Jubilees 28

The Ethiopic Bible (Ge'ez)

¹ ወአንሥአ፡ እገሪሁ፡ ወሖረ፡ ምድረ፡ ጽባሕ፡ ኀበ፡ ላባ፡ እኅወ፡ ርብቃ፡ ወሀሎ፡ ምስሌሁ፡ ወተቀንየ፡ ሎቱ፡ ህየንተ፡ ራሔል፡ ወለቱ፡ ሱባዔ፡ አሐደ።

² ወበዓመት፡ ቀዳሚ፡ በሣልስ፡ ሱባዔ፡ ይቤሎ፡ ሀበኒ፡ ብእሲትየ፡ ዘበእንቲአሃ፡ ተቀነይኩ፡ ለከ፡ ሰብዐተ፡ ዓመተ፡ ወይቤሎ፡ ላባ፡ ለያዕቆብ፡ አነ፡ እሁበከ፡ ብእሲተከ።

³ ወገብረ፡ ላባ፡ ግዝአ፡ ወነሥአ፡ ልያሃ፡ ወለቶ፡ እንተ፡ ትልህቅ፡ ወወሀቦ፡ ለያዕቆብ፡ ብእሲተ፡ ወወሀባ፡ ዘለፋሃ፡ አመቶ፡ ለአኪተ፡ ወያዕቆብሰ፡ ኢያእመረ፡ እስመ፡ አምሰላ፡ ያዕቆብ፡ ዘራሔል፡ ይእቲ።

⁴ ወቦአ፡ ኀቤሃ፡ ወናሁ፡ ይእቲሰ፡ ልያ።

⁵ እስመ፡ ያፈቅር፡ ያዕቆብ፡ ራሔልሃ፡ እምነ፡ ልያ፡ እስመ፡ አዕይንቲሃ፡ ለልያ፡ ድኩም፡ ወባሕቱ፡ ላሕይ፡ ራእያ፡ ጥቀ፡ ወራሔል፡ ሠናይ፡ አዕይንቲሃ፡ ወሠናይ፡ ራእያ፡ ወላሕይት፡ ጥቀ።

⁶ ወይቤሎ፡ ላባ፡ ለያዕቆብ፡ ኢኮነ፡ ከመዝ፡ በምድርነ፡ ውሂበ፡ እንተ፡ ትንእስ፡ እምእንተ፡ ትልህቅ።

⁷ ወአንተኒ፡ አዝዝ፡ ለደቂቀ፡ እስራኤል።

⁸ ወይቤ፡ ላባ፡ ለያዕቆብ፡ ይኅልፍ፡ ሰቡዐ፡ መዋዕለ፡ ግዝእ፡ ለዛ፡ ወእሁበከ፡ ራሔልሃ፡ ከመ፡ ትትቀነይ፡ ሊተ፡ ካልኣነ፡ ዓመተ፡ ሰብዐተ፡ ከመ፡ ትርዐይ፡ አባግዕየ፡ በከመ፡ ገበርከ፡ በሱባዔ፡ ቀዳሚ።

⁹ ወበመዋዕል፡ አመ፡ ኀለፈ፡ ሰቡዕ፡ ዕለት፡ ዘግዝእ፡ ዘልያ፡ ወወሀቦ፡ ላባ፡ ራሔልሃ፡ ለያዕቆብ፡ ከመ፡ ይትቀነይ፡ ሎቱ፡ ካልአተ፡ ዓመተ፡ ሰብዐተ፡ ወወሀባ፡ ባላንሃ፡ እኅታ፡ ለዘለፋ፡ ላእኪተ።

¹⁰ ወተቀንየ፡ ሰብዐተ፡ ዓመተ፡ ዳግመ፡ በእንተ፡ ራሔል፡ እስመ፡ ልያ፡ ተውህበቶ፡ በከ።

¹¹ ወአርኀወ፡ እግዚአብሔር፡ ማሕፀነ፡ ልያ፡ ወፀንሰት፡ ወወለደት፡ ለያዕቆብ፡ ወልደ፡ ወጸውዐ፡ ስሞ፡ ሮቤል።

¹² ወማሕፀናሰ፡ ለራሔል፡ ተጸፍቀ፡ እስመ፡ ርእየ፡ እግዚአብሔር፡ ከመ፡ ትጸላእ፡ ልያ፡ ወራሔልሰ፡ ትትፈቀር።

¹³ ወደገመ፡ ያዕቆብ፡ ቦአ፡ ኀበ፡ ልያ፡ ወፀንሰት፡ ወወለደት፡ ለያዕቆብ፡ ወልደ፡ ካልአ፡ ወጸውዐ፡ ስሞ፡ ስምዖን።

¹⁴ ወደገመ፡ ያዕቆብ፡ ወቦአ፡ ኀበ፡ ልያ፡ ወፀንሰት፡ ወወለደት፡ ሎቱ፡ ወልደ፡ ሣልሰ፡ ወጸውዐ፡ ስሞ፡ ሌዊ።

¹⁵ ወደገመ፡ ካዕበ፡ ወቦአ፡ ኀቤሃ፡ ወወለደት፡ ወልደ፡ ራብዐ።

¹⁶ ወበዝ፡ ኵሉ፡ ራሔል፡ ትቀንእ፡ በልያ፡ እስመ፡ ይእቲ፡ ኢትወልድ።

¹⁷ ወሶበ፡ ርእየት፡ ራሔል፡ ከመ፡ ወለደት፡ ልያ፡ ደቀ፡ አርባዕተ፡ ለያዕቆብ፡ ሮቤልሃ፡ ወስምዖንሃ፡ ወሌዊሃ፡ ወይሁዳሃ።

¹⁸ ወቦአ፡ ወፀንሰት፡ ወወለደት፡ ሎቱ፡ ወልደ።

¹⁹ ወደገመ፡ ያዕቆብ፡ ካዕበ፡ ወቦአ፡ ኀበ፡ ባላ፡ ወፀንሰት፡ ወወለደት፡ ወልደ፡ ዳግመ፡ ለያዕቆብ፡ ወጸውዐት፡ ስሞ፡ ራሔል፡ ንፍታሌም፡ በኀሙሱ፡ ለወርኅ፡ ሳብዕ፡ በካልእ፡ ዓም፡ ዘሱባዔ፡ ራብዕ።

²⁰ ወሶበ፡ ርእየት፡ ልያ፡ ከመ፡ መከነት፡ ወኢትወልድ፡ ቀንአት፡ ይእቲኒ፡ ለራሔል፡ ወወሀበት፡ ይእቲኒ፡ ዘለፋሃ፡ ላእኪታ፡ ለያዕቆብ፡ ብእሲተ፡ ወፀንሰት፡ ወወለደት፡ ወልደ፡ ወጸውዐት፡ ስሞ፡ ልያ፡ ጋድ፡ አመ፡ ዐሡሩ፡ ወሰኑዩ፡ ለወርኅ፡ ሳምን፡ በሣልስ፡ ዓመት፡ ዘሱባዔ፡ ራብዕ።

²¹ ወደገመ፡ ቦአ፡ ኀቤሃ፡ ወፀንሰት፡ ወወለደት፡ ሎቱ፡ ወልደ፡ ካልአ፡ ወጸውዐት፡ ስሞ፡ ልያ፡ አሴር፡ በሰኑዩ፡ ለወርኅ፡ ዘዐሠርቱ፡ ወአሐዱ፡ በዓመት፡ ኃምስ፡ ዘሱባዔ፡ ራብዕ።

²² ወቦአ፡ ያዕቆብ፡ ኀበ፡ ልያ፡ ወፀንሰት፡ ወወለደት፡ ለያዕቆብ፡ ወልደ፡ ወጸውዐ፡ ስሞ፡ ይሳኮር፡ በረቡዑ፡ ለኃምስ፡ ወርኅ፡ በዓመት፡ ራብዕ፡ ዘሱባዔ፡ ራብዕ።

²³ ወቦአ፡ ያዕቆብ፡ ዳግመ፡ ኀቤሃ፡ ወፀንሰት፡ ወወለደት፡ ክልኤተ፡ ወልደ፡ ወወለተ፡ ወጸውዐት፡ ስሞ፡ ለወልድ፡ ዛብሎን፡ ወለወለት፡ ዲና፡ ስማ።

²⁴ ወተሣሀላ፡ እግዚአብሔር፡ ለራሔል፡ ወአርኀወ፡ ማሕፀና።

²⁵ ወበመዋዕለ፡ ተወልደ፡ ዮሴፍ፡ ይቤ፡ ያዕቆብ፡ ለላባ፡ ሀበኒ፡ አንስትያየ፡ ወውሉድየ፡ ወእሖር፡ ኀበ፡ አቡየ፡ ይስሐቅ፡ ወእግበር፡ ሊተ፡ ቤተ፡ እስመ፡ ፈጸምኩ፡ ዓመታተ፡ ዘተቀነይኩ፡ ለከ፡ ህየንተ፡ ክልኤቲ፡ አዋልዲከ፡ ወአሐውር፡ ቤተ፡ አቡየ።

²⁶ ወይቤሎ፡ ላባ፡ ለያዕቆብ፡ ንበር፡ ኀቤየ፡ በዐስብከ፡ ወረዐይ፡ ሊተ፡ ካዕበ፡ መርዔትየ፡ ወንሣእ፡ ዐስበከ።

²⁷ ወተካሀሉ፡ በበይናቲሆሙ፡ ከመ፡ የሀቦ፡ ዐስቦ፡ ኵሎ፡ በግዐ፡ እመሓስእ፡ ወእምጠሊ፡ ሐመደ፡ ከቦ፡ ወጋስ፡ በጸዐዳ፡ ዘተወልደ፡ ይኩኖ፡ ዐስቦ።

²⁸ ወይወልድ፡ ኵሉ፡ አባግዕ፡ ጋስ፡ ኵሎ፡ ዘትእምርተ፡ ኰሳኵሰ፡ ዘቦ፡ ኵሉ፡ ወሐመደ፡ ክቦ፡ ኰሳኵሰ፡ ወይደግማ፡ አባግዕ፡ ይወልዳ፡ ዘበአርአያሆን፡ ወኵሉ፡ ዘትእምርተ፡ ለያዕቆብ፡ ወዘአልቦ፡ ትእምርት፡ ለላባ።

²⁹ ወበዝኀ፡ ጥሪቱ፡ ለያዕቆብ፡ ጥቀ፡ ወአጥረየ፡ አልህምተ፡ ወአባግዐ፡ ወአእዱገ፡ ወአግማለ፡ ወደቀ፡ ወአዋልደ።

³⁰ ወቀንአ፡ ላባ፡ ወውሉዱ፡ ላዕለ፡ ያዕቆብ፡ ወአስተጋብአ፡ ላባ፡ አባግዒሁ፡ እምኔሁ፡ ወያስተሐይጾ፡ ለእኩይ።