3 Meqabyan 8

The Ethiopic Bible (Ge'ez)

¹ ተወከለ፡ ኢዮብ፡ በእግዚአብሔር፡ ወአድኀኖ፡ እምኵሉ፡ ምንዳቤሁ፡ ዘአምጽአ፡ ቦቱ፡ ዲያብሎስ፡ ፀረ፡ እጓለ፡ እመሕያው፡ እስመ፡ አልቦ፡ ተሕክዮ፡ ባረኮ፡ እግዚአብሔር፡ አምላኩ፡ ወኢያኅዘነ፡ ልቦ፡ በዘበጽሐ፡ ላዕሌሁ፡ ምንዳቤ፡ እለ፡ ይቤ፡ እግዚአብሔር፡ ወእግዚአብሔር፡ ነሥኦ፡ ወኮነ፡ ከመ፡ እግዚአብሔር፡ ፈቃደ፡ ወበኵሉ፡ ይኩን፡ ቡርከ፡ ስሙ፡ ለእግዚአብሔር፡ በሰማይ፡ ወምድር።

² ወሶበ፡ ርእየ፡ እግዚአብሔር፡ ለኢዮብ፡ ከመ፡ ንጽሕት፡ ልቡ፡ ተወክፎ፡ እግዚአብሔር፡ በብዙኅ፡ ክብር።

³ ወወሀቦ፡ ብዕለ፡ ዘይበዝኅ፡ እምቀዲሙ፡ ብዕሉ፡ ወፈወሶ፡ እምቍስሉ፡ በእንተ፡ ትዕግሥቱ፡ በኵሉ፡ ዘበጽሖ፡ እስመ፡ ኮነ፡ መስተዓግሠ፡ ፈድፋደ።

⁴ ወከማሁ፡ አንትሙኒ፡ ለእመ፡ ኮንክሙ፡ መስተዓግሣነ፡ እምዘይትፌነዉ፡ ፀባዒት፡ ላዕሌክሙ፡ ትከውኑ፡ ብፁዓነ።

⁵ ተዓገሡኬ፡ ወኢታንጥዩ፡ ልበክሙ፡ እምዘበጽሐ፡ ላዕሌክሙ፡ ምንዳቤ፡ ከመ፡ እግዚአ፡ ብሔር፡ ይኩንክሙ፡ ፀወነ፡ እምእለ፡ ይትቃረኑክሙ፡ ወላዕለ፡ ውሉድክሙ፡ ወለውለደ፡ ውልድክሙ፡ እምድኅሬክሙ።

⁶ ተወከልዎ፡ ወይከውንክሙ፡ ፀወነ፡ ፀውዕዎ፡ ወይከውነክሙ፡ ሰማዔ፡ ተሰፈውዎ፡ ወይከው፡ ንክሙ፡ መሐሬ፡ ሰአልዎ፡ ወይከውነክሙ፡ አቢ።

⁷ ተዘከሩ፡ አስቴርሃ፡ ወመርደክዮስሃ፡ ውዮዲትሃ፡ ወጌዴዎንሃ፡ ወባርቅሃ፡ ወዲቦራሃ፡ ወሶምሶንሃ፡ ወዮፍታሔሃ።

⁸ ወባዕደንሂ፡ እለ፡ ከማሆሙ፡ አጥብኡ፡ ተወከሎ፡ በእግዚአብሔር፡ ወኢምዕዎሙ፡ ፀሮሙ።

⁹ እለሰ፡ ይፈቅዱ፡ ይግበሩ፡ እኪተ፡ ላዕሌሆሙ፡ ትፈድዮ፡ እኪተ፡ እስመ፡ ጽድቅ፡ እግዚአ፡ ብሔር፡ ወኢያደሉ፡ ለገጽ፡ ለኵሎሙ፡ እለ፡ ይፈርህዎ፡ ወይገብሩ፡ ጽድቀ፡ የዓቅብ፡ ነፍሳቲሆሙ፡ ወይሁቦሙ፡ ክብረ፡ ወሞገሰ።

¹⁰ ወያስተፌሥሖሙ፡ በበአቶሙ፡ ወበፀዓቶሙ፡ በሞቶሙ፡ ወበሕይወቶሙ፡ ወበንብረቶሙ፡ ወበተንሥኦቶሙ፡ እስመ፡ ውእቱ፡ ያሕዩ፡ ወይቀትል።

¹¹ ወውእቱ፡ ይቀሥፍ፡ ወይሣሃል።

¹² ወውእቱ፡ ያነዲ፡ ወያበልዕ፡ ወውእቱ፡ ያኃሥር፡ ወያከብር።