Jubilees 29

The Ethiopic Bible (Ge'ez)

¹ ወኮነ፡ እምዘ፡ ወለደት፡ ራሔል፡ ዮሴፍሃ፡ ወሖረ፡ ላባ፡ ይቅርጽ፡ አባግዒሁ፡ እስመ፡ ርሑቅ፡ ሀለዋ፡ እምኀቤሁ፡ ምሕዋረ፡ ሠሉስ፡ ዕለት።

² ወርእየ፡ ያዕቆብ፡ ከመ፡ የሐውር፡ ላባ፡ ይቅርጽ፡ አባግዒሁ።

³ እስመ፡ ነገሮን፡ ዘከመ፡ ርእየ፡ ኵሎ፡ በሕልም፡ ወኵሎ፡ ዘተናገረ፡ ሎቱ፡ ከመ፡ ይግባእ፡ ቤተ፡ አቡሁ።

⁴ ወባረከ፡ ያዕቆብ፡ አምላከ፡ አቡሁ፡ ይስሐቅ፡ ወአምላከ፡ አብርሃም፡ አቡሁ፡ ለአቡሁ።

⁵ ወበሳብዕ፡ ዓም፡ ዘሱባዔ፡ ራብዕ፡ ተመይጠ፡ ያዕቆብ፡ ገለአድ፡ በቀዳሚ፡ ወርኅ፡ አመ፡ ዕሥራሁ፡ ወአሚሩ፡ ወዴገኖ፡ ላባ፡ ድኅሬሁ፡ ወረከቦ፡ ለያዕቆብ፡ በደብረ፡ ገለአድ፡ በወርኅ፡ ሣልስ፡ አመ፡ ዐሡሩ፡ ወሠሉሱ።

⁶ ወኢኀደጎ፡ እግዚአብሔር፡ ከመ፡ ያሕሥም፡ ላዕለ፡ ያዕቆብ፡ እስመ፡ አስተርአዮ፡ በሕልም፡ ሌሊተ፡ ወነገሮ፡ ላባ፡ ለያዕቆብ።

⁷ ወአመ፡ ዐሡሩ፡ ወሐሙሱ፡ ለውእቱ፡ መዋዕል፡ ገብረ፡ ያዕቆብ፡ ግዝአ፡ ለላባ፡ ወለኵሎሙ፡ እለ፡ መጽኡ፡ ምስሌሁ፡ ወመሐለ፡ ያዕቆብ፡ ለላባ፡ በዛቲ፡ ዕለት፡ ወላባሂ፡ ለያዕቆብ፡ ከመ፡ ኢይትዐደው፡ አሐዱ፡ ካልኦ፡ በእከይ፡ በደብረ፡ ገለአድ።

⁸ ወገብረ፡ ህየ፡ ፍሥሐተ፡ ለስምዕ፡ በእንተዝ፡ ተጸውዐ፡ ስሙ፡ ለውእቱ፡ መካን፡ ፍሥሐተ፡ ስምዕ፡ ከመዝ፡ ፍሥሐት።

⁹ ወቀዲሙሰ፡ ይጼውዕዎ፡ ለምድረ፡ ገለአድ፡ ምድረ፡ ራፋኤል፡ እስመ፡ ምድረ፡ ራፋኤም፡ ይእቲ።

¹⁰ ወመኃድሪሆሙ፡ እምነ፡ ምድረ፡ ውሉደ፡ አሞን፡ እስከ፡ ደብረ፡ ኤርሞን፡ ወቤተ፡ መንግሥቶሙ፡ ቀራናኤም፡ ወአስጠሮስ፡ ወአድራኦ፡ ወሚሱር፡ ወቤዎን።

¹¹ ወአሕጐሎሙ፡ እግዚአብሔር፡ እምእከየ፡ ምግባሮሙ፡ እስመ፡ ፀዋጋን፡ ጥቀ፡ እሙንቱ።

¹² ወፈነወ፡ ያዕቆብ፡ ላባሃ፡ ወሖረ፡ ውስተ፡ መስጴጦምያ፡ ምድረ፡ ጽባሕ።

¹³ ወተዐደወ፡ ኢያቦክሃ፡ በታስዕ፡ ወርኅ፡ አመ፡ ዐሡሩ፡ ወአሚሩ።

¹⁴ ወበዓመት፡ ቀዳሚ፡ ዘኃምስ፡ ሱባዔ፡ በዝኢዮቤልውስ፡ ዐደወ፡ ዮርዳኖስ፡ ወኀደረ፡ ማዕዶተ፡ ዮርዳኖስ፡ ወይሬዒ፡ አባግዒሁ፡ እምባሕረ፡ ፈሐሐት፡ እስከ፡ ቤተ፡ ሳን፡ ወእስከ፡ ዶታኢም፡ ወእስከ፡ አመ፡ አቅራቢት።

¹⁵ ወይፌኑ፡ ለአቡሁ፡ ለይስሐቅ፡ እምኵሉ፡ ጥሪቱ፡ ልብሰ፡ ወሲሲተ፡ ወሥጋ፡ ወስቴ፡ ወሐሊበ፡ ወቅብአ፡ ወኀብስተ፡ ሐሊብ፡ ወእምነ፡ ተመርተ፡ ቈላ።

¹⁶ ወለእሙሂ፡ ለርብቃ፡ ርብዕ፡ ለዓመት፡ ማእከለ፡ ጊዜያቲሆሙ፡ ለአውራኅ፡ ወማእከለ፡ ሐሪስ፡ ወለዐፂድ፡ ወማእከለ፡ ጸዳይ፡ ወዝናም፡ ወማእከለ፡ ክረምት፡ ወሐጋይ፡ ውስተ፡ ማኅፈዱ፡ ለአብርሃም።

¹⁷ እስመ፡ ተመይጠ፡ ይስሐቅ፡ እምዐዘቅተ፡ መሐላ፡ ወዐርገ፡ ውስተ፡ ማኅፈደ፡ አቡሁ፡ አብርሃም፡ ወኀደረ፡ ህየ፡ እምዔሳው፡ ወልዱ።

¹⁸ እስመ፡ በመዋዕለ፡ ሖረ፡ ያዕቆብ፡ መስጴጦምያ፡ ነሥአ፡ ለርእሱ፡ ዔሳው፡ ብእሲተ፡ መኤሌትሃ፡ ወለተ፡ ይስማዔል፡ ወአስተጋብአ፡ ኵሎ፡ መርዔተ፡ አቡሁ፡ ወአንስቲያሁ፡ ወዐርገ፡ ወኀደረ፡ ውስተ፡ ደብረ፡ ሲር።

¹⁹ ወዐርገ፡ ይስሐቅ፡ እምዐዘቅተ፡ መሐላ፡ ወኀደረ፡ ማኅፈደ፡ አብርሃም፡ አቡሁ፡ ውስተ፡ ደብረ፡ ኬብሮን።

²⁰ ወእምህየ፡ ይፌኑ፡ ያዕቆብ፡ ኵሎ፡ ዘይፌኑ፡ ለአቡሁ፡ ወለእሙ፡ እምጊዜ፡ በበ፡ ጊዜ፡ ኵሎ፡ ትካዞሙ።