Jubilees 33

The Ethiopic Bible (Ge'ez)

¹ ወሖረ፡ ያዕቆብ፡ ወኀደረ፡ መንገለ፡ ደቡበ፡ መግደለድራኤፍ፡ ወሖረ፡ ኀበ፡ አቡሁ፡ ይስሐቅ፡ ውእቱ፡ ወልያ፡ ብእሲቱ፡ አመ፡ ሠርቁ፡ ለወርኅ፡ ዓሥር።

² ወርእዮ፡ ሮቤል፡ ባላንሃ፡ ለአኪተ፡ ራሔል፡ ዕቅብተ፡ አቡሁ፡ እንዘ፡ ትትሐፀብ፡ በማይ፡ በኅቡእ፡ አፍቀራ።

³ ወተኀብአ፡ በሌሊት፡ ወቦአ፡ ቤተ፡ ባላን፡ ሌሊተ፡ ወረከባ፡ እንዘ፡ ትሰክብ፡ ውስተ፡ ዐራታ፡ ባሕቲታ፡ ወትነውም፡ ውስተ፡ ቤታ።

⁴ ወሰከበ፡ ምስሌሃ፡ ወነቅሀት፡ ወርእየት፡ ወናሁ፡ ሮቤል፡ ይሰክብ፡ ምስሌሃ፡ ውስተ፡ ምስካብ።

⁵ ወተኀፈረት፡ እምኔሁ፡ ወኀደገት፡ እዴሃ፡ እምላዕሌሁ፡ ወጐየ።

⁶ ወትላሑ፡ በእንተዝ፡ ነገር፡ ፈድፋደ፡ ወኢነገረት፡ ወኢለመኑሂ፡ ሰብእ።

⁷ ወሶበ፡ መጽአ፡ ያዕቆብ፡ ወኀሠሣ፡ ትቤሎ፡ ኢኮንኩ፡ ንጽሕተ፡ ለከ፡ እስመ፡ ተገመንኩ፡ እምኔከ፡ እስመ፡ አርኰሰኒ፡ ሮቤል፡ ወሰከበ፡ ምስሌየ፡ ሌሊተ፡ ወአንሰ፡ እነውም፡ ወኢያእመርኩ፡ እስከ፡ ሶበ፡ ከሠተ፡ ክነፍየ፡ ወሰከበ፡ ምስሌየ።

⁸ ወተምዐ፡ ያዕቆብ፡ ጥቀ፡ ላዕለ፡ ሮቤል፡ እስመ፡ ሰከበ፡ ምስለ፡ ባላን፡ እስመ፡ ከሠተ፡ ክድነተ፡ አቡሁ።

⁹ ወኢቀርባ፡ እንከ፡ ያዕቆብ፡ እስመ፡ አርኰሳ፡ ሮቤል።

¹⁰ በእንተዝ፡ ጽሑፍ፡ ወሥሩዕ፡ ውስተ፡ ጽላተ፡ ሰማይ፡ ከመ፡ ኢይስክብ፡ ብእሲ፡ ምስለ፡ ብእሲተ፡ አቡሁ፡ ወከመ፡ ኢይክሥት፡ ክድነተ፡ አቡሁ፡ እስመ፡ ርኩሰ፡ ውእቱ፡ ሞተ፡ ይሙት፡ ኅቡረ፡ ብእሲ፡ ዘይሰክብ፡ ምስለ፡ ብእሲተ፡ አቡሁ፡ ወብእሲትኒ፡ እስመ፡ ርኩሰ፡ ነገሩ፡ ውስተ፡ ምድር።

¹¹ ወኢይኩን፡ ርኵሰ፡ ቅድመ፡ አምላክነ፡ በውስተ፡ ሕዝብ፡ ዘኀረየ፡ ሎቱ፡ ለምልካን።

¹² ወካዕበ፡ ጽሑፍ፡ ዳግመ፡ ርጉመ፡ ይከን፡ ዘይሰክብ፡ ምስለ፡ ብእሲተ፡ አቡሁ፡ እስመ፡ ከሠተ፡ ኀፍረተ፡ አቡሁ፡ ወይቤሉ፡ ኵሎሙ፡ ቅዱሳኒሁ፡ ለእግዚአብሔር፡ ለይኩን፡ ለይኩን።

¹³ ወአንተኒ፡ ሙሴ፡ አዝዞሙ፡ ለውሉደ፡ እስራኤል፡ ይዕቀቡ፡ ዘንተ፡ ቃለ፡ እስመ፡ ኵነኔ፡ ሞት፡ ውእቱ፡ ወርኵስ፡ ውእቱ፡ ወአልቦ፡ ስርየተ፡ ለአስተስርዮ፡ በእንተ፡ ብእሲ፡ ዘገብረ፡ ዘንተ፡ ለዓለም፡ ዘእንበለ፡ ለአምቶቱ፡ ወለቀቲሎቱ፡ ወለተወግሮቱ፡ በእብን፡ ወለተሠርዎቱ፡ እማእከለ፡ ሕዝበ፡ አምላክነ።

¹⁴ እስመ፡ ኢይከውኖ፡ ሐይወ፡ አሐተ፡ ዕለተ፡ ውስተ፡ ምድር፡ ኵሉ፡ ሰብእ፡ ዘይገብሮ፡ በውስተ፡ እስራኤል፡ እስመ፡ ምኑን፡ ወርኩስ፡ ውእቱ።

¹⁵ ወኢይበሉ፡ ለሮቤል፡ ኮነ፡ ሐዩው፡ ወስርየተ፡ እምዘ፡ ሰከበ፡ ምስለ፡ ዕቅብተ፡ ብእሲተ፡ አቡሁ፡ ወይእቲኒ፡ እንዘ፡ ባቲ፡ ምተ፡ ወእንዘ፡ ምታ፡ ሕያው፡ ያዕቆብ፡ አቡሁ።

¹⁶ እስመ፡ ኢተከሥተ፡ ሥርዓት፡ ወኵነኔ፡ ወሕግ፡ እስከ፡ አሜሃ፡ ፍጹመ፡ ለኵሉ።

¹⁷ ወአልቦ፡ ለዝ፡ ሕግ፡ ተውዳአ፡ መዋዕል፡ ወምንተኒ፡ ስርየተ፡ ሎቱ፡ ዘእንበለ፡ ከመ፡ ይሠረዉ፡ ክልኤሆሙ፡ በማእከለ፡ ሕዝብ፡ በዕለት፡ እንተ፡ ባቲ፡ ገብርዋ፡ ይቅትልዎሙ።

¹⁸ ወአነተኒ፡ ሙሴ፡ ጸሐፍ፡ ለእስራኤል፡ ወይዕቀብዋ፡ ወኢይግበሩ፡ ዘከመ፡ ዝንቱ፡ ነገር፡ ወኢይስሐቱ፡ ለአበሳ፡ ሞት፡ እስመ፡ መኵንን፡ እግዚአብሔር፡ አምላክነ፡ ዘውእቱ፡ ኢይነሥእ፡ ገጸ፡ ወኢይነሥእ፡ ሕልያነ።

¹⁹ ወንግሮሙ፡ ዘንተ፡ ነገረ፡ ሥርዓት፡ ሎሙ፡ ይስምዑ፡ ወይትዐቀቡ፡ ወይትናጸሩ፡ እምኔሆሙ፡ ወኢይትሐጐሉ፡ ወኢይሠረዉ፡ እምድር።

²⁰ ወአልቦ፡ ኀጢአተ፡ ዐባየ፡ እምዝሙና፡ ዘይዜምዉ፡ ዲበ፡ ምድር፡ እስመ፡ ሕዝብ፡ ቅዱስ፡ እስራኤል፡ ለእግዚአብሔር፡ አምላኩ።

²¹ ወበሣልስ፡ ዓመት፡ ዘሱባዔ፡ ሳድስ፡ ሀሎ፡ እንዘ፡ የሐውር፡ ያዕቆብ፡ ወኵሉ፡ ውሉዱ፡ ወኀደሩ፡ ቤተ፡ አብርሃም፡ ቅሩበ፡ ይስሐቅ፡ አቡሁ፡ ወእሙ፡ ርብቃ።

²² ወዝንቱ፡ አስማቲሆሙ፡ ለውሉደ፡ ያዕቆብ፡ በኵሩ፡ ሮቤል።

²³ ወሐዊሮሙ፡ ሰገዱ፡ ለይስሐቅ፡ ወለርብቃ።