Jubilees 22

The Ethiopic Bible (Ge'ez)

¹ ወኮነ፡ በሱባዔ፡ ቀዳሚ፡ በዘ፡ አርብዓ፡ ወአርባዕ፡ ኢዮቤልዉ፡ በካልእ፡ ዓመት፡ በዘ፡ ሞተ፡ አብርሃም፡ መጽኡ፡ ይስሐቅ፡ ወይስማዔል፡ እምዐዘቅተ፡ መሐላ፡ ከመ፡ ይግበሩ፡ በዓለ፡ ሱባዔያት፡ ዛቲ፡ በዓል፡ ዘቀዳሚ፡ ማእረር፡ ኀበ፡ አብርሃም፡ አቡሆሙ፡ ወተፈሥሐ፡ አብርሃም፡ እስመ፡ ክልኤሆሙ፡ ደቂቁ፡ መጽኡ።

² እስመ፡ ብዙኅ፡ ጥሪቱ፡ ለይስሐቅ፡ በቤርሳቤ፡ ወየሐውር፡ ይስሐቅ፡ ወይዋሒ፡ ጥሪቶ፡ ወይገብእ፡ ኀበ፡ አቡሁ።

³ ወበዝ፡ መዋዕል፡ መጽአ፡ ይስማዔል፡ ይርአይ፡ አባሁ፡ ወመጽኡ፡ ኵሎሙ፡ ኅቡረ፡ ወጠብሐ፡ ይስሐቅ፡ መሥዋዕተ፡ ለጽንሐሕ፡ ወአዕረገ፡ ዲበ፡ ምሥዋዐ፡ አቡሁ፡ ዘገብረ፡ በኬብሮን።

⁴ ወሦዐ፡ መድኃኒተ፡ ወገብረ፡ ግዝአ፡ ግሥሓ፡ በቅድመ፡ ይስማዔል፡ እኁሁ።

⁵ ወይስሐቅኒ፡ ውእቱ፡ ፈነወ፡ በእደ፡ ያዕቆብ፡ ዘይሤኒ፡ መሥዋዕተ፡ ዘመድኃኒት፡ አብርሃም፡ ይብላዕ፡ ወይስተይ።

⁶ ወበልዐ፡ ወሰትየ፡ ወባረኮ፡ ለአምላክ፡ ልዑል፡ ዘፈጠረ፡ ሰማየ፡ ወምድረ፡ ዘገብረ፡ ኵሎ፡ ስብሐ፡ ምድር፡ ወወሀቦሙ፡ ለውሉደ፡ ሰብእ፡ ይብልዑ፡ ወይስተዩ፡ ወይባርኩ፡ ፈጣሪሆሙ።

⁷ ወይእዜኒ፡ እትጋነይ፡ ለከ፡ አምላኪየ፡ እስመ፡ አርአይከኒ፡ ዛተ፡ ዕለተ፡ ናሁ፡ አነ፡ ወልደ፡ ምእት፡ ወሰብዓ፡ ወኃምስ፡ ክረምት፡ ልሂቅ፡ ወፍጹመ፡ መዋዕል፡ ወኵሎን፡ መዋዕልየ፡ ኮናኒ፡ ሰላመ።

⁸ ሰይፈ፡ ጸላኢ፡ ኢሞአኒ።

⁹ ትኩን፡ ሣልስከ፡ ወሰላምከ፡ ላዕለ፡ ገብርከ፡ ወላዕለ፡ ዘርአ፡ ውሉዱ፡ ከመ፡ ይኩንከ፡ ሕዝበ፡ ኅሩየ፡ ወርስተ፡ እምኵሉ፡ አሕዛበ፡ ምድር፡ እምይእዜ፡ ወእስከ፡ ኵሉ፡ መዋዕል፡ ዘትውልደ፡ ምድር፡ ለኵሉ፡ ዓለማት።

¹⁰ ወጸውዖ፡ ለያዕቆብ፡ ወይቤሎ፡ ወልድየ፡ ያዕቆብ፡ ይባርክ፡ አምላከ፡ ኵሉ፡ ወያኀይልከ፡ ለገቢረ፡ ጽድቅ፡ ወፈቃዱ፡ በቅድመ፡ ዚአሁ፡ ወይኅረይ፡ ብከ፡ ወበዘርእከ፡ ከመ፡ ትኩንዎ፡ ሕዝበ፡ ለርስቱ፡ በከመ፡ ፈቃዱ፡ በኵሉ፡ መዋዕል።

¹¹ ወቀርበ፡ ወሰዐሞ።

¹² ኩን፡ ኀያለ፡ በቅድመ፡ ሰብእ፡ ወእንዘ፡ ትሜብል፡ ውስተ፡ ኵሉ፡ ዘርአ፡ ሴት፡ አሜሃ፡ ይጸድቃ፡ ፍናዊከ፡ ወፍናወ፡ ውሉድከ፡ ለከዊነ፡ ሕዝብ፡ ቅዱስ።

¹³ የሀብከ፡ አምላክ፡ ልዑል፡ ኵሎን፡ በረከታተ፡ እለ፡ ባረከኒ፡ ወእለ፡ ባረኮ፡ ለኖኅ፡ ወአዳምሃ፡ ያዕርፍ፡ ዲበ፡ ድማኀ፡ ቅዳሴ፡ ዘርእከ፡ ለኵሉ፡ ትውልደ፡ ትውልድ፡ ወእስከ፡ ለዓለም።

¹⁴ ወያንጽሕከ፡ እምኵሉ፡ ርስሐተ፡ ርኵስ፡ ከመ፡ ታስተስሪ፡ እምኵሉ፡ አበሳ፡ ዘበ፡ ኢያእምሮ፡ ጌጋይከ።

¹⁵ ወየሐድስ፡ ኪዳኖ፡ መስሌከ፡ ከመ፡ ትኩኖ፡ ሕዝበ፡ ለርስቱ፡ በኵሉ፡ ዓለማት።

¹⁶ ወአንተኒ፡ ወልድየ፡ ያዕቆብ፡ ተዘከር፡ ቃልየ፡ ወዕቀብ፡ ትእዛዛተ፡ አብርሃም፡ አቡከ።

¹⁷ መሥዋዕቶሙ፡ ለአብድንት፡ ይዘብሑ፡ ወለአጋንንት፡ ይሰግዱ።

¹⁸ ወአልቦሙ፡ ልበ፡ ለኀልዮ፡ ወኢኮነ፡ አዕይንቲሆሙ፡ ዘይሬኢ።

¹⁹ ወአንተኒ፡ ወልድየ፡ ያዕቆብ፡ አምላክ፡ ልዑል፡ ይርዳእከ፡ ወአምላከ፡ ሰማይ፡ ይባርከ፡ ወያግኅሥከ፡ እምነ፡ ርኵሶሙ፡ ወእምኵሉ፡ ስሕተቶሙ።

²⁰ ተዐቀብ፡ ወልድየ፡ ያዕቆብ፡ ከመ፡ ኢትንሣእ፡ ብእሲተ፡ እምነ፡ ኵሉ፡ ዘርአ፡ አዋልደ፡ ከናአን።

²¹ እስመ፡ በአበሳ፡ ካም፡ ስሕተ፡ ከናአን፡ ወኵሉ፡ ዘርኡ፡ ይደምሰስ፡ እምድር፡ ወኵሉ፡ ተርፉ፡ ወዘይድኅን፡ አልቦ፡ እምኔሁ፡ አመ፡ ዕለተ፡ ደይን።

²² ወለኵሎሙ፡ እለ፡ ያመልኩ፡ ጣዖተ፡ ወለጽሉኣን፡ አልቦሙ፡ ምንተኒ፡ ተስፋ፡ በምድረ፡ ሕያዋን፡ እስመ፡ ውስተ፡ ሲኦል፡ ይወርዱ፡ ወውስተ፡ መካነ፡ ደይን፡ የሐውሩ።

²³ ኢትፍራህ፡ ወልድየ፡ ያዕቆብ፡ ወኢትደንግፅ፡ ወልደ፡ አብርሃም፡ አምላክ፡ ልዑል፡ ይዕቀብከ፡ እምነ፡ ሙስና፡ ወእምኵሉ፡ ፍኖተ፡ ስሕተት፡ ውእቱ፡ ይባልሕከ።

²⁴ ዘንተ፡ ቤተ፡ ሐነጽኩ፡ ሊተ፡ ከመ፡ አንብር፡ ስምየ፡ ላዕሌሁ፡ በዲበ፡ ምድር፡ ተውህበት፡ ለከ፡ ወለዘርእከ፡ ለዓለም፡ ወትሰመይ፡ ቤተ፡ አብርሃም፡ ተውህበት፡ ለከ፡ ወለዘርእከ፡ ለዓለም፡ እስመ፡ አንተ፡ ተሐንጽ፡ ቤትየ፡ ወታቀውም፡ ስምየ፡ ቅድመ፡ አምላክ፡ እስከ፡ ለዓለም፡ ዘርእከ፡ ወስምከ፡ ይቀውም፡ ውስተ፡ ኵሉ፡ ትውልደ፡ ምድር።

²⁵ ወአኅለቀ፡ እንዘ፡ ይኤዝዞ፡ ወይባርኮ።

²⁶ ወሰከቡ፡ ክልኤሆሙ፡ ኅቡረ፡ ውስተ፡ ዐራት፡ አሐቲ፡ ወኖመ፡ ያዕቆብ፡ ውስተ፡ ሕፅነ፡ አብርሃም፡ አበ፡ አቡሁ፡ ወሰዐሞ፡ ስብዐ፡ ወተፈሥሐ፡ ምሕረቱ፡ ወልቡ፡ ላዕሌሁ።

²⁷ ወባረኮ፡ በኵሉ፡ ልቡ፡ ወይቤ፡ አምላክ፡ ልዑል፡ አምላከ፡ ኵሉ፡ ወፈጣሬ፡ ኵሉ፡ ዘአውፅአኒ፡ እምነ፡ ኡር፡ ዘከለዳዊያን፡ ከመ፡ የሀበኒ፡ ዛተ፡ ምድረ፡ እረሳ፡ ለዓለም፡ ወከመ፡ አቅም፡ ዘርአ፡ ቅዱሰ፡ ከመ፡ ይትባረክ፡ ለዓለም።

²⁸ ወባረኮ፡ ለያዕቆብ፡ ወልድየ፡ ዘበኵሉ፡ ልብየ፡ ወዘበምሕረትየ፡ በእለ፡ እትፌሣሕ፡ ቦቱ፡ ወይኩን፡ ሣህልከ፡ ወምሕረትከ፡ ነዋኀ፡ ላዕሌሁ፡ ወላዕለ፡ ዘርኡ፡ ኵሎ፡ መዋዕለ።

²⁹ ወኢትኅድጎ፡ ወኢትትሀየዮ፡ እምይእዜ፡ ወእስከ፡ መዋዕል፡ ዘለዓለም።

³⁰ ወባርኮ፡ በኵሉ፡ በረከታቲከ፡ እምይእዜ፡ ወእስከ፡ ኵሎን፡ መዋዕል፡ ዘለዓለም።