Jubilees 35

The Ethiopic Bible (Ge'ez)

¹ ወበቀዳሚ፡ ዓመት፡ ዘሱባዔ፡ ቀዳሚ፡ በዘ፡ አርብዓ፡ ወኃምስቱ፡ ኢዮቤልዉ፡ ጸውዐቶ፡ ርብቃ፡ ለያዕቆብ፡ ወልዳ፡ ወአዘዘቶ፡ በእንተ፡ አቡሁ፡ ወበእንተ፡ እኁሁ፡ ከመ፡ ያክብሮሙ፡ ኵሎ፡ መዋዕለ፡ ሕይወቱ፡ ለያዕቆብ።

² ወይቤ፡ ያዕቆብ፡ አነ፡ እገብር፡ ኵሎ፡ ዘከመ፡ አዘዝክኒ፡ እስመ፡ ክብር፡ ወዕበይ፡ ሊተ፡ ዝንቱ፡ ነገር፡ ወጽድቅ፡ ሊተ፡ በቅድመ፡ እግዚአብሔር፡ ከመ፡ አክብሮሙ።

³ ወአንቲኒ፡ እሞ፡ ታአሞሪ፡ እምዕለተ፡ ተወለድኩ፡ እስከ፡ ዛቲ፡ ዕለት፡ ኵሎ፡ ምግባርየ፡ ወኵሎ፡ ዘውስተ፡ ልብየ፡ ከመ፡ ኵሎ፡ መዋዕለ፡ እኄሊ፡ ሠናየ፡ ለኵሉ።

⁴ ወእፎ፡ ኢይግብር፡ ነገረ፡ ዘአዘዝክኒ፡ ከመ፡ አክብር፡ አባየ፡ ወእኅዋየ።

⁵ ንግርኒ፡ እሞ፡ ምንተ፡ ርኢኪ፡ በላዕሌየ፡ ጥውየተ፡ ወተግሕሦ፡ እትገሐሥ፡ እምኔሁ፡ ወይከውን፡ ላዕሌየ፡ ሣህል።

⁶ ወትቤሎ፡ ወልድየ፡ ኵሎን፡ መዋዕልየ፡ አልቦ፡ ዘርኢኩ፡ በላዕሌከ፡ ምንተኒ፡ ግብረ፡ ጠዋየ፡ አላ፡ ርቱዐ፡ ወባሕቱ፡ ጽድቀ፡ እነግረከ፡ ወልድየ፡ አነ፡ በዛቲ፡ ዓመት፡ እመውት፡ ወኢይትዐደው፡ ዛተ፡ ዓመተ፡ በሕይወት።

⁷ ወሠሐቀ፡ ያዕቆብ፡ በእንተ፡ ነገረ፡ እሙ፡ እስመ፡ ትቤሎ፡ እሙ፡ ከመ፡ ትመውት፡ ወይእቲሰ፡ ትነብር፡ አንጻሪሁ፡ ወኀይላ፡ ላዕሌሃ፡ ወኢደክመት፡ እምኀይላ፡ እስመ፡ ትበውእ፡ ወትወፅእ፡ ወትሬኢ፡ ወአስናኒሃኒ፡ ጽኑዕ፡ ወምንተኒ፡ ሕማም፡ ኢለከፋ፡ ኵሎ፡ መዋዕለ፡ ሕይወታ።

⁸ ወይቤላ፡ ያዕቆብ፡ ብፁዕ፡ አነ፡ እሞ፡ እመ፡ ቀርበ፡ መዋዕልየ፡ ለመዋዕለ፡ ሕይወትኪ፡ ወይሄሉ፡ ኀይልየ፡ ላዕሌየ፡ ከመዝ፡ በከመ፡ ኀይልኪ፡ ወኢትመውቲ፡ እስመ፡ በከ፡ በጸው፡ ትትናገሪ፡ ምስሌየ፡ በእንተ፡ ሞትኪ።

⁹ ወቦአት፡ ኀበ፡ ይስሐቅ፡ ወትቤሎ፡ አሐተ፡ ስእለተ፡ አስተበቍዕ፡ በኀቤከ፡ እምሕሎ፡ ለዔሳው፡ ከመ፡ ኢያሕስም፡ ላዕለ፡ ያዕቆብ፡ ወኢይስድዶ፡ በጸልእ።

¹⁰ ወአንተ፡ ታአምር፡ መጠነ፡ ገብረ፡ ኵሎ፡ እምአመ፡ ዕለተ፡ ሖረ፡ ያዕቆብ፡ እኁሁ፡ ውስተ፡ ካራን፡ እስከ፡ ዛቲ፡ ዕለት፡ ከመ፡ በኵሉ፡ ልቡ፡ ኀደገነ።

¹¹ ወእንዘ፡ ናስተበቍዕ፡ ንስእሎ፡ ዘእምዚአነ፡ ወውእቱ፡ ይሬሲ፡ ከመ፡ ዘብእሲ፡ ዘይምሕረነ።

¹² ወያመርር፡ ላዕሌከ፡ በእንተ፡ ዘባረከ፡ ያዕቆብሃ፡ ወልደከ፡ ፍጹማዊ፡ ወራትዐ፡ እስመ፡ አልቦ፡ እከየ፡ ዘእንበለ፡ ኂሩት።

¹³ ወይቤላ፡ ይስሐቅ፡ አነኒ፡ አአምር፡ ወእሬኢ፡ ግብረ፡ ያዕቆብ፡ ዘምስሌነ፡ ከመ፡ በኵሉ፡ ልቡ፡ ውእቱ፡ ያከብረነ።

¹⁴ ወይእዜኒ፡ ልብየ፡ ይትሀወክ፡ በእንተ፡ ምግባራቲሁ፡ ወኢኮነ፡ ውእቱ፡ ወዘርኡ፡ ለድኂን፡ እስመ፡ እለ፡ ይትሐጐሉ፡ እሙንቱ፡ እምነ፡ ምድር፡ ወእለ፡ ይሤረዉ፡ እሙንቱ፡ እምታሕተ፡ ሰማይ።

¹⁵ ወአንቲኒ፡ ትብልኒ፡ ከመ፡ አምሕሎ፡ ከመ፡ ኢይቅትል፡ እኅዋሁ፡ ያዕቆብሃ።

¹⁶ ወእመኒ፡ ፈቀደ፡ ይቅትል፡ ያዕቆብሃ፡ እኅዋሁ፡ ውስተ፡ እደ፡ ያዕቆብ፡ ይትወሀብ፡ ወኢያመሥጥ፡ እምእዴሁ፡ እስመ፡ ውስተ፡ እዴሁ፡ ይወርድ።

¹⁷ ወአንተኒ፡ ኢትፍርሂ፡ በእንተ፡ ያዕቆብ፡ እስመ፡ ዐቃቢሁ፡ ለያዕቆብ፡ ዐቢይ፡ ወኀያል፡ ወክቡር፡ ወእኩት፡ እምዐቃቢሁ፡ ለዔሳው።

¹⁸ ወለአክት፡ ርብቃ፡ ወጸውዐቶ፡ ለዔሳው፡ ወመጽአ፡ ኀቤሃ፡ ወትቤሎ፡ ስእለተ፡ ብየ፡ ወልድየ፡ እንተ፡ እስእል፡ እምኀቤከ፡ ወበል፡ ከመ፡ ትግበራ፡ ወልድየ።

¹⁹ ወይቤ፡ አነ፡ እገብር፡ ኵሎ፡ ዘትቤልኒ፡ ወኢየአቢ፡ ስእለተኪ።

²⁰ ወትቤሎ፡ አነ፡ እስእል፡ እምኀቤከ፡ በዕለተ፡ አመ፡ ሞትኩ፡ ከመ፡ ታብአኒ፡ ወትቅብረኒ፡ ቅሩበ፡ ሳራ፡ እመ፡ አቡከ፡ ወከመ፡ ትትፋቀሩ፡ አንተ፡ ወያዕቆብ፡ በበይናቲክሙ፡ ወኢይኅሥሥ፡ እኩየ፡ አሐዱ፡ ለእኁሁ፡ ዘእንበለ፡ ተፋቅሮ፡ ክመ፡ ወትሴርሑ፡ ውሉድየ፡ ወትከብሩ፡ በማእከለ፡ ምድር፡ ወኢይትፌሣሕ፡ ላእሌክሙ፡ ጸላኢ፡ ወትከውኑ፡ ለበረከት፡ ወለምሕረት፡ በቅድመ፡ አዕይንቲሆሙ፡ ለኵሎሙ፡ እለ፡ ያፈቅሩክሙ።

²¹ ወይቤ፡ አነ፡ እገብር፡ ኵሎ፡ ዘትቤልኒ፡ ወእቀብረኪ፡ አመ፡ ዕለተ፡ ሞትኪ፡ ቅሩበ፡ ሳራ፡ እሙ፡ ለአቡየ፡ በከመ፡ አፍቀርኪ፡ አዕጽምቲሃ፡ ከመ፡ የሀሉ፡ ቅሩበ፡ አዕጽምቲኪ።

²² ወያዕቆብሃኒ፡ እኅዋየ፡ አነ፡ አፈቅር፡ እምኵሉ፡ ዘሥጋ፡ ወአልቦ፡ ሊተ፡ እኅወ፡ በውስተ፡ ኵሉ፡ ምድር፡ ዘእንበለ፡ ውእቱ፡ ባሕቲቱ።

²³ ወአነ፡ ክመ፡ አስተበቍዐኪ፡ ከመ፡ ትገሥጽዮ፡ ለያዕቆብ፡ በእንቲአየ፡ ወበእንተ፡ ውሉድየ፡ እስመ፡ አአምር፡ ከመ፡ ነጊሠ፡ ይነግሥ፡ ላዕሌየ፡ ወላዕለ፡ ውሉድየ።

²⁴ ወአነ፡ እምሕል፡ ለኪ፡ ከመ፡ አፈቅሮ፡ ወከመ፡ ኢይትኀሠሥ፡ ሎቱ፡ እኩየ፡ ኵሎ፡ መዋዕል፡ ሕይወትየ፡ ዘእንበለ፡ ሠናይ፡ ክመ።

²⁵ ወጸውዐቶ፡ ለያዕቆብ፡ በቅድመ፡ አዕይንቲሁ፡ ለዔሳው፡ ወአዘዘቶ፡ በከመ፡ ነገር፡ ዘተናገረት፡ ምስለ፡ ዔሳው።

²⁶ ወይቤ፡ አነ፡ እገብር፡ ሥምረተኪ፡ ተሐበይኒ፡ ከመ፡ ኢይወፅእ፡ እምኔየ፡ ወእምነ፡ ውሉድየ፡ እኩይ፡ ላዕለ፡ ዔሳው፡ ኢይቀድም፡ ዘእንበለ፡ ተፋቅሮ፡ ክመ።

²⁷ ወበልዑ፡ ወሰትዩ፡ ይእቲ፡ ወውሉዳ፡ በይእቲ፡ ሌሊት።