Jubilees 19

The Ethiopic Bible (Ge'ez)

¹ ወበዓመት፡ አሐዱ፡ ዘሱባዔ፡ ቀዳሚ፡ በዘ፡ አርብዓ፡ ወክልኤቱ፡ ኢዮቤልዉ፡ ተመይጠ፡ አብርሃም፡ ወኀደረ፡ አንጸረ፡ ኬብሮን፡ ዛቲ፡ ይእቲ፡ ቀሪያታርባቅ፡ ክልኤ፡ ሱባዔ፡ ዓመት።

² ወበዓመት፡ ቀዳሚ፡ ዘሱባዔ፡ ሣልስ፡ ዘዝ፡ ኢዮቤልዉ፡ ተፈጸመ፡ መዋዕለ፡ ሕይወተ፡ ሳራ፡ ወሞተት፡ በኬብሮን።

³ ወሖረ፡ አብርሃም፡ ከመ፡ ይብኪያ፡ ወይቅብራ።

⁴ እስመ፡ በትዕግሥተ፡ መንፈስ፡ ተናገረ፡ ምስለ፡ ውሉደ፡ ኬጥ፡ ከመ፡ የሀብዎ፡ መካነ፡ ከመ፡ ይቅበር፡ በድኖ፡ ውስቴቱ።

⁵ ወእግዚአብሔር፡ ወሀቦ፡ ሞገሰ፡ ሎቱ፡ በቅድመ፡ ኵሎሙ፡ እለ፡ ይሬእይዎ።

⁶ ወእሙንቱሂ፡ ያስተበቍዕዎ፡ እንዘ፡ ይብሉ፡ ነሀብከ፡ በከ፡ ወኢነሥአ፡ እምእዴሆሙ፡ በከ፡ እስመ፡ ወሀበ፡ ሤጦ፡ ለመካን፡ ብሩረ፡ ፍጹመ።

⁷ ወኮነ፡ ኵሉ፡ መዋዕለ፡ ሕይወታ፡ ለሳራ፡ ምእት፡ ወዕሥራ፡ ወሰብዐቱ፡ እሉ፡ ዝክልኤ፡ ኢዮቤልዉ፡ ወአርባዕቱ፡ ሱባዔ፡ ወዓመት፡ አሐዱ፡ ዝንቱ፡ መዋዕለ፡ ዓመታተ፡ ሕይወታ፡ ለሳራ።

⁸ ወዝመከራ፡ ዓሥር፡ በዘ፡ ተመከረ፡ ቦቱ፡ አብርሃም፡ ወተረክበ፡ ምእመነ፡ ዕጉሠ፡ መንፈስ።

⁹ ወኢይቤ፡ ቃለ፡ በእንተ፡ ንባብ፡ ዘምድር፡ ዘይቤ፡ እግዚአብሔር፡ የሀባ፡ ኪያሃ፡ ሎቱ፡ ወለዘርኡ፡ እምድኅሬሁ።

¹⁰ ወበዓመት፡ ራብዕ፡ ሎቱ፡ ነሥአ፡ ለይስሐቅ፡ ወልዱ፡ ብእሲተ፡ ወስማ፡ ርብቃ፡ ወለተ፡ ባቱኤል፡ ወልደ፡ ናኮር፡ እኅወ፡ አብርሃም፡ እኅተ፡ ላባ፡ ወባቱኤል፡ ወለዶሙ፡ ለባቱኤላዊያን፡ ወልደ፡ ሜልከ፡ ዘብእሲተ፡ ናኮር፡ እኅወ፡ አብርሃም።

¹¹ ወአብርሃም፡ ነሥአ፡ ሎቱ፡ ሣልስተ፡ ብእሲተ፡ ወስማ፡ ኬጡራ፡ እምነ፡ ውሉደ፡ ልደ፡ ቤቱ፡ አመ፡ ሞተት፡ አጋር፡ እምቅድመ፡ ሳራ።

¹² ወወለደት፡ ሎቱ፡ ውሉደ፡ ስድስተ፡ ዘንበሪሃ፡ ወያክስንሃ፡ ወማዳይሃ፡ ወማዳንሃ፡ ወኢያዝቦቅሃ፡ ወሴሂያሃ፡ በክልኤ፡ ሱባዔ፡ ዓመት።

¹³ ወበሱባዔ፡ ሳድስ፡ በካልእ፡ ዓመቱ፡ ወለደት፡ ርብቃ፡ ለይስሐቅ፡ ክልኤ፡ ደቂቀ፡ ያዕቆብሃ፡ ወዔሳውሃ፡ ወያዕቆብሰ፡ ፍጹም፡ ወራትዕ፡ ወዔሳው፡ ውእቱ፡ ብእሲ፡ ድሩክ፡ ወሐቃላዊ፡ ወጸጓር፡ ወያዕቆብ፡ የኀድር፡ ውስተ፡ ምጽላላት።

¹⁴ ወልህቁ፡ ወራዙት፡ ወተምህረ፡ ያዕቆብ፡ መጽሐፈ፡ ወዔሳውሰ፡ ኢተምህረ፡ እስመ፡ ብእሲ፡ ሐቃላዊ፡ ውእቱ፡ ወነዓዊ፡ ወተምህረ፡ ፀብአ፡ ወኵሉ፡ ግብሩ፡ ድሩክ።

¹⁵ ወያፈቅር፡ ያዕቆብሃ፡ አብርሃም፡ ወይስሐቅ፡ ዔሳውሃ።

¹⁶ ወርእየ፡ አብርሃም፡ ግብሮ፡ ለዔሳው፡ ወአእመረ፡ ከመ፡ በያዕቆብ፡ ይጼዋዕ፡ ሎቱ፡ ስም፡ ወዘርእ።

¹⁷ ወይቤላ፡ ወለትየ፡ ዕቀቢ፡ ወልድየ፡ ያዕቆብሃ፡ እስመ፡ ውእቱ፡ ይከውን፡ ህየንቴየ፡ ዲበ፡ ምድር፡ ወለበረከት፡ በማእከለ፡ ውሉደ፡ ሰብእ፡ ወለኵሉ፡ ዘርአ፡ ሴም፡ ለትምክሕት።

¹⁸ እስመ፡ አአምር፡ ከመ፡ ኪያሁ፡ የኀሪ፡ እግዚአብሔር፡ ሎቱ፡ ለሕዝብ፡ ቃውም፡ እምኵሎሙ፡ እለ፡ ዲበ፡ ገጸ፡ ምድር።

¹⁹ ወናሁ፡ ይስሐቅ፡ ወልድየ፡ ያፈቅሮ፡ ለዔሳው፡ እምነ፡ ያዕቆብ፡ ወአነ፡ እሬእየኪ፡ መፍቀሪተ፡ ጽድቅ፡ ያዕቆብሃ።

²⁰ ወስኪ፡ ዓዲ፡ አሠንዮ፡ ላዕሌሁ፡ ወይኩና፡ አዕይንቲኪ፡ ላዕሌሁ፡ ለፍቁር።

²¹ ይጽንዓ፡ እደዊኪ፡ ወትትፈሣሕ፡ ልብኪ፡ በወልድኪ፡ ያዕቆብ።

²² እመ፡ ይክል፡ ሰብእ፡ ኆልቆ፡ ኆፃ፡ ምድር፡ ከማሁ፡ ይትኌለቁ፡ ዘርኡሂ።

²³ ወኵሎን፡ በረከት፡ እለ፡ ባረከኒ፡ እግዚአብሔር፡ ኪያየ፡ ወዘርእየ፡ ለያዕቆብ፡ ወለዘርኡ፡ ይኩን፡ ኵሎ፡ መዋዕለ።

²⁴ ወበዘርኡ፡ ይትባረክ፡ ስምየ፡ ወስመ፡ አበዊየ፡ ሴም፡ ወኖኅ፡ ወሄኖክ፡ ወመላልኤል፡ ወሄኖስ፡ ወሴት፡ ወአዳም።

²⁵ ወእሙንቱ፡ ይኩኑ፡ ለሣርሮ፡ ሰማይ፡ ወለአጽንዖ፡ ምድር፡ ወለሐድሶ፡ ኵሉ፡ ብርሃናት፡ ዘዲበ፡ ምጽናዓት።

²⁶ ወጸውዖ፡ ለያዕቆብ፡ በቅድመ፡ አዕይንቲሃ፡ ለርብቃ፡ እሙ፡ ወሰዐሞ፡ ወባረኮ፡ ወይቤ።

²⁷ ወልድየ፡ ያዕቆብ፡ ፍቁር፡ ዘአፍቀረት፡ ነፍስየ፡ ይባርከ፡ አምላክ፡ እመልዕልተ፡ ምጽናዓት፡ ወየሀብከ፡ ኵሎን፡ በረከታተ፡ እለ፡ ባረኮ፡ ለአዳም፡ ወሄኖክሃ፡ ወኖኅሃ፡ ወሴምሃ፡ ወኵሎ፡ ዘመጠነ፡ ተናገረኒ።

²⁸ ወኢይመብሉ፡ ላዕሌከ፡ ወላዕለ፡ ዘርእከ፡ መናፍስተ፡ መስቴማ፡ ከመ፡ ያርኅቁከ፡ እምድኅረ፡ እግዚአብሔር፡ ዘውእቱ፡ አምላክከ፡ እምይእዜ፡ ወእስከ፡ ለዓለም።

²⁹ ወይኩንከ፡ እግዚአብሔር፡ አምላክ፡ አበ፡ ወአንተሂ፡ ወልደ፡ በኵረ፡ ወለሕዝብ፡ ኵሎ፡ መዋዕለ።

³⁰ ወወፅኡ፡ ክልኤሆሙ፡ ኅቡረ፡ እምኀበ፡ አብርሃም።

³¹ ወአፍቀረቶ፡ ርብቃ፡ ለያዕቆብ፡ በኵሉ፡ ልባ፡ ወበኵሉ፡ መንፈሳ፡ ብዙኀ፡ ፈድፋደ፡ እምነ፡ ዔሳው፡ ወይስሐቅ፡ ያፈቅሮ፡ ለዔሳው፡ ፈድፋደ፡ እምያዕቆብ።