Jubilees 18

The Ethiopic Bible (Ge'ez)

¹ ወይቤሎ፡ እግዚአብሔር፡ አብርሃም፡ አብርሃም፡ ወይቤ፡ ነየ፡ አነ።

² ወይቤሎ፡ ንሥእ፡ ወልደከ፡ ፍቁረከ፡ ዘታፈቅር፡ ይስሐቅሃ፡ ወሖር፡ ውስተ፡ ምደር፡ ልዕልት፡ ወአዕርጎ፡ ውስተ፡ አሐዱ፡ እምአድባር፡ ዘአነ፡ አየድዐከ።

³ ወአሌለየ፡ በነገህ፡ ወጸዐነ፡ አድግቶ፡ ወክልኤተ፡ ደቆ፡ ነሥአ፡ ምስሌሁ፡ ወይስሐቅሃ፡ ወልዶ፡ ወዕፀወ፡ መሥዋዕት፡ ሠፀረ፡ ወሖረ፡ ወስተ፡ መካን፡ በሠሉስ፡ ዕለት።

⁴ ወበጽሐ፡ እስከ፡ ዐዘቅተ፡ ማይ፡ ወይቤ፡ ለደቁ፡ ንበሩ፡ ዝየ፡ ምስለ፡ አድግት፡ ወአነ፡ ወሕፃን፡ ነሐውር፡ ወሰጊደነ፡ ንገብእ፡ ኀቤክሙ።

⁵ ወነሥአ፡ ዕፀ፡ መሥዋዕት፡ ወአስከሞ፡ ለይስሐቅ፡ ወልዱ፡ ወነሥአ፡ በእዴሁ፡ እሳተ፡ ወመጥባሕተ።

⁶ ወይቤ፡ ይስሐቅ፡ ለአቡሁ፡ አባ።

⁷ ወይቤ፡ እግዚአብሔር፡ ያሬኢ፡ ሎቱ፡ በግዐ፡ ለጽንሓሕ፡ ወልድየ።

⁸ ወሐነጸ፡ ምሥዋዐ፡ ወአንበረ፡ ዕፀወ፡ ዲበ፡ መሥዋዕት፡ ወአሰረ፡ ይስሐቅሃ፡ ወልዶ፡ ወአንበሮ፡ ዲበ፡ ዕፀው፡ ዘመልዕልተ፡ ምሥዋዕ፡ ወሰፍሐ፡ እዴሁ፡ ይንሥእ፡ መጥባሕተ፡ ከመ፡ ይዝብሖ፡ ለይስሐቅ፡ ወልዱ።

⁹ ወአነ፡ ቆምኩ፡ ቅድሜሁ፡ ወቅድመ፡ መኰንነ፡ መስቴማ፡ ወይቤ፡ እግዚአብሔር፡ በሎ፡ ኢያውርድ፡ እዴሁ፡ ላዕለ፡ ሕፃን፡ ወኢይግበር፡ ምንተኒ፡ ላዕሌሁ፡ እስመ፡ አእመርኩ፡ ከመ፡ ፈራሄ፡ እግዚአብሔር፡ ውእቱ።

¹⁰ ጸዋዕክዎ፡ እምሰማይ፡ ወእቤሎ፡ አብርሃም፡ ወደንገፀ፡ ወይቤ፡ ነየ፡ አነ።

¹¹ ወእቤሎ፡ ኢትፈኑ፡ እዴከ፡ ዲበ፡ ሕፃን፡ ወኢትግበረ፡ ምንተኒ፡ ዲቤሁ፡ እስመ፡ ይእዜ፡ አእመርኩ፡ ከመ፡ ፈራሄ፡ እግዚአብሔር፡ አንተ፡ ወኢመሐከ፡ ወልደከ፡ በኵረከ፡ እምኔየ።

¹² ወተኀፍረ፡ መኰንነ፡ መስቴማ፡ ወአንሥአ፡ አብርሃም፡ አዕይንቲሁ፡ ወርእየ፡ ወናሁ፡ አሐዱ፡ በሐኵ፡ እኁዝ፡ ወይመጽእ፡ በአቅርንቲሁ፡ ወሖረ፡ አብርሃም፡ ወነሥኦ፡ ለበሐኵ፡ ወአዕረጎ፡ ለጽንሓሕ፡ ህየንተ፡ ወልዱ።

¹³ ወጸውዖ፡ አብርሃም፡ ለውእቱ፡ መካን፡ እግዚአብሔር፡ ርእየ፡ ከመ፡ ይትበሀል፡ እግዚአብሔር፡ ርእየ፡ ውእቱ፡ ደብሩ፡ ለጽዮን።

¹⁴ ወጸውዖ፡ እግዚአብሔር፡ ለአብርሃም፡ በስሙ፡ ዳግመ፡ እምሰማይ፡ በከመ፡ አስተርአይነ፡ ከመ፡ ንትናገሮ፡ በስመ፡ እግዚአብሔር።

¹⁵ ወይቤ፡ በርእስየ፡ መሐልኩ፡ ይቤ፡ እግዚአብሔር፡ እስመ፡ ገበርከ፡ ዘንተ፡ ቃለ፡ ወኢመሐከ፡ ወልደከ፡ በኵረከ፡ እምኔየ፡ ዘአፍቀርከ።

¹⁶ ወይትባረኩ፡ በዘርእከ፡ ኵሎሙ፡ አሕዛበ፡ ምድር፡ ህየንተ፡ ዘሰማዕከ፡ ቃለ፡ ዚአየ።

¹⁷ ወሖረ፡ አብርሃም፡ ኀበ፡ ደቁ፡ ወተንሥኡ፡ ወሖሩ፡ ቤርሳቤ፡ ኅቡረ።

¹⁸ ወይገብር፡ ዛተ፡ በዓለ፡ በኵሉ፡ ዓመታት፡ ሰቡዐ፡ ዕለተ፡ በፍሥሓ፡ ወሰመያ፡ በዓለ፡ እግዚአብሔር፡ በከመ፡ ሰቡዕ፡ ዕለት፡ እለ፡ ሖረ፡ ወተመይጠ፡ በሰላም።

¹⁹ ወከመዝ፡ ሥሩዕ፡ ውእቱ፡ ወጽሑፍ፡ ውስተ፡ ጽላተ፡ ሰማይ፡ በእንተ፡ እስራኤል፡ ወዲበ፡ ዘርኡ፡ ለገቢረ፡ ዛቲ፡ በዓል፡ ሰቡዐ፡ ዕለተ፡ በፍሥሓ፡ በዓል።