Jubilees 38

The Ethiopic Bible (Ge'ez)

¹ ወእምዝ፡ ተናገሮ፡ ይሁዳ፡ ለያዕቆብ፡ አቡሁ፡ ወይቤሎ፡ ምስክ፡ አባ፡ ቀሥተከ፡ ወፈኑ፡ ሐጸከ፡ ወንድፍ፡ ጸላኤ፡ ወቅትል፡ ፀራዌ፡ ወይኩን፡ ለከ፡ ኀይል፡ እስመ፡ ኢንቀትል፡ እኅዋከ፡ ወኀቤከ፡ ውእቱ፡ ወመምስልከ፡ ውእቱ፡ በኀቤነ፡ ለክብር።

² ይእተ፡ ሶቤ፡ ወሰቀ፡ ያዕቆብ፡ ቀሥቶ፡ ወፈነወ፡ ሐጸ፡ ወነደፎ፡ ለዔሳው፡ እኁሁ፡ ወገደሎ።

³ ወደገመ፡ ፈነወ፡ ሐጸ፡ ወሄጶ፡ አዱራንሃ፡ አራማዌ፡ ጥቦ፡ ፀጋማዌ፡ ወቀተሎ።

⁴ ወእምዝ፡ ወፅኡ፡ ውሉደ፡ ያዕቆብ፡ እሙንቱ፡ ወአግብርቲሆሙ፡ ተናፊቆሙ፡ ውስተ፡ መርብዕተ፡ ማኅፈድ።

⁵ ወወፅአ፡ ይሁዳ፡ ፍጽመ፡ ወንፍታሌም፡ ወጋድ፡ ምስሌሁ፡ ወኀምሳ፡ ደቅ፡ ምስሌሁ፡ እንተ፡ ገጸ፡ ደቡብ፡ ለማኅፈድ፡ ወቀተሉ፡ ኵሎ፡ ዘረከቡ፡ በቅድሜሆሙ፡ ወአልቦ፡ ዘአምሠጠ፡ እምኔሆሙ፡ ወኢአሐዱ።

⁶ ወሌዊ፡ ወዳን፡ ወአሴር፡ ወፅኡ፡ እንተ፡ ገጸ፡ ጽባሑ፡ ለማኅፈድ፡ ወኀምሳ፡ ምስሌሆሙ፡ ወቀተሉ፡ መስተቃትላኒሆሙ፡ ለሞአብ፡ ወለአሞን።

⁷ ወወፅኡ፡ ሮቤል፡ ወርሳኮር፡ ወዛብሎን፡ እንተ፡ ገጸ፡ ሰሜኑ፡ ለማኅፈድ፡ ወኀምሳ፡ ምስሌሆሙ፡ ወቀተሉ፡ መስተባእሳኒሆሙ፡ ለፍልስጥኤም።

⁸ ወወፅኡ፡ ስምዖን፡ ወብንያም፡ ወኤኖክ፡ ወልደ፡ ሮቤል፡ እንተ፡ ገጸ፡ ዐረቢሁ፡ ለማኅፈድ፡ ወኀምሳ፡ ምስሌሆሙ፡ ወቀተሉ፡ እምነ፡ ኤዶም፡ ወእምነ፡ ኮሬዎን፡ አርባዕተ፡ ምእተ፡ ዕደ፡ ጽኑዓነ፡ መስተቃትላነ፡ ወስድስቱ፡ ምእት፡ ጐዩ።

⁹ ወሰደድዎሙ፡ ውሉደ፡ ያዕቆብ፡ ድኅሬሆሙ፡ እስከ፡ ደብረ፡ ሲኢር።

¹⁰ ወአመንደብዎሙ፡ ውሉደ፡ ያዕቆብ፡ ለደቂቀ፡ ዔሳው፡ በደብረ፡ ሰኢር፡ ወአትሐቱ፡ ክሳዶሙ፡ ከመ፡ ይከኩኑ፡ አግብርተ፡ ለደቂቀ፡ ያዕቆብ።

¹¹ ወለአኩ፡ ኀበ፡ አቡሆሙ፡ እመ፡ ይገብሩ፡ ሰላም፡ ምስሌሆሙ፡ ወለእመ፡ ይቀትልዎሙ።

¹² ወለአከ፡ ያዕቆብ፡ ኀበ፡ ውሉዱ፡ ከመ፡ ይግበሩ፡ ሰላመ፡ ወገብሩ፡ ምስሌሆሙ፡ ሰላመ፡ ወአንበሩ፡ አርዑተ፡ ቅኔ፡ ላዕሌሆሙ፡ ከመ፡ ይጸብሑ፡ ለያዕቆብ፡ ወለውሉዱ፡ ኵሎ።

¹³ ወነበሩ፡ እንዘ፡ ይጼብሑ፡ ለያዕቆብ፡ እስከ፡ አመ፡ ዕለተ፡ ወረደ፡ ያዕቆብ፡ ውስተ፡ ግብጽ።

¹⁴ ወኢነተጉ፡ ውሉዱ፡ ኤዶም፡ እምአርዑተ፡ ቅኔ፡ ዘዐሠርቱ፡ ወክልኤቱ፡ ውሉደ፡ ያዕቆብ፡ ላዕሌሆሙ፡ እስከ፡ ዛቲ፡ ዕለት።

¹⁵ ወእሉ፡ ነገሥት፡ እለ፡ ነግሡ፡ በኤዶም፡ ዘእንበለ፡ ይንግሥ፡ ንጉሥ፡ ለውሉደ፡ እስራኤል፡ እስከ፡ ዛቲ፡ ዕለት፡ በምድረ፡ ኤዶም።

¹⁶ ወነግሠ፡ በኤዶም፡ ባላቅ፡ ወልደ፡ ቦኤር፡ ወስመ፡ ሀገሩ፡ ደናባ።

¹⁷ ወሞተ፡ ባላቅ፡ ወነግሠ፡ ህየንቴሁ፡ ዮባብ፡ ወልደ፡ ዛራ፡ ዘእምነ፡ ቦሲር።

¹⁸ ወሞተ፡ ዮባብ፡ ወነግሠ፡ ህየንቴሁ፡ አሳም፡ ዘእምነ፡ ደብረ፡ ቴማን።

¹⁹ ወሞተ፡ አሳም፡ ወነግሠ፡ ህየንቴሁ፡ አዳት፡ ወልደ፡ ባርድ፡ ዘቀተለ፡ መዕድያምሃ፡ በሐቅለ፡ ሞአብ፡ ወስመ፡ ሀገሩ፡ አውኡቱ።

²⁰ ወሞተ፡ አዳት፡ ወነግሠ፡ ህየንቴሁ፡ ሰሎማን፡ ዘእምነ፡ እማሴቃ።

²¹ ወሞተ፡ ሰሎማን፡ ወነገሠ፡ ህየንቴሁ፡ ሳኡል፡ ዘእምነ፡ ራአቦት፡ ፈለግ።

²² ወሞተ፡ ሳኡል፡ ወነግሠ፡ ህየንቴሁ፡ ብኤሉናን፡ ወልደ፡ አክቡር።

²³ ወሞተ፡ በኤሉናን፡ ወልደ፡ አክቡር፡ ወነግሠ፡ ህየንቴሁ፡ አዳት፡ ወስመ፡ ብእሲቱ፡ መይጠቢት፡ ወለተ፡ መጥሪት፡ ወለተ፡ ሜተቤድዛአብ።

²⁴ እሉ፡ ነገሥት፡ እለ፡ ነግሡ፡ በምድረ፡ ኤዶም።