡ ኵሎን፡ አህጉር፡ ዘአውዳ፡ ለሰቂሞን፡ ወኢተንሥኡ፡ ለሰዲደ፡ ውሉዶ፡ ለያዕቆብ፡ እስመ፡ ድንጋፄ፡ ወድቀ፡ ላዕሌሆሙ።