Jubilees 3

The Ethiopic Bible (Ge'ez)

¹ ወበሰዱስ፡ መዋዕል፡ ዘሰንበት፡ ካልእ፡ አምጻእነ፡ በቃለ፡ እግዚአብሔር፡ ኀበ፡ አዳም፡ ኵሎ፡ አራዊተ፡ ወኵሎ፡ እንስሳ፡ ወኵሎ፡ አዕዋፈ፡ ወኵሎ፡ ዘይትሐወስ፡ ውስተ፡ ምድር።

² ወሰመዮሙ፡ አዳም፡ ለኵሎሙ፡ በበ፡ አስማቲሆሙ፡ ወበከመ፡ ጸውዖሙ፡ ከማሁ፡ ኮነ፡ ስሞሙ።

³ ወበኃምስ፡ እላ፡ መዋዕል፡ ሀለወ፡ አዳም፡ እንዘ፡ ይሬኢ፡ ዘንተ፡ ኵሎ፡ ተባዕተ፡ ወአንስተ፡ በኵሉ፡ ዘመድ፡ ዘበምድር፡ ወውእቱሰ፡ ሀሎ፡ ባሕቲቱ፡ ወአልቦ፡ ዘረከበ፡ ሎቱ፡ ዘይረድኦ፡ ዘከማሁ።

⁴ ወይቤለነ፡ እግዚአብሔር፡ ለነ፡ አኮ፡ ሠናይ፡ የሀሉ፡ ብእሲ፡ ባሕቲቱ፡ ንግበር፡ ሎቱ፡ መርድአ፡ ዘከማሁ።

⁵ ወወደየ፡ እግዚአብሔር፡ አምላክነ፡ ሕድመተ፡ ላዕሌሁ፡ ወኖመ።

⁶ ወአንቅሆ፡ ለአዳም፡ እምንዋሙ።

⁷ በእንተዝ፡ ይኩን፡ ብእሲ፡ ወብእሲት፡ አሐደ፡ ወበእንተዝ፡ የኀድግ፡ አባሁ፡ ወእሞ፡ ወይፃመር፡ ምስለ፡ ብእሲቱ፡ ወይከውኑ፡ ሥጋ፡ አሐደ።

⁸ በሳብዕት፡ ቀዳሚት፡ አዳም፡ ወገቦ፡ ብእሲቱ፡ ወበሳብዕት፡ ካልእት፡ አርአዮ፡ ኪያሃ፡ ሎቱ።

⁹ ወእምድኅረ፡ ተፈጸመ፡ ለአዳም፡ አርብዓ፡ መዋዕል፡ በምድር፡ ኀበ፡ ተፈጥረ፡ አባእናሁ፡ ውስተ፡ ገነተ፡ ኤዶም፡ ከመ፡ ይትቀነይ፡ ወይዕቀባ።

¹⁰ በእንተ፡ ዝንቱ፡ ተጽሕፈ፡ ትእዛዝ፡ ውስተ፡ ጽላተ፡ ሰማይ፡ ለእንተ፡ ትወልድ፡ ለእመ፡ ተባዕተ፡ ወለደት፡ ሰቡዐ፡ መዋዕለ፡ ትንበር፡ ውስተ፡ ርኵሳ፡ በከመ፡ ሰቡዕ፡ መዋዕል፡ ቀዳሚት፡ ወሠላሳ፡ መዋዕለ፡ ወሠሉሰ፡ ዕለተ፡ ትንበር፡ ውስተ፡ ደመ፡ ንጽሕ፡ ወኵሎ፡ ቅዱሰ፡ ኢትግሥሥ፡ ወውስተ፡ መቅደስ፡ ኢትባእ፡ እስከ፡ አመ፡ ትፌጽም፡ ዘንተ፡ መዋዕለ፡ ዘበተባዕት።

¹¹ ወዘበአንስት፡ ክልኤ፡ ሰቡዓተ፡ መዋዕለ፡ በከመ፡ ክልኤ፡ ሰቡዓት፡ ቀዳሚያት፡ በርኵሳ፡ ወስሳ፡ መዋዕለ፡ ወሰዱሰ፡ ዕለተ፡ ትንበር፡ በደመ፡ ንጽሕ፡ ወይከውና፡ ኵሎን፡ ሰማንያ፡ መዋዕለ።

¹² ወፈጺማ፡ እላንተ፡ ሰማንያ፡ መዋዕለ፡ አባእናሃ፡ ውስተ፡ ገነተ፡ ኤዶም፡ እስመ፡ ቅድስት፡ ይእቲ፡ ውለተ፡ ኵሉ፡ ምድር፡ ወኵሉ፡ ዕፅ፡ ዘትኩል፡ ውስቴታ፡ ቅዱስ።

¹³ በእንተዝ፡ ተሠርዐ፡ ለእንተ፡ ትወልድ፡ ለተባዕት፡ ወለእንስት፡ ፍትሖን፡ ለእላንቱ፡ መዋዕል፡ ኵሎ፡ ቅዱሰ፡ ኢትልክፍ፡ ወውስተ፡ መቅደስ፡ ኢትባእ፡ እስከ፡ አመ፡ ይትፌጸማ፡ እላንቱ፡ መዋዕል፡ ለተባዕት፡ ወለእንስት።

¹⁴ ዝንቱ፡ ሕግ፡ ወሰምዕ፡ ዘተጽሕፈ፡ ለእስራኤል፡ ይዕቀቡ፡ ኵሎ፡ መዋዕለ።

¹⁵ ወበሱባዔ፡ ቀዳማዊ፡ ዘኢዮቤልዉ፡ ቀዳሚ፡ ወለወ፡ አዳም፡ ወብእሲቱ፡ ሰብዓተ፡ ዓመተ፡ ውስተ፡ ገነተ፡ ኤዶም፡ እንዘ፡ ይትቀነይ፡ ወየዐቅባ፡ ወምግባረ፡ ወሀብናሁ፡ ወሀሎነ፡ እንዘ፡ ንሜህሮ፡ ገቢሮቶ፡ ኵሎ፡ ዘያስተርኢ፡ ለቅኔ።

¹⁶ ወሀሎ፡ እንዘ፡ ይትቀነይ፡ ወውእቱሰ፡ ዕራቁ፡ ወኢያአምር፡ ወኢየኀፍር፡ ወየዐቅብ፡ ገነተ፡ እምአዕዋፍ፡ ወእምአራዊት፡ ወእምእንስሳ፡ ወያስተጋብእ፡ ፍሬሁ፡ ወይበልዕ፡ ወያነብር፡ ትራፎ፡ ሎቱ፡ ወለብእሲቱ፡ ወያነብር፡ ዘይትዐቀብ።

¹⁷ ወኀሊቆ፡ ፍጻሜሁ፡ ለሰብዓቱ፡ ዓመት፡ እለ፡ ፈጸመ፡ በህየ፡ ሰብዓተ፡ ዓመተ፡ ጥንቁቀ።

¹⁸ ወትቤሎ፡ እምኵሉ፡ ፍሬ፡ ዕፅ፡ ዘውስተ፡ ገነት፡ ይቤለነ፡ እግዚአብሔር፡ ብልዑ።

¹⁹ ወይቤላ፡ አርዌ፡ ምድር፡ ለብእሲት፡ አኮ፡ ሞተ፡ ዘትመውቱ፡ እስመ፡ ያአምር፡ እግዚአብሔር፡ አመ፡ ዕለተ፡ ትበልዑ፡ ይትረኀው፡ አዕይንቲክሙ፡ ወትከውኑ፡ ከመ፡ አማልክት፡ ወታአምሩ፡ ሠናየ፡ ወእኩየ።

²⁰ ወርእየት፡ ብእሲት፡ ዕፀ፡ ከመ፡ አዳም፡ ውእቱ፡ ወያሠምር፡ ለዐይን፡ ወሠናይ፡ ፍሬሁ፡ ለበሊይ።

²¹ ወከደነት፡ ኀፍረታ፡ በቈጽለ፡ በለስ፡ ዘቀዳሚ።

²² ወነሥአ፡ ቈጽለ፡ በለስ፡ ወጠቀበ፡ ወገብረ፡ ሎቱ፡ ሞራአ፡ ወከደነ፡ ኀፍረቶ።

²³ ወረገሞ፡ እግዚአብሔር፡ ለአርዌ፡ ምድር፡ ወተምዕዎ፡ ለዓለም።

²⁴ አብዝኆ፡ አበዝኅ፡ ሐዘንኪ፡ ወፀዕርኪ፡ በሐዘን፡ ለዲ፡ ውሉደ፡ ወኀበ፡ ምትኪ፡ ምግባኢኪ፡ ወውእቱ፡ ይኴንነኪ።

²⁵ ወለአዳምሂ፡ ይቤሎ፡ እስመ፡ ሰማዕከ፡ ለብእሲትከ፡ ወበላዕከ፡ እምውስተ፡ ውእቱ፡ ዕፅ፡ ዘአዘዝኩከ፡ ከመ፡ ኢትብላዕ፡ እምኔሁ።

²⁶ ወገብረ፡ ሎሙ፡ አልባሰ፡ ዘማእስ፡ ወአልቦሶሙ፡ ወፈነዎሙ፡ እምገነተ፡ ኤዶም።

²⁷ ወበይእቲ፡ ዕለት፡ እንዘ፡ ይወፅእ፡ እምገነተ፡ ኤዶም፡ ዐጠነ፡ ለመዓዛ፡ ሠናይ፡ ዕጣነ፡ ስሒነ፡ ወቅንአተ፡ ወማየ፡ ልብን፡ ወሰንበልተ፡ በጽባሕ፡ ምስለ፡ ትንሣኤ፡ ፀሐይ፡ አመ፡ ከደነ፡ ኃፍረቶ።

²⁸ ወበይእቲ፡ ዕለት፡ ተፈጸመ፡ አፈ፡ ኵሉ፡ አራዊተ፡ ወዘእንስሳ፡ ወዘአዕዋፍ፡ ወዘያንሶሱ፡ ወዘይትሐወስ፡ እምነቢብ፡ እስመ፡ ኵሎሙ፡ ይትናገሩ፡ ዝንቱ፡ ምስለ፡ ዝንቱ፡ ከንፈረ፡ አሐደ፡ ወልሳነ፡ አሐደ።

²⁹ ወፈነወ፡ እምገነተ፡ ኤዶም፡ ኵሎ፡ ዘሥጋ፡ ዘሀሎ፡ ውስተ፡ ነገተ፡ ኤዶም፡ ወተዘርዉ፡ ኵሉ፡ ዘሥጋ፡ በበ፡ ዘመዶሙ፡ ወበበ፡ ፍጥረቶሙ፡ ውስተ፡ መካን፡ ዘተፈጥረ፡ ሎሙ።

³⁰ ወለአዳም፡ ባሕቲቱ፡ ወሀቦ፡ ይክድን፡ ኃፍረቶ፡ እምኵሉ፡ አራዊት፡ ወእንስሳ።

³¹ በእንተዝ፡ ተአዘዘ፡ ውስተ፡ ጽላት፡ ላዕለ፡ ኵሎሙ፡ እለ፡ ያአምሩ፡ ፍትሐ፡ ሕግ፡ ይክድኑ፡ ኀፍረቶሙ፡ ወኢይትከሠቱ፡ ከመ፡ አሕዛብ፡ ይትከሠቱ።

³² ወአመ፡ ሠርቀ፡ ወርኅ፡ ራብዕ፡ ወፅኡ፡ አዳም፡ ወብእሲቱ፡ እምገነተ፡ ኤዶም፡ ወኀደሩ፡ ውስተ፡ ምድረ፡ ኤልዳ፡ ውስተ፡ ምድረ፡ ፍጥረቶሙ።

³³ ወሰመየ፡ አዳም፡ ስመ፡ ብእሲቱ፡ ሔዋ።

³⁴ ወኢኮኑ፡ ምስለ፡ ወልድ፡ እስከ፡ ቀዳሚ፡ ኢዮቤልዉ።

³⁵ ወውእቱሰ፡ ይትጌበራ፡ ለምድር፡ በከመ፡ ተምህረ፡ በገነተ፡ ኤዶም።