Jubilees 21

The Ethiopic Bible (Ge'ez)

¹ ወበሳድስ፡ ዓመት፡ ዘሳብዕ፡ ሱባዔ፡ ዘዝንቱ፡ ኢዮቤልዉ፡ ጸውዐ፡ አብርሃም፡ ይስሐቅሃ፡ ወልዶ፡ ወአዘዞ፡ እንዘ፡ ይብል፡ አነ፡ ረሳእኩ፡ ወኢያአምር፡ ዕለተ፡ ሞትየ፡ እስመ፡ ጸገብኩ፡ መዋዕልየ።

² ወናሁ፡ አነ፡ ወልደ፡ ምእት፡ ወሰብዓ፡ ወኀምስቱ፡ ዓመት፡ ወበኵሉ፡ መዋዕለ፡ ሕይወትየ፡ ሀሎኩ፡ እንዘ፡ እዜከሮ፡ ለእግዚአብሔር፡ ወእንዘ፡ አኀሥሥ፡ በኵሉ፡ ልብየ፡ ከመ፡ እግበር፡ ፈቃዳቲሁ፡ ወከመ፡ አርትዕ፡ ሐዊረ፡ በኵሉ፡ ፍናዊሁ።

³ ጣዖተ፡ ጸልአት፡ ነፍስየ፡ ከመ፡ እትዓቀብ፡ ለገቢረ፡ ፈቃዱ፡ ለዘ፡ ፈጠረኒ።

⁴ እስመ፡ አምላክ፡ ሕያው፡ ውእቱ፡ ወቅዱስ፡ ውእቱ፡ ወምእመን፡ ወጻድቅ፡ ውእቱ፡ እምኵሉ፡ ወአልቦ፡ በኀቤሁ፡ ነሢአ፡ ገጽ፡ ወነሢአ፡ ሕልያን፡ እስመ፡ አምላክ፡ ጻድቅ፡ ውስቱ፡ ወገባሬ፡ ኵነኔ፡ ውእቱ፡ እምኵሎሙ፡ እለ፡ ይትዐደዉ፡ ትእዛዞ፡ ወለእለ፡ ይሜንኑ፡ ኪዳኖ።

⁵ ወአንተኒ፡ ወልድየ፡ ዕቀብ፡ ትእዛዞ፡ ወሥርዓቶ፡ ወኵነኔሁ፡ ወኢትሖር፡ ድኅሬሆሙ፡ ለርኩሳን፡ ወድኅሬሆሙ፡ ለግልፎ፡ ወድኅሬሆሙ፡ ለስብኮ።

⁶ ወኢትብላዕ፡ ምንተኒ፡ ደመ፡ ዘአርዌ፡ ወእንስሳ፡ ወዘኵሉ፡ ዖፍ፡ ዘይሰርር፡ ውስተ፡ ሰማይ።

⁷ ወለእመ፡ ኀረድከ፡ ኅርድ፡ ለጽንሐሐ፡ ሰላም፡ ዘይሰጠው፡ ኅርድዎ፡ ወደሞሙ፡ ትክዕዉ፡ ውስተ፡ ምሥዋዕ፡ ወኵሎ፡ ስብሐ፡ ጽንሐሕ፡ ታዐርግ፡ ውስተ፡ ምሥዋዕ፡ ምስለ፡ ስንዳሌ፡ ወመሥዋዕተ፡ ልዉስ፡ በቅብእ፡ ምስለ፡ ሞጻሕቱ፡ ታዐርጎ፡ ኵሎ፡ ኅቡረ፡ ዲበ፡ ምሥዋዕ፡ ጽንሐሐ፡ መዓዛ፡ ሠናይ፡ ቅድመ፡ እግዚአብሔር።

⁸ በከመ፡ ስብሐ፡ መሥዋዕተ፡ መድኃኒት፡ ታነብር፡ ዲበ፡ እሳት፡ ዘዲበ፡ መሥዋዕት፡ በከመ፡ ስብሕ፡ ዘዲበ፡ ከርሥ፡ ወኵሎ፡ ስብሐ፡ ዘዲበ፡ ንዋየ፡ ውስጥ፡ ወክልኤ፡ ኵልያተ፡ ወኵሎ፡ ስብሐ፡ ዘዲቤሆሙ፡ ወዘዲበ፡ መናቅዕ፡ ወከብድ፡ ምስለ፡ ኵልያት፡ ጥብሉለ።

⁹ ወታዐርግ፡ ዘንተ፡ ኵሎ፡ ለመዓዛ፡ ሠናይ፡ ዘይሰጠው፡ ቅድመ፡ እግዚአብሔር፡ ምስለ፡ መሥዋዕቱ፡ ወምስለ፡ ሞጻሕቱ፡ ከመዓዛ፡ ሠናይ፡ ኅብስተ፡ ጽንሐሕ፡ ለእግዚአብሔር።

¹⁰ ወሥጋሁ፡ ብላዕ፡ በይእቲ፡ ዕለት፡ ወበሳኒታ፡ ወኢይዕረብ፡ ላዕሌሁ፡ ፀሐይ፡ ዘአመ፡ ሳኒታ፡ እስከ፡ ሶበ፡ ይትበላዕ፡ ወኢይትርፍ፡ ለዕለት፡ ሣልስት፡ እስመ፡ ኢይሠጠዎ፡ እስመ፡ ኢኮነ፡ ኅሩየ፡ ወኢይትበሀል፡ እንከ።

¹¹ ውስተ፡ ኵሉ፡ ምሥዋዓቲከ፡ ትደይ፡ ፄወ፡ ወኢይጸራዕ፡ ኪዳነ፡ ፄው፡ ውስተ፡ ኵሉ፡ ምስዋዓቲከ፡ ቅድመ፡ እግዚአብሔር።

¹² ወተዐቀብ፡ በዕፀወ፡ መሥዋዕት፡ ከመ፡ ኢታብእ፡ ዕፀወ፡ ዲበ፡ ምሥዋዕ፡ ዘንተ፡ ክመ፡ ቄጳርሶን፡ ወዴፍራን፡ ወሶጋድ፡ ወሰጠሮቢሎን፡ ወጲጢን፡ ወቄድሮን፡ ወቡራቲ፡ ወታናክ፡ ወዕፀ፡ ዘይት፡ ምርስኔ፡ ወድፍን፡ ወቄዳር፡ ዘስሙ፡ አርባት፡ ወቤስም።

¹³ ወእምእሉ፡ ዕፀው፡ አንብር፡ መትሕተ፡ ጽንሐሕ፡ ዲበ፡ ምሥዋዕ፡ ምኩረ፡ ርእዮሙ፡ ወኢታንብር፡ ኵሎ፡ ዕፀ፡ ንቁዐ፡ ወሬዋ፡ ዕፀወ፡ ጽኑዓነ፡ ወጽኑዐ፡ ዘአልቦ፡ ምንተኒ፡ ነውረ፡ ፍጹመ፡ ወሐደስተ፡ ተክለ፡ ወኢታንብር፡ ዕፀ፡ ብሉየ፡ እስመ፡ ወፅአ፡ መዓዛሁ፡ እስመ፡ እንከ፡ አልቦ፡ መዓዛ፡ ላዕሌሁ፡ ከመ፡ ቀዳማዊ።

¹⁴ ዘእንበለ፡ እሉ፡ ዕፀው፡ አልቦ፡ ዘታነብር፡ ባዕደ።

¹⁵ ዑቅ፡ ዛትእዛዘ፡ ወግበራ፡ ወልድየ፡ ከመ፡ ታርትዕ፡ በኵሉ፡ ግብርከ።

¹⁶ ወበኵሉ፡ ጊዜ፡ ኩን፡ ንጹሐ፡ በሥጋከ፡ ወኅዕብ፡ በማይ፡ ዘእንበለ፡ ትሖር፡ ለአዕርጎ፡ ውስተ፡ ምሥዋዕ፡ ወኅፅብ፡ እዴከ፡ ወእግረከ፡ ዘእንበለ፡ ትቅረብ፡ ውስተ፡ መሥዋዕት፡ ሶበ፡ ፈጸምከ፡ አዕርጎ፡ ግባእ፡ ወተኀፀብ፡ እደዊከ፡ ወእገሪከ።

¹⁷ ወኢያስተርኢ፡ በዲቤክሙ፡ ኵሉ፡ ደም፡ ወውስተ፡ አልባሲክሙ፡ ተዐቀብ፡ ወልድየ፡ በደም፡ ተዐቀብ፡ ጥቀ፡ ድፍኖ፡ ምድረ።

¹⁸ ወኢትብልዑ፡ እንከ፡ ደመ፡ እስመ፡ ደም፡ ነፍስ፡ ይእቲ፡ ወኢትብላዕ፡ ምንተኒ፡ ደመ።

¹⁹ ወኢትንሣእ፡ ሕልያነ፡ ዲበ፡ ኵሉ፡ ደመ፡ ሰብእ፡ ከመ፡ ኢይትከዐው፡ በከ፡ ዘእንበለ፡ ኵነኔ፡ እስመ፡ ደም፡ ውእቱ፡ ዘይትከዐው፡ ያኀጥኣ፡ ለምድር፡ ወደም፡ ኢትክል፡ ነጺሐ፡ እምደመ፡ ሰብእ፡ ዘእንበለ፡ በደመ፡ ዘከዐዎ።

²⁰ ወኢትንሣእ፡ ሕልያነ፡ ወአምኃ፡ በደመ፡ ሰብእ፡ ደመ፡ በደም፡ ወይሠጠው፡ ቅድመ፡ አምላክ፡ ልዑል።

²¹ እሬኢ፡ አነ፡ ወልድየ፡ ኵሎ፡ ግብረ፡ እጓለ፡ እመሕያው፡ ከመ፡ ኃጢአት፡ ወእከይ፡ ወኵሉ፡ ግብሮሙ፡ ርኵስ፡ ወምናኔ፡ ወግማኔ።

²² ተዐቀብ፡ ኢትሖር፡ ውስተ፡ ፍኖቶሙ፡ ወለከይደ፡ አሰሮሙ፡ ወኢትስሐት፡ ስሕተተ፡ ለሞት፡ ቅድመ፡ አምላክ፡ ልዑል።

²³ ረገሐሥ፡ እምኵሉ፡ ምግባሪሆሙ፡ ወእምኵሉ፡ ርኵሶሙ፡ ወተዐቀብ፡ ዑቃቤ፡ ዘአምላክ፡ ልዑል፡ ወግበር፡ ፈቃዳቲሁ፡ ወታረትዕ፡ በኵሉ።

²⁴ ወይባርከከ፡ በኵሉ፡ ምግባሪከ፡ ወያነሥእ፡ እምኔከ፡ ተክለ፡ ጽድቅ፡ በኵሉ፡ ምድር፡ በኵሉ፡ ትውልደ፡ ምድር፡ ወኢይትረመም፡ ስምየ፡ ወስምከ፡ በመትሕተ፡ ሰማይ፡ በኵሉ፡ መዋዕል።

²⁵ ሖር፡ ወልድየ፡ በሰላም፡ ያጽንዕከ፡ አምላክ፡ ልዑል፡ አምላኪየ፡ ወአምላክከ፡ ለገቢረ፡ ፈቃዳቲሁ፡ ወይባርክ፡ ኵሎ፡ ዘርእከ፡ ተርፈ፡ ዘርእከ፡ ለትውልድ፡ ዘለዓለም፡ በኵሉ፡ በረከተ፡ ጽድቅ፡ ከመ፡ ትኩን፡ በረከተ፡ በኵሉ፡ ምድር።

²⁶ ወወፅአ፡ እምኀቤሁ፡ እንዘ፡ ይትፌሣሕ።