Jubilees 36

The Ethiopic Bible (Ge'ez)

¹ ወበሳድስ፡ ዓመት፡ ዘዝ፡ ሱበዔ፡ ጸውዐ፡ ይስሐቅ፡ ክልዔሆሙ፡ ውሉዶ፡ ዔሳውሃ፡ ወያዕቆብሃ፡ ወመጽኡ፡ ኀቤሁ፡ ወይቤሎሙ፡ አነ፡ ደቂቅየ፡ አሐውር፡ ውስተ፡ ፍኖተ፡ አበዊየ፡ ውስተ፡ ቤት፡ ዘለዓለም፡ ኀበ፡ ሀለዉ፡ ህየ፡ አበዊየ።

² ወቅብሩኒ፡ ቅሩበ፡ አብርሃም፡ አቡየ፡ ውስተ፡ በአት፡ ዘካዕበት፡ ውስተ፡ ገራህተ፡ ኤፍሮን፡ ኬጣዊ፡ ዘአጥረየ፡ አብርሃም፡ ለዝኅረ፡ መቃብር፡ ህየ፡ ውስተ፡ መቃብር፡ ዘከረይኩ፡ ለርእስየ፡ ህየ፡ ቅብሩኒ።

³ ወዘንተ፡ እኤዝዘክሙ፡ ውሉድየ፡ ከመ፡ ትግበሩ፡ ጽድቀ፡ ወርትዐ፡ በዲበ፡ ምድር፡ ከመ፡ ያምጽእ፡ እግዚአብሔር፡ ላዕሌክሙ፡ ኵሎ፡ ዘመጠነ፡ ነገሮ፡ እግዚአብሔር፡ ይግበር፡ ለአብርሃም፡ ወለዘርኡ።

⁴ ወኩኑ፡ ውሉድየ፡ በበይናቲክሙ፡ እንዘ፡ ታፈቅሩ፡ አኀዊክሙ፡ ከመ፡ ብእሲ፡ ዘያፈቅር፡ ነፍሶ፡ ወእንዘ፡ የኀሥሥ፡ ብእሲ፡ ለእኁሁ፡ በዘያሤኒ፡ ሎቱ፡ ወበገቢር፡ ኅቡረ፡ በዲበ፡ ምድር፡ ወይትፋቀሩ፡ በበይናቲሆሙ፡ ከመ፡ ነፍሶሙ።

⁵ ወበእንተ፡ ነገረ፡ ጣዖት፡ አነ፡ እጌሥጸክሙ፡ ከመ፡ ትመንንዎሙ፡ ወትፃረርዎሙ፡ ወከመ፡ ኢታፍቅርዎሙ፡ እስመ፡ ስሕተት፡ ምሉኣን፡ እሙንቱ፡ ለእለ፡ ያመልክዎሙ፡ ወለእለ፡ ይሰግዱ፡ ሎሙ።

⁶ ተዘከርዎ፡ ውሉድየ፡ ለእግዚአብሔር፡ ለአምላከ፡ አብርሃም፡ አቡክሙ፡ ወእምዝ፡ አነኒ፡ አምለክዎ፡ ወተቀነይኩ፡ ሎቱ፡ ዘበ፡ ጽድቅ፡ ወበስፉሕ፡ ከመ፡ ያብዝኅክሙ፡ ወያልህቅ፡ ዘርእክሙ፡ ከመ፡ ከዋክብተ፡ ሰማይ፡ ለብዝኅ፡ ወይትክልክሙ፡ ውስተ፡ ምድር፡ ተክለ፡ ጽድቅ፡ ዘኢይሤረው፡ ለኵሉ፡ ትውልድ፡ ዘለዓለም።

⁷ ወይእዜኒ፡ አነ፡ አምሕለክሙ፡ በመሐላ፡ ዐቢይ፡ እስመ፡ አልቦ፡ መሐላ፡ ዘእምኔሁ፡ የዐቢ፡ በስም፡ ስቡሕ፡ ወክቡር፡ ወዐቢይ፡ ስሩሕ፡ ወመንክር፡ ወኀያል፡ ወዐቢይ፡ ዘገብረ፡ ሰማያተ፡ ወምድረ፡ ወኵሎ፡ ኅቡረ።

⁸ ወእንዘ፡ ያፈቅር፡ አሐዱ፡ አሐዱ፡ እኅዋሁ፡ በምሕረት፡ ወበጽድቅ፡ ወኢይፍቅድ፡ ብእሲ፡ እኩየ፡ ለእኁሁ፡ እምይእዜ፡ ወእስከ፡ ለዓለም፡ ኵሎ፡ መዋዕለ፡ ሕይወትክሙ፡ ከመ፡ ትስርሑ፡ በኵሉ፡ ምግባሪክሙ፡ ወኢትትሐጐሉ።

⁹ ወእመቦ፡ ዘኀሠሠ፡ እምኔክሙ፡ እኩየ፡ ለእኁሁ፡ አእምሩ፡ እምይእዜ፡ ከመ፡ ኵሉ፡ ዘየኀሥሥ፡ እኩየ፡ ለእኁሁ፡ ውስተ፡ እዴሁ፡ ይወድቅ፡ ወይሤሮ፡ እምድረ፡ ሕያዋን፡ ወዘርኡሂ፡ ይትሐጐል፡ እምታሕተ፡ ሰማይ።

¹⁰ ወአመ፡ ዕለተ፡ ሀከክ፡ ወመርገም፡ ወመዓት፡ ወቍጥዓ፡ ወበእሳት፡ በላዒ፡ በከመ፡ አውዐየ፡ ሰዶምሃ፡ ከማሁ፡ ያውዒ፡ ምድሮ፡ ወሀገሮ፡ ወኵሎ፡ ዘይከውን፡ ዚአሁ።

¹¹ አነ፡ እነግር፡ ወአሰምዕ፡ ላዕሌክሙ፡ ውሉድየ፡ በከመ፡ ኵነኔ፡ ዘይመጽእ፡ ዲበ፡ ብእሲ፡ ዘይፈቅድ፡ ይግበር፡ ሕሡመ፡ ላዕለ፡ እኁሁ።

¹² ወከፈለ፡ ኵሎ፡ ዘቦ፡ ጥሪቶ፡ ለክልኤሆሙ፡ በይእቲ፡ ዕለት፡ ወወሀበ፡ ዕበየ፡ ለብእሲ፡ ዘውእቱ፡ ቀደመ፡ ተወልዶ፡ ወማኅፈደ፡ ኵሎ፡ ዘአውዳ።

¹³ ወይቤ፡ ዛተ፡ አዐቢ፡ ዕበየ፡ ለብእሲ፡ ዘውእቱ፡ ቀደመ፡ ተወልዶ።

¹⁴ ወይቤ፡ ዔሳው፡ ሤጥኩ፡ ሎቱ፡ ለያዕቆብ፡ ወወሀብኩ፡ ልህቃንየ፡ ለያዕቆብ፡ ይትወሀብ፡ ሎቱ፡ ወአልብየ፡ ዘእብል፡ በእንቲአሃ፡ ምንተኒ፡ ቃለ፡ እስመ፡ ኀቤሁ፡ ሀለወት።

¹⁵ ወይቤ፡ ይስሐቅ፡ ታዕርፍ፡ ዲቤክሙ፡ ውሉድየ፡ በረከት፡ ወላዕለ፡ ዘርእክሙ፡ በዛቲ፡ ዕለት፡ እስመ፡ አዕረፍክሙኒ፡ ወኢሐዘነ፡ ልብየ፡ በእንተ፡ ልህቃን፡ ከመ፡ ኢትግበር፡ በእንቲአሃ፡ ፁገ።

¹⁶ ይባርኮ፡ እግዚአብሔር፡ ልዑል፡ ለብእሲ፡ ዘይገብር፡ ጽድቀ፡ ኪያሁ፡ ወዘርኡ፡ እስከ፡ ለዓለም።

¹⁷ ወፈጸመ፡ እንዘ፡ ይኤዝዞሙ፡ ወእንዘ፡ ይባርኮሙ፡ ወበልዑ፡ ወሰትዩ፡ በቅድሜሁ፡ ኅቡረ፡ ወተፈሥሐ፡ እስመ፡ ኮነ፡ ዐርዮ፡ በማእከሎሙ፡ ወወፅኡ፡ እምኀቤሁ፡ ወአዕረፉ፡ ይእተ፡ ዕለተ፡ ወኖሙ።

¹⁸ ወኖመ፡ ይስሐቅ፡ ውስተ፡ ዐራቱ፡ በዛቲ፡ ዕለት፡ እንዘ፡ ይትፌሣሕ፡ ወኖመ፡ ንዋመ፡ ዘለዓለም።

¹⁹ ወሖረ፡ ዔሳው፡ ውስተ፡ ምድረ፡ ኤዶም፡ ውስተ፡ ደብረ፡ ሲር፡ ወነበረ፡ ህየ።

²⁰ ወያዕቆብ፡ ኀደረ፡ ውስተ፡ ደብረ፡ ኬብሮን፡ ውስተ፡ ማኅፈድ፡ ዘምድረ፡ ፍልሰተ፡ አቡሁ፡ አብርሃም።

²¹ ወሞተት፡ ልያ፡ ብእሲቱ፡ በዓመት፡ ራብዕ፡ ዘሱባዔ፡ ካልእ፡ ዘአርብዓ፡ ወኃምስ፡ ኢዮቤልዉ፡ ወቀበራ፡ ውስተ፡ በአት፡ ዘእንተ፡ ክልኤ፡ ቅሩበ፡ ርብቃ፡ እሙ፡ በፀጋሙ፡ ለመቃብረ፡ ሳራ፡ እመ፡ አቡሁ።

²² ወመጽኡ፡ ኵሎሙ፡ ውሉዳ፡ ወውሉዱ፡ ከመ፡ ይብክይዋ፡ ልያሃ፡ ብእሲቶ፡ ምስሌሁ፡ ወከመ፡ ይናዝዝዎ፡ በእንቲአሃ፡ እስመ፡ ሀሎ፡ ይላሕዋ።

²³ እስመ፡ ያፈቅራ፡ ፈድፋደ፡ ጥቀ፡ እምአመ፡ ሞተት፡ ራሔል፡ እኅታ፡ እስመ፡ ፍጽምት፡ ወራትዕት፡ ይእቲ፡ በኵሉ፡ ፍናዊሃ፡ ወታከብሮ፡ ለያዕቆብ።

²⁴ ወይዜከር፡ ኵሎ፡ ምግባራቲሃ፡ ዘገብረት፡ በሕይወታ፡ ወይላሕዋ፡ ጥቀ፡ እስመ፡ ያፈቅራ፡ በኵሉ፡ ልቡ፡ ወበኵሉ፡ ነፍሱ።